باس اقىن
تويدا شامادان تىس قىزىپ وتىرعان ەل اعالارىنىڭ ءبىرى ارناۋ ولەڭىن وقىپ، ونىسىن مەرەيتوي يەسىنە تابىستاپ وتىرعان ورنىنا قاراي ماڭ باسىپ بارا جاتقان اقىندى توقتاتىپ: «سەن قازىردەن باستاپ وسى وبلىستىڭ باس اقىنىسىڭ!
مەن سولاي ۇيعاردىم!»- دەپ سالدى.
سول ءسات دۋ قول شاپالاقتاۋ قۇتتىقتاۋعا ۇلاسىپ، اراگىدىك بىرەر ولەڭى جەرگىلىكتى گازەتكە قىرنالىپ،تىرنالىپ، كۇزەلىپ، تۇزەلىپ باسىلىپ تۇراتىن پاقىرىڭىز ءبىر-اق ساتتە ايماقتىڭ باس اقىنى بولىپ شىعا كەلدى.
سول كۇننەن باستاپ «ايماقتىڭ باس اقىنى» دەگەن الىپ- قاشپا اتاق الگىگە قارا كۇيەشە جابىستى.
گازەتتىڭ ءبولىم مەڭگەرۋشىسى، ادەبيەت بەتىن ازىرلەي قالسا، رەداكتورى: «الگى باس اقىننىڭ ولەڭدەرى بار ما؟»- دەپ سۇرار ەدى.
-بار،- دەسە...
-دۇرىس!- دەپ بەتكە باتاسىن بەرەتىن.
- جوق،- دەي قالسا...
- سەن ءوزى... نە تانتىپ تۇرسىڭ؟
پالەنشەنىڭ تويىندا وبلىستاعى ەكىنىڭ ءبىرى ونى باس اقىن دەگەنىن ەستىگەن جوق پا ەڭ؟ - دەپ تۇلكى كورگەن بۇركىتتەي تۇيىلەر ەدى.
-جازباسا، زاكاز بەرىپ جازدىرت. مىنا بەتتى سودان سوڭ اكەلەرسىڭ! - دەپ شىعارىپ سالاتىن بولدى.
ەڭبەگى وسىلاي بىرنەشە رەت ەش بولعان ءبولىم مەڭگەرۋشىسىنىڭ كۇيىپ كەتىپ: «قازاقتىڭ باس اقىنى – اباي، مۇنى ايتقان مەن ەمەس – احمەت بايتۇرسىنوۆ.
ال سىزدەر ايتىپ جۇرگەن وبلىستىڭ باس اقىنى – قازاق ادەبيەتىندەگى داۋاسىز دەرت، سىزداۋىق.
شەكپەن كيگەن دانىشپان اباي عانا، ماكەنتوجدى ميعۇلا جەتىپ جاتىر، - دەپ قادىر اقىن تەككە ايتتى دەيسىز بە؟
بۇل دا سول ميعۇلانىڭ ءبىرى مىنەز تانىتامىن دەپ مادەنيەت بولىمىنەن ءوندىرىس ءبولىمىنىڭ ادەبي قىزمەتكەرلىگىنە تومەندەتىلگەنى.
بۇل بايعۇس مادەنيەت ءبولىمىن ۇرشىقشا ۇيىرگەنىمەن ءوندىرىس دەگەن پالەنىڭ نەدەن باستالىپ، نەدەن اياقتالاتىنىن بىلە قويمايتىن.
قالاماقىدان قالا بەردى ءبىرى اعا، ءبىرى ىنىدەن قۇراق ۇشىپ تۇراتىن مادەنيەت سالاسىنىڭ قىزمەتكەرلەرىنەن كوز جازدى.
اسىرەسە «جىرىما قانات بەرىپ، ۇشىرعان سەن» –دەپ جۇرت الدىندا مەرەيىن اسقاقتاتا كوتەرەتىن اقىنداردىڭ بىردەن-اق سۋىپ سالا بەرۋى ارقاسىنا ايازداي باتىپ، ەڭسەسىن ەزگەن.
ال ايماقتىڭ باس اقىنى مۇنىمەن الدەقالاي كەزدەسە قالعاندا الارا قاراپ، ىركىلە قالسا، كىرەرگە تەسىك تاپپاي ءپۇشايمان كۇيگە تۇسەتىن.
باس اقىننىڭ ىشىمدىككە سالىنىپ، ماسكۇنەمگە اينالا باستاعانىن كورگەندە ءبىر ءتۇرلى ايىزى قانىپ: «ولەڭ كيەسى قويسىن با، بۇل يتكە سول كەرەك»،- دەر ەدى ىشتەي كىجىنىپ.
اقىرى، رەداكتورعا كىسى سالىپ جالىنىپ، جالپايىپ ءجۇرىپ مادەنيەت ءبولىمىنىڭ ادەبي قىزمەتكەرلىگىنە اۋىسقان. «قىرسىققاندا قىمىران ءىريدى» دەمەكشى، ءدال سول تۇستا الماتىدان الماعايىپ اتتى اقىن كەلىپ، ايماق وقىرماندارىمەن كەزدەسۋ وتكىزدى.
بىرەر جاس اقىن ولەڭ وقىدى. سولاردىڭ ءبىرىنىڭ ولتىرسەڭ دە ولەڭ دەۋگە كەلمەيتىن ولەڭسىماعى الماعايىپ اقىنعا ۇناپ قالسا كەرەك.
كەزدەسۋگە ۇيتقى بولىپ وتىرعان ءۇشىنشى حاتشىعا قاراتا: «سىزدەردىڭ ايماقتارىڭىزدا مىنا جىگىتتەن باسقا اقىن جوق. اناۋ اقىن، مىناۋ اقىن دەپ جۇرگەندەرىڭىز – دالباسا»، -دەمەسى بار ەمەس پە؟..
ول مۇنىڭ باستىعىنا، باستىعى بۇعان يەك قاقتى. ەستىدىڭ بە دەگەنى بولار؟..
ال مۇنىڭ بويىن «وسىنىڭ سوڭى نەمەن تىنار ەكەن؟» دەگەن تۇينە تۇيتكىل مەڭدەپ بارا جاتتى.
You Might Also Like
-
ءومىرى تۇرەن تيمەگەن سايدىڭ قاباعىنا سوقانىڭ وتكىر ءتىسى تىرەلگەندە جەر ءدىر-دىر ەتىپ ىڭىرسىعانداي بولدى. ءبىراق ونى ەشكىم ەستىگەن دە، ەلەگەن دە جوق. جاسىنا جەتپەي قارنى شەڭبىرەك اتىپ، ۇرلەگەن شارداي د...
-
سلەنگ، ەرەجە، كەستەلەر، فيلمدەر مەن كىتاپتاردىڭ ءتىزىمى... بارلىعىن تابۋعا بولادى.
