InfoHub Logo

«جاس الاش» گازەتىنىڭ باس رەداكتورى رىسبەك سارسەنباي مەن «تريبۋنا» گازەتىنىڭ باس رەداكتورى جانبولات ماماي ءبىلىم جانە عىلىم ءمينيسترى ەرلان ساعادييەۆتى الماتىدا وتكىزىلەتىن باسقوسۋعا شاقىرۋ حاتىن جىبەرگەن بولاتىن.  

22 قازان كۇنىنە جوسپارلانعان بۇل جيىندا رەسپۋبليكامىزدىڭ مەكتەپتەرىندە وقىتۋدىڭ ءۇش تىلدە جۇرگىزىلۋ ماسەلەسى تالقىلانباق.

ءبىلىم مينيسترلىگى حاتقا جاۋاپتى فەيسبۋكتەگى پاراقشاسى ارقىلى جاۋاپ بەردى.

«قۇرمەتتى رىسبەك سارسەنباي ۇلى، جانبولات ماماي!

ەڭ الدىمەن، الماتىدا ۇيىمداستىرىپ جاتقان جيىندارىڭىزعا ق ر ءبىلىم جانە عىلىم ءمينيسترى ەرلان ساعادييەۆتى شاقىرعان حاتىڭىزدىڭ نازارسىز قالماعانىن جەتكىزگىمىز كەلەدى.

بۇگىندەرى ءبىزدىڭ تاۋەلسىز ەلىمىزدە قازاق ءتىلىن - مەملەكەتتىك ءتىلدى دامىتۋ ماسەلەسى كىم-كىمدى دە بەيجاي قالدىرماسى انىق. سىزدەردىڭ تاراپتارىڭىزدان وسى باعىتتا ۇنەمى كوتەرىلىپ جۇرگەن ماسەلەلەر جايىندا حاباردارمىز. ءبىلىم سالاسىنىڭ جاعدايىنا بايلانىستى ءوز كوزقاراستارىڭىزدى ءبىلدىرىپ، اشىق جانە جاريالى تۇردە الاڭداۋشىلىق بىلدىرگەنىڭىز - قۇپتارلىق جايت دەپ بىلەمىز. دەگەنمەن، مەملەكەت اتىنان ءبىلىم جانە عىلىم سالاسىن دامىتۋ مىندەتى جۇكتەلگەن مينيسترلىك رەتىندە سىزدەردىڭ كەلتىرىپ جۇرگەن كەيبىر دايەكسىز پىكىرلەرىڭىزبەن كەلىسە المايمىز.

سوندىقتان دا، ق ر ءبىلىم جانە عىلىم مينيسترلىگىنىڭ سىزدەرمەن پىكىر الماسىپ، بۇگىنگى كۇنى ءبىلىم سالاسىندا وتكىزىلىپ جاتقان رەفورما مەن ونىڭ اياسىندا ەنگىزىلىپ جاتقان كوپتەگەن جاڭاشىل ۇدەرىستەر جونىندە تولىققاندى اقپارات بەرىپ، مىندەت-ماقساتتارىن تۇسىندىرۋگە مۇددەلى. 
وسى تۇستا تاعى ءبىر ايتا كەتەرلىك جايت بار. 22 قازان كۇنى ق ر ءبىلىم جانە عىلىم ءمينيسترى ەرلان ساعادييەۆتىڭ قىزمەتتىك كۇنتىزبەسىندە ءبىرقاتار مەملەكەتتىك ماڭىزى بار ءىس-شاراعا قاتىسۋ مىندەتى جوسپارلانىپ قويىلعان. ولاردىڭ ءبارى دە استانا قالاسىندا وتەتىندىكتەن، بەلگىلەنگەن كۇنى ءمينيستردىڭ الماتىداعى كەزدەسۋگە قاتىسۋ مۇمكىندىگى بولمايتىنىنا تۇسىنىستىكپەن قارايسىزدار، دەپ ۇمىتتەنەمىز.

ەسەسىنە، ارىپتەستەرىڭىزبەن بىرگە تالقىلاپ، ءبىر شەشىمگە كەلەر دەگەن ويمەن، مينيسترلىك تاراپىنان سىزدەرگە ەكى ۇسىنىس جاسالادى:

1. سىزدەر قارسى بولماساڭىزدار، الماتىدا وتەتىن شاراعا مەملەكەتتىڭ ءبىلىم سالاسىن دامىتۋ ساياساتىن قولداپ، رەفورمالاردى ىسكە اسىرۋعا بەلسەنە اتسالىسىپ جۇرگەن ءبىر توپ ماماندار، لاۋازىم يەلەرى جانە ازاماتتىق قوعام وكىلدەرى قاتىسۋعا دايىن.

2. 26 قازان كۇنى استانادا ءبىلىم ۇيىمدارىندا قازاق ءتىلىن وقىتۋ، ونىڭ قولدانۋ اياسىن بارىنشا كەڭەيتۋ ارقىلى مەملەكەتتىك ءتىلدى دامىتۋ ماسەلەلەرى تالقىلاناتىن دوڭگەلەك ۇستەل وتىرىسى وتكىزىلمەك. سىزدەردى وسى ءىس-شاراعا قاتىسۋعا شاقىرامىز.

ق ر ءبىلىم جانە عىلىم ءمينيسترى ە. ساعادييەۆ سىزدەرمەن اتالعان باسقوسۋ اياسىندا كەزدەسۋگە دايىن ەكەندىگىن جەتكىزەمىز.

قۇرمەتپەن، ءا. الىبەكوۆا، ق ر ءبىلىم جانە عىلىم مينيسترلىگىنىڭ باسپا ءسوز حاتشىسى»، - دەپ جازىلعان پاراقشادا.

---