InfoHub Logo

قازاقستاندا جوعارى وقۋ ورنىنا ءتۇسۋ ءۇشىن ءبىلىم گرانتتارى يەگەرلەرىنىڭ ءتىزىمى بۇقارالىق اقپارات قۇرالدارىندا 12 تامىزعا دەيىن جاريالانادى. بۇنداي شەشىمدى بۇگىن استانادا ءبىلىم گرانتتارىن ءبولۋ جونىندەگى رەسپۋبليكالىق كونكۋرستىق كوميسسيانىڭ مۇشەلەرى قابىلدادى.

ق ر ءبىلىم جانە عىلىم ءمينيسترى ەرلان ساعادييەۆتىڭ سوزىنە قاراعاندا، بيىل 31 702 گرانت ءبولىندى، ونىڭ ىشىندە 2 950 ورىن جوعارى وقۋ ورىندارىنىڭ دايىندىق بولىمدەرىندە وقۋعا، 28 752 گرانت 1 كۋرسقا قابىلداۋعا قاراستىرىلدى.

اتاپ ايتقاندا، اعىمداعى جىلى مەملەكەتتىك تاپسىرىستى قالىپتاستىرۋ ەلدىڭ الەۋمەتتىك-ەكونوميكالىق دامۋ باسىمدىقتارىنا نەگىزدەلدى. وسى ورايدا اتالعان باسىمدىقتاردى ەسكەرە وتىرىپ، 12 593 گرانت تەحنيكالىق جانە تەحنولوگيالىق ماماندىقتارعا ەسكەرىلگەن. سونىمەن قاتار، 5 000 گرانت - پەداگوگيكالىق، 2 690 گرانت  - اۋىل شارۋاشىلىعى مەن ۆەتەريناريا ماماندىقتارىنا، 3 000 گرانت  - مەديسينالىق سالاعا ماماندىقتارعا ءبولىنىپ وتىر.

مينيسترلىك مالىمەتىنشە، كونكۋرستىق نەگىزدە مەملەكەتتىك تاپسىرىس بەرىلەتىن جوو-لار ءتىزىمى ايقىندالدى. ەلىمىزدىڭ 112 ازاماتتىق جوعارى وقۋ ورىندارى اراسىندا  وقۋ گرانتتارى 87 جوو-عا ءبولىندى.

«اعىمدىق جىلعى وقۋ گرانتتارىن الۋ كونكۋرسىنا 59 677 ادام قاتىسۋدا، ولاردىڭ ىشىندە 47 342ء-سى - قازاق تىلىندە ءبىلىم الۋعا (80 پايىزعا جۋىعى)، 12 335 تالاپكەر ورىس تىلىندە وقۋعا تاپسىردى»، - دەدى مينيستر.

ە. ساعادييەۆ «ماڭگىلىك ەل جاستارى - يندۋسترياعا!» جوباسى اياسىنداعى كۆوتا بويىنشا وتكىزىلگەن كونكۋرسقا 9 797 ادام قاتىسىپ وتىرعاندىعىن جەتكىزدى.

---