InfoHub Logo

ديسپۋت جوعارى سىنىپتاردىڭ اراسىندا وتكەلى جاتىر ەدى. كەنەت اعايلارى سىنىپتاعى ەكى ۇلدى وسى وتكەلى جاتقان ديسپۋتقا دايىنداي باستادى. مۇنى جانە سىنىپتىڭ تاعى ءبىر ۇلىن. بۇلارعا قازاق ءتىلى مەن ادەبيەتىنەن ساباق بەرەتىن وسى اعايلارى بۇلاردىڭ 5"ا" سىنىبىنا جىلدىڭ باسىندا جەتەكشى بولىپ تاعايىندالعان ەدى. ەندى ءوزىنىڭ سىنىبىنىڭ ەكى ۇلىن جوعارى سىنىپتار اراسىندا وتكەلى جاتقان ديسپۋتقا قاتىستىرىپ كورمەك.

مادەنيەت ۇيىندە وتكەلى جاتقان ديسپۋتتىڭ جالپى تاقىرىبى "دوستىق دەگەنىمىز نە؟" دەپ اتالاتىن. ءىس-شارانى مەكتەپتىڭ اعا پيونەر ۆوجاتىيى ۇيىمداستىرىپ، وتكىزگەلى جاتىر ەدى. مەكتەپتەگى وسى اعا پيونەر ۆوجاتىيعا ۇلكەن باعا بەرىلەتىن.

اعا پيونەر ۆوجاتىيدىڭ درۋجينا جيىندارىنداعى ورنى دا وقۋشىلار ءۇشىن ەلەۋلى ەدى. مۇنداي درۋجينا جيىندارى وترياد سوۆەتى پرەدسەداتەلدەرىنىڭ راپورت تاپسىرۋىمەن باستالادى. راپورت درۋجينا سوۆەتىنىڭ پرەدسەداتەلىنە تاپسىرىلادى. ال درۋجينا سوۆەتىنىڭ پرەدسەداتەلى - جوعارى سىنىپتىڭ وقۋشى قىزى. ءوز راپورتىنىڭ ءماتىنى تومەندەگىشە بولىپ كەلەتىن:

جولداس درۋجينا سوۆەتىنىڭ پرەدسەداتەلى.
№3 مانشۇك مامەتوۆا اتىنداعى وترياد پيونەرلەرى درۋجينا جيىنىنا گالستۋك، زناچوكتەرىمەن دايىن.
راپورت بەرىلدى سۇيىكتى گالستۋككە.

وسى ءسات درۋجينا سوۆەتىنىڭ پرەدسەداتەلى "راپورت قابىلداندى" دەر ەدى.

بارلىق وترياد سوۆەتى پرەدسەداتەلدەرىنەن راپورت قابىلداپ العاننان كەيىن، درۋجينا سوۆەتىنىڭ پرەدسەداتەلى جيىنعا ءامىرلى ءۇن قاتادى: "درۋجينا، تۇزەلىڭدەر!"

سونان سوڭ درۋجينا سوۆەتىنىڭ پرەدسەداتەلى اعا پيونەر ۆوجاتىيعا ءوزىنىڭ راپورتىن تاپسىرادى:

جولداس اعا پيونەر ۆوجاتىي.
يۋريي الەكسەيەۆيچ گاگارين اتىنداعى درۋجينا پيونەرلەرى درۋجينا جيىنىنا گالستۋك، زناچوكتەرىمەن دايىن.
راپورت بەرىلدى سۇيىكتى گالستۋككە.

الاڭدى جاڭعىرىقتىرعان كەرنەيدىڭ ءۇنى، وعان قوسارلانا ىلەسكەن باراباننىڭ داۋسى، سونىمەن بىرگە الاڭعا تۋدىڭ اكەلىنۋى جيىننىڭ سالتاناتتى اجارىن كىرگىزە تۇسەر ەدى.

ديسپۋتقا وزىمەن بىرگە دايىندالىپ جۇرگەن ۇل بۇلارعا باستاۋىش سىنىپتا كەلىپ قوسىلعان. وزدەرى وزگە جاقتان كوشىپ كەلگەن ەدى. كەيىن قايتا كوشىپ كەتتى. بۇلارمەن بىرگە مەكتەپ بىتىرگەن جوق. قاعىلەز، پىسىق، كوزىندە وتى بار، ساباققا دا زەيىنسىز ەمەس. وسى بالا بىلتىر بۇلار 4-سىنىپ وقىپ جۇرگەندەرىندە مەكتەپتەگى سىيلى ۇستاز، وزدەرىنىڭ سول كەزدەگى سىنىپ جەتەكشىلەرىمەن 1 ءساۋىر كۇنىنە وراي، قالجىڭداسقانى بار. باسقا بالالاردىڭ بۇعان باتىلى بارا قويماس ەدى. 1 ءساۋىردى بالالار الداۋ كۇنى دەپ اتايتىن. مۇنى ۇلكەندەر دە بىلەدى.

الگى بالا دا سىنىپقا كەشىگىڭكىرەپ كەلدى دە، سىنىپقا جاڭا عانا كىرىپ، ماتەماتيكا ساباعىن باستاعالى جاتقان اپايعا: "اپاي، ءسىزدى ديرەكتور اعاي شاقىرىپ جاتىر"، - دەدى. اپاي سىنىپتان شىعىپ كەتتى دە، سونان سوڭ سىنىپقا قايتا كىرگەنىندە ءوزىنىڭ وقۋشىسىنا قاراپ كۇلىمسىرەپ "بۇگىن 1 ءساۋىر كۇنى ەكەن عوي" دەپ كۇلدى. اپاي ءبىراق بۇل ءۇشىن ءوزىنىڭ شاكىرتىنە رەنجىگەن جوق.

وسى 4-سىنىپتا سىنىپ جەتەكشى بولاتىن اپايلارى مەن 5-سىنىپتاعى سىنىپ جەتەكشى بولاتىن اعايلارى - ەكەۋى دە وسى مەكتەپتىڭ تاڭداۋلى ۇستازدارى ەدى. اپايلارى 5-سىنىپتا بۇلارعا: "مەن سەندەردىڭ سىنىپ جەتەكشىلىكتەرىڭدى ەندى اعايلارىڭا بەرىپ جاتىرمىن. ءبىراق بۇل مەن سەندەرگە سىنىپ جەتەكشى ەمەس دەگەن ءسوز ەمەس. مەن سەندەرگە ەكىنشى سىنىپ جەتەكشىلەرىڭ دە بولا بەرەمىن" دەگەن ەدى. راسىندا دا، بۇل ۇستاز سىنىپقا ۇنەمى جاقىن بولىپ، ءوزىنىڭ ۇستازدىق اقىل-كەڭەسىن بەرىپ وتىردى.

سىنىپ جەتەكشى اعايلارى ءوزىنىڭ شاكىرتى ەكى ۇلدى الدا بولعالى تۇرعان ديسپۋتقا ءبىرشاما كۇندەر بويى تياناقتى تۇردە دايىنداعان ەدى. ال ءبىر كۇنى بۇلار مادەنيەت ءۇيىنىڭ اۋلاسىندا وتىرىپ، باستالعالى جاتقان ديسپۋتقا ۇستازدارىمەن بىرگە دايىندىقتارىن تاعى دا ءبىر پىسىقتاپ وتىردى.

اعايلارىنىڭ ويى ءاۋ باستان سولاي بولدى ما، الدە جەمە-جەمگە كەلگەندە شەشىمىن وزگەرتىپ جىبەردى مە، ايتەۋىر، مادەنيەت ءۇيىنىڭ اۋلاسىندا وتىرعاندا بۇلارعا: "ەكەۋىڭنىڭ بىرەۋىڭ سويلەيسىڭدەر"، - دەدى. سونان سوڭ بۇعان قاراپ: "سەن سويلەيسىڭ"، - دەدى. وسى كەزدە 5-سىنىپتىڭ وقۋشىسى 5-سىنىپتىڭ وقۋشىسىن ارقادان قاعىپ دەم بەرگەنى قىزىق بولدى: "جاقسىلاپ سويلەپ شىق!"

مىنبەر ساحنا ۇستىنە قويىلعان ەدى. ال ساحنانىڭ الدىندا اعا پيونەر ۆوجاتىي وسى ديسپۋتتى جۇرگىزىپ تۇردى. اعايى بۇعان ايتقان: "قانداي نارسەگە بولماسىن، الدىن الا ازىرلىك جۇمىستارى جۇرگىزىلمەي بولمايدى. ءبىراق سەن ەشبىر ازىرلىكسىز، توسىننان شىعىپ سويلەپ جاتىرعان ادامداي سويلە. ءار ءسوزىڭ تابيعي شىعاتىن بولسىن".

مىنبەردە تۇرعان ادامعا زالداعى كوپشىلىكتىڭ تيگىزەر اسەرى كوپ بولادى. ءبىراق 5-سىنىپتىقتاردىڭ دا ارقا تۇسىندا تۇرعان كۇش بار ەدى. ول - سىنىپتىڭ جەتەكشىسى.

ورنىنا وتىرعاننان كەيىن 5-سىنىپتىڭ وقۋشىسى 5-سىنىپتىڭ وقۋشىسىنىڭ قولىن قىستى: "جاقسى سويلەدىڭ!"

وسى ءبىر جوعارى سىنىپتار اراسىنداعى ديسپۋتقا اعايلارى 5-سىنىپتا وقيتىن بۇلاردى اكەپ قاتىستىرىپ ءجۇرۋى وقۋشىلارىم سويلەپ ۇيرەنە بەرسىن دەگەن ۇستازدىق ماقساتىنان تۋعان ويى ەدى.

كەيىن مۇعالىمدىك جۇمىستى باستاعاندا ءوزى دە جوعارى سىنىپتىقتارعا "جاستار جانە مادەنيەت" دەگەن تاقىرىپتا ديسپۋت ۇيىمداستىردى. سەبەبى مەكتەپتەگى مۇنداي جيىنداردىڭ وقۋشىنىڭ كوپشىلىك الدىندا ويىن جەتكىزىپ، پىكىر ايتا ءبىلۋى ءۇشىن دە ماڭىزدىلىعى اسا زور ەدى.

---