InfoHub Logo

ءاربىر مەكتەپ ءبىتىرۋشى جاننىڭ شاكىرتتىك بەينەسىن ەشبىر فوتوسۋرەتشىنىڭ كومەگىنسىز-اق سانا تۇكپىرىندە ساقتاپ قالا الاتىن ءبىر جان بار بولسا، ول - ونىڭ ۇستازى. ۇستاز - ءوزىنىڭ ەسەيگەن شاكىرتىمەن جۇزدەسىپ تۇرىپ-اق وسى ءبىر ەرەسەك جاننىڭ سول كەزدەگى بالاڭ بەينەسىن، ونىڭ سىنىپتىڭ قاي بولىگىندە، قاي پارتادا وتىرعانىنا دەيىن كوز الدىنا ەلەستەتە الاتىن بىردەن-بىر جان. سەبەبى شاكىرت ۇستازدىڭ ءوزىنىڭ مەكتەپكە جاس مامان بولىپ كىرىپ، زەينەتكەرلىك دەمالىسقا شىققانعا دەيىنگى سانالى دا ماعىنالى عۇمىرىنىڭ ەرىكسىز ءبىر اجىراماس بولشەگى. وسى ءبىر بالاڭ بەينە ۇستازعا ەرەكشە تۇردە جاقىن. ۇستاز بۇگىنگى الدىندا وتىرعان شاكىرتتەرىمەن عانا ەمەس، وتكەن شاقتاعى شاكىرتتەرىنىڭ وسى ءبىر بەينەسىمەن دە ۇنەمى بەتپە-بەت كەلە الار ەدى. ناق وسىنى شاكىرتتىڭ ءوزى دە سەزەر، مۇمكىن ۇستازدىڭ شاكىرت جانىنا جاقىن بولۋىنىڭ دا ءبىر سەبەبى - ۇستازدىڭ تەك وزىنە ءبىلىم بەرۋشى جان عانا ەمەس، بالاڭ كۇنىنىڭ قاستەرلى كۋاگەرى ەكەندىگىندە دە بولۋى مۇمكىن. سەبەبى تۇلەك بولىپ كەتكەن جان دا ەرىكسىز بالا كۇنىنە ورالىپ وتىرادى.

بۇگىنگى تۇلەكتەر - كەشەگى شاكىرتتەر. ول كۇنى كەشە عانا ءوز مەكتەبىنىڭ ۇزدىگى، ونەرلىسى، ءبىلىم نەمەسە باسقا دا سالاداعى جارىستار مەن سايىستاردىڭ جەڭىمپازدارى اتاندى. ول وسى ساتتەردە ءوز اتا-اناسىنىڭ مارتەبەلى ماقتانىشى بولدى. وسىنىڭ بارلىعىندا دا ونىڭ جانىندا ۇستاز ءجۇردى. وسىنىڭ بارىندە دە ۇستازدىڭ قاجىر-قايراتى، ءبىلىمى مەن بىلىگى، ەڭبەگى مەن شاكىرت كوكىرەگىنە سەنىم مەن جىگەر تۋدىرۋشى كۇش-قۋاتى جاتتى. شاكىرت پەن ۇستازدىڭ بىرىگىپ ماقساتتى جولعا جاۋاپتى دايىندىقتارىنىڭ باستالۋى مەن ناقتى ناتيجەلەرگە قول جەتۋلەرىنىڭ اراسىندا ۇزاق جول جاتادى. بۇل جول شاكىرتتىڭ ۇستازعا دەگەن سەنىمى مەن ۇستازدىڭ ولشەۋسىز ەڭبەگىنەن قۇرالادى.

"ءسىز ماعان جاقسىلىق تۋرالى ايتىپ ەدىڭىز، ۇستاز". ەگەر ەسەيگەن شاكىرت وزىنە وسىلاي دەسە، ۇستاز مۇنىڭ ۇستازدىق عۇمىرىنىڭ ءدال قاي جىلى، قاي ساعاتىندا ايتىلعاندىعىن جادىنا الا الماۋى مۇمكىن. ءبىراق ماعىنا باسقادا - ۇستازدىڭ سىنىپتا تۇرىپ ايتقان جاقسىلىققا تولى مازمۇننان تۇراتىن جالعىز اۋىز ءسوزى شاكىرت ساناسىندا ساقتالىپ، كوكىرەگىندە قالىپ قويعاندىعىمەن قۇندى. ال ۇستاز الدىنان ۇستازدىق عۇمىرىندا ناق وسىنداي قانشاما شاكىرتتەر وتەتىندىگىن ەسكەرسەك، ۇستاز ەڭبەگىنىڭ ولشەۋسىز ۇعىمعا تولى ەكەندىگىن كورۋگە بولار ەدى. ىزگىلىك مازمۇنى شاكىرت ساناسىندا نەگە قايتا-قايتا جاڭعىرىقتى، مۇنىڭ سەبەبى سىنىپ سىرتىنداعى بەيتاراپ جانعا قاراعاندا شاكىرت الدىنداعى ۇستاز اۋزىنان شىققان ءبىر اۋىز ءسوزدىڭ اناعۇرلىم قۋاتتى، اناعۇرلىم سەنىمدى، اناعۇرلىم بولاشاققا جول سىلتەۋشى بولىپ ەستىلەتىندىگىندە. سەبەبى ۇستاز - ءوز كاسىبىنىڭ شەبەرى.

كەشە. بۇگىن. ەرتەڭ. ۇستازدىڭ جان-دۇنيەسى مەن تابيعاتىندا وسى ءبىر ۇعىمدار قانشالىقتى ايىرماشىلىق تۋدىرا الادى. ەش ۋاقىتتا وزگەرمەيتىن ءبىر ۇعىمدار بار. ول ۇستازدىڭ ءوز شاكىرتتەرىنە دەگەن ۇستازدىق جۇرەكتەن تۋاتىن سۇيىسپەنشىلىگى، ولاردىڭ ىسىنە باعا بەرۋدەگى ادىلەتتىلىگى، وقۋشىسىنىڭ بويىنداعى بىلىمىنە دەگەن قۇرمەتى. شىنايى شاكىرت بويىندا دا ەش ۋاقىتتا وزگەرمەيتىن ءبىر قاسيەت بار. ول ءوزىنىڭ ۇستازىنا دەگەن ادالدىعى. ءبىلىم بەرۋدىڭ تەحنولوگياسى جاڭعىرىعۋى، وقىتۋدىڭ ادىس-تاسىلدەرى جەتىلدىرىلۋى مۇمكىن. ءبىراق كەشەگە دە، بۇگىنگە دە، بولاشاققا دا ءتان ورتاق نارسە سول - ۇستازدىڭ وسى ءبىر ۇستازدىق بولمىستىڭ اياسىنان تابىلا بەرەتىندىگى. ۇستاز - ۇلتقا قىزمەت ەتۋشى. ساليقالى شاكىرت تاربيەلەۋشى. تاعىلىمدى ەڭبەك تۋدىرۋشى. ازات ويدىڭ يەسى. ول - ءوز قوعامىنىڭ زيالى جانى. بۇگىنگىنىڭ دە، بولاشاقتىڭ دا ۇستازىنىڭ جان-دۇنيەسىندە وسى ءبىر بولمىس جاتا بەرەتىندىگى اقيقات.

قوڭىراۋ سوعىلدى. جاس بالدىرعان مەكتەپكە اسىقتى. ءبىلىم ورداسىن جاعىمدى جاڭالىقتار قۋانتتى. ءمۇعالىم مەرەيلى كاسىبىنە قايتا كىرىستى. تاعى دا ۇستاز مەرەكەسى ەسىك قاقتى.

ەندەشە، مەرەكەڭىز قۇتتى بولسىن، ۇستاز!

---