InfoHub Logo

2016 جىلعى وقۋ گرانتتارى ءۇشىن تالاپكەرلەر كوبىرەك تاپسىرعان ماماندىقتاردىڭ اراسىندا گەوگرافيا جانە العاشقى اسكەري دايىندىق مۇعالىمدىگى تانىمال بولدى. بۇل تۋرالى بۇگىن استانا ءبىلىم گرانتتارىن ءبولۋ جونىندەگى رەسپۋبليكالىق كونكۋرستىق كوميسسيانىڭ وتىرىسىندا ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى مىندەتىن اتقارۋشى گۇلزات كوبەنوۆا ءمالىم ەتتى.

اتاپ ايتقاندا، اعىمداعى جىلى  97 مىڭ تالاپكەردىڭ ىشىندە 60 مىڭعا جۋىعى وقۋ گرانتتارىن الۋ كونكۋرسىنا قاتىسۋدا. جالپى، 32 مىڭعا تارتا گرانت ءبولىنىپ وتىر.

«قازاق تىلىندە «گەوگرافيا» باعىتىندا ءبىلىم الۋعا كونكۋرس ءبىر ورىنعا 28 ادامنان، «العاشقى اسكەري دايىندىق» - 22 ادام، «مۋزىكالىق ءبىلىم» - 18، «بەينەلەۋ ونەرى» - 14، «پەداگوگيكا جانە پسيحولوگيا» - 12 ادام ۇمىتكەر. ەگەر دە ورىس بولىمدەرىنە توقتالاتىن بولساق، وندا «گەوگرافيا» ماماندىعى بويىنشا ءبىر ورىنعا 18 ادام ءۇمىتتى، «العاشقى اسكەري دايىندىق» باعىتىندا - 15، «بەينەلەۋ ونەرى» - 11. بۇل رەتتە مۇعالىمدىك كاسىپ مەكتەپ جانە  كوللەدج تۇلەكتەرى اراسىندا تانىمال بولىپ وتىرعاندىعىن بايقالۋدا»، - دەدى ول.

سونىمەن قاتار گ. كوبەنوۆا بيىل تەحنيكالىق ماماندىقتارعا ستۋدەنتتەر اراسىندا ەلەۋلى كونكۋرس بايقالىپ وتىرعاندىعىن اتاپ ءوتتى. قازاق بولىمدەرىندە «گەودەزيا جانە كارتوگرافيا» (ءبىر ورىنعا 7-دەن استام ۇمىتكەر)، «اقپاراتتىق جۇيەلەر» (تورتتەن استام)، «ەلەكتروەنەرگەتيكا» (تورتتەن استام) باعىتتارىندا كونكۋرس كوبىرەك.

ورىس ءتىلى بولىمدەرىندە «گەودەزيا جانە كارتوگرافيا» بويىنشا ءبىر ورىنعا التىدان استام ۇمىتكەر، ال «ەلەكتروەنەرگەتيكادا» - تورتتەن اسىپ وتىر.

وسى ارقىلى اتالعان ماماندىقتارعا كونكۋرس ورتاشا ەسەپپەن العاندا ءبىر ورىنعا 2-7 ادامعا ءۇمىتتى بولعان.

مۇنىمەن قوسا، اۋىل شارۋاشىلىعى سالاسىنداعى  ماماندىقتارعا دا جوعارى كونكۋرستىق دەڭگەي تىركەلگەن ەكەن.  بۇدان بولەك، «ستوماتولوگيا» باعىتىندا ءبىلىم الۋعا نيەتتىلەر كوپ تىركەلدى. سونداي-اق ورىس بولىمىندە «حالىقارالىق قاتىناستار» بويىنشا ءبىر ورىنعا - 22 ادام، «قۇقىقتانۋدا» -12 ادام ءۇمىتتى.

«بيىل مەملەكەتتىك تاپسىرىستى قالىپتاستىرۋ ەلدىڭ الەۋمەتتىك-ەكونوميكالىق دامۋ باسىمدىقتارىنا نەگىزدەلدى. وسى ورايدا اتالعان باسىمدىقتاردى ەسكەرە وتىرىپ، 12 593 گرانت تەحنيكالىق جانە تەحنولوگيالىق ماماندىقتارعا ەسكەرىلگەن. سونىمەن قاتار، 5 000 گرانت - پەداگوگيكالىق، 2 690 گرانت  - اۋىل شارۋاشىلىعى مەن ۆەتەريناريا ماماندىقتارىنا، 3 000 گرانت  - مەديسينالىق سالاعا ماماندىقتارعا ءبولىنىپ وتىر»، - دەدى ق ر ءبىلىم جانە عىلىم ءمينيسترى ەرلان ساعادييەۆ.

---