وقۋشىلار 6 ساۋىردەن باستاپ قالاي وقيدى – ءمينيستردىڭ جاۋابى
قازاقستاندا مەكتەپ وقۋشىلارىنا ساباق تەلەارنالار ارقىلى وتكىزىلۋى مۇمكىن. بۇل جايىندا ق ر ءبىلىم جانە عىلىم ءمينيسترى اسحات ايماعامبەتوۆ Facebook-پاراقشاسىندا جازدى.
«ءبىز ارنايى جۇمىس توبىن قۇردىق. ونىڭ قۇرامىنا قاشىقتان ءبىلىم بەرۋ سالاسىندا جۇمىس ىستەيتىن «Bilimland»، «DDaryn.online»، «كۇندەلىك»، «Univer»، «Platonus»، «EduPage»، بيل، «BTS education»، «U-study» جانە «AGS» سىندى ۇيىمداردىڭ وكىلدەرى جانە پەداگوگتەر، ادىسكەرلەر، مەكتەپ ديرەكتورلارى، ديرەكتورلاردىڭ وقۋ ءىسى جونىندەگى ورىنباسارلارى جانە جوو پرورەكتورلارى ەندى»، - دەپ اتاپ وتەدى مينيستر.
ونىڭ اتاپ وتۋىنشە، بۇل رەتتە جۇمىس بىرنەشە باعىت بويىنشا جۇرگىزىلۋدە. ماسەلەن، تاپسىرمالاردى بەرۋ، ولاردىڭ ورىندالۋىن تەكسەرۋ، باعالاۋ جانە كەرى بايلانىستى قامتاماسىز ەتەتىن اقپاراتتىق جۇيەلەردى ەنگىزۋ قاراستىرىلىپ جاتىر. ءبىلىم الۋشىلار بەينە-ساباقتارعا قاتىسىپ، تاپسىرمالار الىپ، قاجەت بولعان جاعدايدا پەداگوگتەردىڭ ءوز سىنىبىمەن ونلاين-تالقىلاۋ، باعالاۋ بويىنشا نەمەسە ۆيدەوستريمينگ سەرۆيستەرىن پايدالانا الۋىن قامتاماسىز ەتەتىن جۇيەلەردى ىسكە قوسۋ دا كوزدەلگەن.
«تەلەارنالار ارقىلى ساباق وتكىزۋگە دايىندالۋدامىز. وندا بەينە-ساباقتار ساباق كەستەسىنە ساي كورسەتىلەتىن بولادى. بۇل تەتىك، اسىرەسە، ينتەرنەت قۋاتى ءالسىز جانە قاجەتتى قۇرال-جابدىقتارعا قاتىستى قيىندىقتارى بار اۋىلدىق ءبىلىم بەرۋ ۇيىمدارى ءۇشىن وزەكتى. ءبىز ءۇشىن بارلىق ساباق ورتا ءبىلىم بەرۋدىڭ مەملەكەتتىك جالپىعا مىندەتتى ستاندارتىنا ساي وقۋ باعدارلاماسى بويىنشا، ساباق كەستەسىنە سايكەس، سيفرلىق ءبىلىم بەرۋ رەسۋرستارى بويىنشا ادىستەمەلىك قولداۋمەن جانە مۋلتيمەديالىق ماتەريالدارمەن قامتاماسىز ەتىلىپ، ۇستازدار ءۇشىن الدىن الا ازىرلەنگەن جوسپار بويىنشا جۇرگىزىلگەنى ماڭىزدى. باستىسى، ءبىلىم الۋ تەتىگى ساپاعا اسەر ەتپەۋى قاجەت»، - دەدى ول.
مينيستر پەداگوگتەر مەن وقۋشىلاردىڭ سيفرلىق ساۋاتتىلىعىن دامىتۋ قاجەت ەكەندىگى دە باستى نازاردا تۇرعانىن ايتادى. ولار ءۇشىن ارنايى كۋرستار وتكىزىلىپ، نۇسقاۋلىقتار ازىرلەنەتىن بولادى. ءقازىردىڭ وزىندە مۇعالىمدەر ءۇشىن سيفرلىق رەسۋرستاردى پايدالانۋ بويىنشا ءبىراز ۆيدەودارىستەر ازىرلەندى. ينكليۋزيۆتىك ءبىلىم بەرۋ، جاڭا تەحنولوگيالاردىڭ قولجەتىمدىلىگىنە قاتىستى پرينسيپتەر ەسكەرىلەتىن بولادى.
«ينتەرنەت پروۆايدەرلەرى مەن بايلانىس وپەراتورلارى بويىنشا سدياوم-مەن بىرلەسىپ جۇمىس جۇرگىزۋدەمىز. وسى كەزەڭدە ءبىلىم بەرۋ رەسۋرستارىن پايدالانۋ بارىسىندا ترافيك ەسەپتەلمەگەنى دۇرىس. وسى ماسەلە بويىنشا پرەمەر-مينيستر تاراپىنان ءتيىستى تاپسىرما بەرىلدى جانە قولداۋ كورسەتىلدى. كوپتەگەن ءىرى پلاتفورمالار ءوز قىزمەتتەرىن تەگىن ۇسىنىپ جاتىر. بۇل جۇمىسىمىزدى ءبىرشاما جەڭىلدەتتى. قازىرگى ۋاقىتتا «Zoom» ستريمينگتىك سەرۆيسى مەن «Coursera» دەپ اتالاتىن ءىرى پلاتفورمالاردىڭ ءبىرى تەگىن قىزمەت كورسەتۋدە. سونداي-اق «Google Classroom»، «Hangout»، «كۇندەلىك»، «Moodle» جۇيەلەرىن تەگىن قولدانۋعا بولادى. سونىمەن قاتار «Bilimland» پلاتفورماسى ءوزىنىڭ 40 مىڭنان استام كونتەنتىن تەگىن ۇسىندى»، - دەدى اسحات ايماعامبەتوۆ.
ونىڭ اتاپ وتۋىنشە، كارقىندى جۇمىس جۇرگىزىلۋدە.
«كەيدە ءارتۇرلى تاسىلدەر مەن شەشىمدەردى قابىلداۋدى قاجەت ەتەدى. ءبىز 5 ساۋىرگە دەيىن اقپاراتتىق جۇيەلەردى دايىنداپ ۇلگەرۋىمىز كەرەك. ولاردى ءتيىستى كونتەنتپەن قامتاماسىز ەتىپ، سىناپ كورۋىمىز قاجەت. سونداي-اق، 6 ساۋىردەن باستاپ قاجەت بولعان جاعدايدا جاڭا فورماتتا ساباق الۋعا بەيىمدەۋگە ءتيىسپىز. وقۋشىلارمەن، ستۋدەنتتەرمەن، اتا-انالارمەن جانە پەداگوگتەرمەن بىرىگىپ قاشىقتان وقىتۋدىڭ ساپالى جۇيەسىن قۇرا الاتىندىعىمىزعا سەنىمدىمىن. ەڭ باستىسى، ءبىز ءاردايىم كەرى بايلانىستى، ۇسىنىستار مەن تىڭ يدەيالاردى قۋانا قابىلداۋعا دايىنبىز»، - دەدى ول.
You Might Also Like
-
ءحىح عاسىردىڭ اياق شەنى. ءۋايىستىڭ ءۇيلى-باراندى بولعان، جيىرما بەستەردەن جالىندى شاعى ەكەن دە، سەرىكبايدىڭ الپىستىاۋقىمداعان، ايلىق-داۋلەتى سارقىلماعىن كەزى ەكەن. سەرىكباي اقىن — سارانىڭ ءبىرجان ...
-
س.بەيسەتايەۆ 1922 جىلى تۋعان. اياكوز قالاسى «استىق دايىنداۋ» بولىمىندە ۇزاق جىلدار بويى جۇمىس ىستەپ، قۇرمەتتى دەمالىسقا شىققان ەكەن. ءسوز ءقادىرىن بىلەتىن سەيىتقازى اۋەلگى ءسوزىن:
