InfoHub Logo

س.بەيسەتايەۆ 1922 جىلى تۋعان. اياكوز قالاسى «استىق دايىنداۋ» بولىمىندە ۇزاق جىلدار بويى جۇمىس ىستەپ، قۇرمەتتى دەمالىسقا شىققان ەكەن. ءسوز ءقادىرىن بىلەتىن سەيىتقازى اۋەلگى ءسوزىن:

— جاقسى عوي، قۇدا، كەلگەنىڭ،
ەل ارالاپ جۇرگەنىڭ.
ءبىلىمدىنىڭ اۋزىنان
قازىنا تەرىپ جۇرگەنىڭ.
ءار ۇلتتا اقىن كوپ،
ايتادى عوي بىلگەنىن، —

دەپ ولەڭدەتە باستادى.

— اباي ءارى دوس، ءارى اتقوسشىسى ەربولدى، — دەپ جالعاستىردى اڭگىمەسىن سەيىتقازى، — كەرەي جاققا ەل شارۋاسىمەن جۇمسايدى. ءىسىن تىندىرىپ، قايتارعا بەتتەگەن ەربول وگىز ءمىنىپ، قويىن ەرتە ورگىزىپ بارا جاتقان توقسانداعى كارياعا كەز بولىپ، سالەم بەرەدى. ءجون سۇراسادى.

— سىزدەن ەستىپ ەدىم دەپ ەلگە ايتىپ جۇرەيىن، ەستە قالاتىن ءبىر ەستى ءسوز ايتپاس پا ەكەنسىز؟ — دەپ تاقاۋىرلاي تۇسەدى ەربول كارياعا. قويى ۇزاپ، الاڭداپ تۇرعان كاريا:

— جاسىنان بايدىڭ قويىن باققان مەندەي كەدەيدەن نە ءسوز شىعۋشى ەدى، قاراعىم. قويىم كەتىپ قالادى، بوگەمە، —  دەپ كولدەنەڭ كەز بولعاننان قۇتىلعىسى كەلەدى. ەربول ءتىپتى تاقىمداپ بولماعان سوڭ كاريا:

— «وگىزگە مىنگەن كىسىنىڭ ەكى وكشەسى ي بولادى، جامان بالا ءوز تورىندە جاتىپ ءوز ۇيىنە بي بولادى»، — دەپ وگىزىن تەبىنىپ، قويىنا قاراي بەتتەي بەرىپتى.

ەربول ۇيىنە كەلسە، بالاسى مالعا شىقپاي، ەكى قولىن توبەسىنە ايقاستىرا توردە شالجيىپ جاتقان ەكەن. بالاسىنىڭ مىنا قىلىعىنا اشۋلانعان ەربولدىڭ ويىنا كاريانىڭ ءسوزى تۇسە كەتىپ، بالاسىنا:

— شالجيىپ جاتىسىن! مال قايدا؟ تۇزدە قوي باعىپ جۇرگەن كەرەيدىڭ ءبىر شالى، سەنىڭ ۇيدە ءبۇيتىپ جاتقانىڭدى قايدان ءبىلدى ەكەن؟ — دەپتى قاتۋلانا ءتۇسىپ. قوي باققان كاريانىڭ ەكى-اق اۋىز ءسوزىنىڭ اسەرى ەربولعا قانداي بوپ تيگەنى وقىرمانعا وي سالاتىنداي.

---