InfoHub Logo

جەر مەن كوكتىڭ ورتاسى اشىلا قويماعان، قارا تۇنەككە ورانعان عالام باعزى ءبىر زاماندا جۇمىرتقا ىسپەتتەس بولىپتى-مىس. وسى ءبىر جۇمىرتقانىڭ ىشىندە پان گۋ ەسىمدى جىگىت شىرت ۇيقىدا بولىپتى. ول جۇمىرتقا ىشىندە ۇيىقتاعان سايىن ءوسىپ، وسكەن سايىن ۇلكەن كۇش يەسىنە اينالادى. اڭىز بويىنشا، ول جۇڭگو ۇلتىنىڭ ءتۇپ اتاسى. پان گۋ ون سەگىز مىڭ جىل شىرت ۇيقىدا بولادى. ءبىر كۇنى ول كەنەتتەن ويانسا، جان جاعى قارا تۇنەك. سول ساتتە ول قولىنا بالتا الىپ، قارا تۇنەكتى بار كۇشىمەن قاق بولەدى. وسى قاتتى داۋىستان جۇمىرتقا ەكى بولىككە بولىنەدى. جەڭىل ءارى تازا زاتتاردىڭ بارلىعى كوككە كوتەرىلىپ، اسپان الەمىن قۇراسا، اۋىر ءارى لاس زاتتار اقىرىنداپ تومەنگە ءتۇسىپ، قارا جەردىڭ نەگىزىن قۇرايدى. وسىلايشا جەر مەن كوك ەكىگە بولىنگەن دەسەدى.

پان گۋ جەر مەن كوكتىڭ قايتا بىرىگىپ كەتۋىن الدىن الۋ ءۇشىن جەلكەسىمەن اسپاندى، اياعىمەن جەردى، بار كۇشىمەن ەكى ورتانى دىڭگەك سىندى ۇستاپ تۇردى. ال ۋاقىت ءوز اعىمىمەن وتە بەردى. اسپان كۇن وتكەن سايىن وسە بەردى، ال قارا جەر كۇن وتكەن سايىن قالىڭداي ءتۇستى. ال پان گۋ شە، ول دا كۇننەن كۇنگە ءوسىپ، وسىلايشا ارادا ون سەگىز مىڭ جىل ۋاقىت وتە شىقتى، پان گۋدىڭ بويى 90مىڭ لي بيىكتىككە جەتتى.

ارادا تالاي جىلدار زىمىراپ تاعى وتە شىقتى، اسپان مەن جەر ءوز ورنىنا قاتىپ قالدى، ەندىگى جەردە ولاردىڭ اراسىنىڭ قايتا قوسىلىپ كەتۋ ءقاۋپى جويىلدى. بار كۇش-جىگەرىمەن، جالعىزدىقپەن وسىنشا جىل تىك تۇرىپ قىزمەت ەتكەن پان گۋ اقىر اياعىندا بار كۇشىن سارپ ەتىپ مەرت بولدى.

ونىڭ قازاسىنان كەيىن سول كوزى كۇنگە اينالدى، وڭ كوزى جارقىراعان التىن ايعا اينالسا، اياق قولى الەمنىڭ ءتورت بۇرىشىنا نەگىز بولدى، دەنەسى تاۋلارعا، دەمى جەل مەن بۇلتتارعا، بويىنداعى قانى وزەندەرگە، بۇلشىق ەتتەرى جەرگە اينالدى، شاشتارى اسپانداعى جۇلدىز بولسا، تىستەرى مەن سۇيەكتەرى التىنعا جانە تاستارعا اينالدى، دەنەسىنىڭ قىلدارى اجارلى وسىمدىكتەر الەمىنە ايالدى، ال ونىڭ دەنەسىنەن بولىنەتىن تەر جاڭبىر سۋى مەن شىققا اينالدى.

وسىلايشا، الەمنىڭ جاراتىلۋ جولىندا پان گۋ اياماي تەر توگىپ، ءوزىن قۇربان ەتتى.

---