InfoHub Logo

ەرتەدە كولدىڭ جاعالاۋىندا ءبىر وتباسى ءومىر ءسۇرىپتى. بۇل وتباسىندا بەس ۇل بالا بار ەكەن، ولاردىڭ تۇرلەرى بىر-بىرىنە قاتتى ۇقسايتىن، ءتىپتى، اكە-شەشەسى دە كەيدە اجىراتا الماي قالاتىن.

بەس اعايىندىلاردىڭ ءارقايسىسىنىڭ ەرەكشە قاسيەتى بار. ۇلكەن اعاسى ءبىر دەممەن ءبىر كولدىڭ سۋىن جۇتىپ الىپ، ونى قايتا قۇسىپ كولدى قالپىنا كەلتىرە الاتىن. ەكىنشى اعاسى وتتان قورىقپايتىن، ونى جالىنداپ تۇرعان وتتىڭ ورتاسىنا لاقتىرىپ جىبەرسەڭ دە، ەش جەرى كۇيمەي، امان شىعاتىن. ءۇشىنشى اعاسىنىڭ اياعى ادام ايتسا نانعىسىز ۇزىندىققا ۇزارادى. قانشالىقتى الىس جول بولسا دا ءبىر-اق قاداممەن اتتاپ جەتە الاتىن. ءتورتىنشىسى بولسا، بولاتتان جاسالعانداي شىمىر ەدى، وعان قىلىش تا، بالتا دا وتپەيتىن. ال ەڭ كىشىسى بارلىق جۇگىرگەن اڭ، ۇشقان قۇستىڭ ءتىلىڭ بىلەتىن. ورماننىڭ بارلىق جەرىندە ونىڭ دوستارى بار ەدى.

بەس اعايىندى بىرىنەن ءبىرى كۇشتى، كۇندە اتا-اناسىنا كوپ ىستەۋگە كومەكتەسەدى. ۇلكەنى بالىق اۋلايدى، ەكىنشىسى تاماق پىسىرەدى، ءۇشىنشىسى مەن ءتورتىنشىسى شارۋاشىلىقپەن اينالىسادى، بەسىنشىسى مال باعاتىن. ولاردىڭ وتباسى وتە باقىتتى ءومىر ءسۇرىپ جاتتى.

ءبىر كۇنى بەس اعايىندىلار تۇرىپ جاتقان جەرگە ءبىر ايلاكەر شال پاتىشا پايدا بولادى. ول الەمدە جوق ءدامدى تاماقتى جەپ كورگىسى كەلەدى. ول قول استىنداعىلاردىڭ بارلىعىمەن بىرگە اڭ اۋلاۋعا شىعادى.

كەنجە جىگىت تاۋدا مال باعىپ ءجۇرىپ، شالدىڭ ءبىر ەشكىنى كوزدەپ تۇرعانىن كورىپ، دەرەۋ ەشكى تىلىندە: «قاش»، — دەپ ايعاي سالادى. ەشكى مۇنى ەستي سالا تاۋدان تومەن قاراي قاشا جونەلەدى.

قاسىنداعى اعاشتىڭ باسىنداعى ءبىر ادەمى قۇستى شالدىڭ كوزدەپ تۇرعانىن كورىپ، تاعى دا كەنجە جىگىت قۇستىڭ تىلىندە: «ۇش، كەت»، — دەيدى. قۇس ۇشا جونەلەدى. شال تاعى دا ولجاسىز قالادى.

وسى ۋاقىتتا ورماننان ءبىر كەربەز ەلىك شىعادى، بەسىنشى جىگىت ەلىكتىڭ تىلىندە: «بۇل جەردە اڭشى بار، تەزىرەك قاش»، — دەيدى. ەلىك لەزدە قاشا جونەلەدى.

وسىلايشا ارى-بەرى ءجۇرىپ ابدەن شارشاعان شال پاتىشا، ەشقانداي جانۋاردى ۇستاي المايدى. اشۋعا بۋلىعىپ، قول استىنداعىلارىنا بەسىنشى جىگىتتى ۇستاپ الىپ، ارىستانعا جەگىزۋدى بۇيىرادى.

بەسىنشى جىگىت اش ارىستاننىڭ اپانىنا كىرەدى. ول ارىستاننىڭ ءتىلىن ۇعاتىندىقتان قورىقپايدى. ول ارىستانعا ورمان جانۋارلارىن قورعاۋ ءۇشىن قولعا تۇسكەنىن ايتادى. ارىستان مۇنى ەستىپ: «سەن راسىندا دا جانۋارلاردىڭ دوسىسىڭ، مەن سەنى قالاي بولعان كۇندە دە جەمەيمىن»، — دەيدى.

كەنجە جىگىتتىڭ ارىستانمەن دوس بولىپ العانىن كورىپ، شال اشۋلانىپ قول استىنداعىلارىنا ونى اباقتىعا جابۋدى ءامىر ەتىپ: «ەرتەڭ باسىن شابامىز»، — دەيدى.

ءىنىسىنىڭ باسىن كەسەيىن دەپ جاتقانىن ەستىگەن ءتورتىنشى جىگىت تۇندە اباقتىعا كەلىپ، ءىنىسىن ۇيگە قايتارادى دا ءوزى سول جەردە قالىپ قويادى. سەبەبى ولاردىڭ تۇرلەرى وتە ۇقساس بولاتىن.

ەكىنشى كۇنى تاڭەرتەڭ ءتورتىنشى ۇلدى باسىڭ كەسۋ ءۇشىن الاڭعا الىپ كەلەدى. باسكەسەر ونشاقتى رەت بالتامەن ونىڭ باسىن شاپسا دا، وعان تۇك بولمايدى. ءتورتىنشى ۇل قايتاقايتا قارق-قارق كۇلىپ: «قانداي جاقسى، بالتامەن قىشىعان جەرىمدى قاسىدىڭدار-عوي»، — دەيدى.

شال مۇنى ەستىپ اشۋلانادى دا: «مۇنى تاۋدان تومەن لاقتىرىپ ولتىرىڭدەر»، — دەيدى.

كەشكە اعايىندىلاردىڭ ءۇشىنشىسى كەلىپ، ءىنىسىنىڭ ورنىنا وتىرادى.

تاڭ اتىسىمەن شال ءوز ادامىن ەرتىپ كەلىپ، اعايىندىلاردىڭ ءۇشىنشىسىن تاۋدان لاقتىرىپ جىبەرەدى. سول ساتتە ءۇشىنشى اعايىندىنىڭ اياعى ۇزارىپ، تاۋدىڭ ەتەگىنە ءبىراق تۇسەدى.

شال اشۋلانىپ: «سەنى ورتەپ جىبەرەمىن»، — دەيدى.

كەزەك ەندى وتتان قورىقپايتىن اعايىندىعا جەتەدى.

شال ەشنارسەدەن حابارى جوق، ۇلكەن وت جاعىپ اعايىندىلاردىڭ ەكىنشىسىن وتقا سالادى.

ءبىراز ۋاقىت وتكەن سوڭ، شال ماساتتانىپ كۇلە بەرگەندە اعايىندىلاردىڭ ەكىنشىسى وتتان امان-ەسەن شىعىپ كەلە جاتقانىن كورەدى. شال ويلانىپ، وتتان قورىقپايتىن ادام مىندەتتى تۇردە سۋدان قورقادى دەپ ونى سۋعا باتىرىپ ولتىرمەك بولادى.

كەزەك ەڭ ۇلكەنىنە دە جەتتى. ەكىنشى كۇنى شال اعايىندىلاردىڭ ۇلكەنىن قايىققا وتىرعىزىپ، كولدىڭ ورتاسىنا الىپ كەلىپ، سۋعا لاقتىرىپ جىبەرەدى.

اعايىندىلاردىڭ ۇلكەنى سۋدىڭ تۇبىنە جەتىپ اسپاي-ساسپاي سۋدى اقىرىنداپ جۇتا باستايدى. از ۋاقىت ىشىندە كول سۋىن ءىشىپ قويادى، سول كەزدە شالدىڭ قايىعى توڭكەرىلىپ قالادى. اعايىندىلاردىڭ ۇلكەنى جاعادا تۇرىپ سۋدى قايتا قۇسادى، كوپ ۇزاماي بارلىق زۇلىمدار سۋعا باتىپ ولەدى.

بەس اعايىندى وسىلايشا وزدەرىنىڭ اقىل-ايلالارىمەن زۇلىم شالدى جەڭىپ، قاھارماندارعا اينالىپتى.

---