ءبىلىم سالاسىنداعى پرەزيدەنت تاپسىرمالارى قالاي ورىندالىپ جاتىر
پرەزيدەنتتىڭ بىلتىرعى قىركۇيەكتەگى جولداۋىنداعى تاپسىرمالار قالاي ورىندالىپ جاتىر؟ ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدە وسى ماسەلە توڭىرەگىندە جان-جاقتى مالىمەت بەردى.
قىركۇيەك ايىندا ەل پرەزيدەنتى قاسىم-جومارت توقايەۆ قازاقستان حالقىنا جولداۋىندا ءبىلىم جانە عىلىم سالاسىنا قاتىستى ءبىرقاتار تاپسىرما بەرگەن بولاتىن.
وسىعان وراي مينيستر اسحات ايماعامبەتوۆ ەرتەڭگى جولداۋ قارساڭىندا بۇگىنگى كۇنگە دەيىن اتقارىلعان جۇمىستارعا توقتالدى.
عىلىم
عالىمدار عىلىمي گرانتتار مەرزىمىن ۇلعايتۋ، ىرگەلى زەرتتەۋلەردى تىكەلەي قارجىلاندىرۋدى ەنگىزۋ جانە جۇمىس ىستەپ جاتقان جەتەكشى عالىمدارعا ەڭبەكاقى تولەۋ ءۇشىن بازالىق قارجىلاندىرۋدى كەڭەيتۋ ماسەلەسىن 10 جىلعا جۋىق ۋاقىتتان بەرى كوتەرىپ كەلە جاتىر دەسەم ارتىق ايتقانىم بولماس.
بۇل ماسەلەلەردىڭ شەشىمى پرەزيدەنتتىڭ قىركۇيەكتەگى جولداۋىندا تولىق كورىنىس تاپتى.
كورسەتىلگەن قولداۋدىڭ ارقاسىندا ءبىز زاڭ جوباسىنا باستاماشىلىق جاسادىق جانە پارلامەنتتىڭ قولداۋىمەن بۇل زاڭ 2021 جىلعى قاراشادا قابىلداندى.
ەندى 2 500-گە جۋىق عالىم عىلىمي زەرتتەۋلەرىنە تۇراقتى قارجى، ياعني، تۇراقتى جالاقى الادى. بۇدان بىلاي گرانتتاردىڭ مەرزىمى 3 جىل ەمەس، عالىمدار ۇسىنعانداي 5 جىلدى قۇرايدى. ۇعك (ۇلتتىق عىلىمي كەڭەس) شەشىمدەرىنىڭ اپەللياسيا ينستيتۋتى ەنگىزىلدى.
تىكەلەي قارجىلاندىرۋ ارقىلى ىرگەلى زەرتتەۋلەرمەن اينالىساتىن 11 عىلىمي-زەرتتەۋ ينستيتۋتى ءبىرجولعى گرانتتاردىڭ ناتيجەلەرىنە قاراماستان قارجىلاندىرىلادى.
ولاردىڭ قاتارىندا ا.بايتۇرسىنوۆ اتىنداعى ءتىل ءبىلىمى ينستيتۋتى، ش.ءۋاليحانوۆ اتىنداعى تاريح ينستيتۋتى، ادەبيەت جانە ونەر، فيلوسوفيا، ساياساتتانۋ ينستيتۋتى سياقتى باسقا دا مەكەمەلەر بار. ەندى ولار تۇراقتى تۇردە قارجىلاندىرىلادى. سوعان سايكەس عىلىمي-زەرتتەۋ جۇمىستارى ۇزدىكسىز جۇرگىزىلىپ، عالىمدار تۇراقتى ەڭبەكاقى الادى.
وقۋشىلار جەتىستىگى
بىلتىر مەكتەپ وقۋشىلارى حالىقارالىق وليمپيادالاردا رەكوردتىق مەدال جەڭىپ الدى. پرەزيدەنت دارىندى بالالاردى قولداۋ شارالارىن ازىرلەۋدى تاپسىردى.
مينيسترلىك حالىقارالىق پاندىك وليمپيادالاردىڭ جەڭىمپازدارى، سونداي-اق ولاردىڭ تالىمگەرلەرى ءبىرجولعى قارجىلاي سىيلىق الۋىن قامتاماسىز ەتۋ ءۇشىن جۇمىس جۇرگىزدى.
سونىمەن قاتار حالىقارالىق پاندىك وليمپيادالاردىڭ جۇلدەگەرلەرى مەن الەمدىك سپورتتىق جانە شىعارماشىلىق بايقاۋلاردىڭ جۇلدەگەرلەرىنە ۇبت تاپسىرماي-اق جوعارى وقۋ ورىندارىندا تەگىن ءبىلىم الۋ قۇقىعى بەرىلەدى.
قازىرگى كۇنى وسىنداي نورمالاردى كوزدەيتىن زاڭ جوباسىن پارلامەنت ءماجىلىسى قابىلدادى.
حالىقارالىق پاندىك وليمپيادا جەڭىمپازدارى 4،4 ميلليون تەڭگەگە دەيىن اقشالاي سىيلىق الادى دەپ جوسپارلانىپ وتىر:
— التىن مەدال ءۇشىن – 1 500 اەك،
— كۇمىس مەدال ءۇشىن – 1 000 اەك (2،9 ملن تەڭگە)،
— قولا مەدال ءۇشىن – 500 اەك.
جوو-لار ءۇشىن ليسەنزيالاردىڭ مەرزىمىن بەلگىلەۋ
بۇگىنگى تاڭدا پارلامەنت ءماجىلىسى قابىلداعان زاڭ جوباسىنا وزگەرىستەر ەنگىزىلدى. جوعارى وقۋ ورىندارى 5 جىلعا جارامدى ليسەنزيالار الادى دەپ جوسپارلانىپ وتىر.
ۋاكىلەتتى ورگانعا سوتپەن تەڭ دارەجەدە ساپاسىز جانە زاڭ بۇزۋشىلىقتارعا بايلانىستى ليسەنزيالاردى كەرى قايتارىپ الۋ قۇقىعىن بەرۋگە قاتىستى زاڭ جوباسىن پارلامەنت ءماجىلىسى قابىلدادى. ءبىراق ۋنيۆەرسيتەتتەردە قابىلدانعان شەشىم بويىنشا سوتقا شاعىمدانۋ قۇقىعى بولادى.
كوللەدجدەرگە اكادەميالىق ەركىندىك بەرۋ تۋرالى تاپسىرما بەرىلدى
زاڭ جوباسىن ءماجىلىس قابىلدادى. ەندى كوللەدجدەردىڭ ءبىلىم بەرۋ باعدارلامالارى بۇرىنعىداي مينيسترلىك بەكىتكەن ۇلگىلىك جوسپارلار مەن باعدارلامالار بويىنشا ەمەس، كاسىپتىك ستاندارتتار مەن جۇمىس بەرۋشىلەردىڭ تالاپتارى نەگىزىندە جاسالادى. ارينە، بۇل جبپ سيكلىن قوسپاعاندا. بۇل – كادرلار دايارلاۋ ساپاسىن ارتتىرۋعا باعىتتالعان ماڭىزدى رەفورما.
پەداگوگتەردىڭ بىلىكتىلىگىن ارتتىرۋ كۋرستارىنىڭ شارتتارىن وزگەرتۋ تۋرالى تاپسىرما
پەداگوگتەردىڭ بىلىكتىلىگىن ارتتىرۋ كۋرستارى بۇرىنعىداي 5 جىلدا ءبىر رەت ەمەس، 3 جىلدا ءبىر رەت وتكىزىلەدى دەپ جوسپارلانىپ وتىر. زاڭ جوباسىن ءماجىلىس ماقۇلدادى.
مۇنداي شەشىم - پەداگوگتەردىڭ بىلىكتىلىگىن ۇزدىكسىز ارتتىرۋداعى الەمدىك ۇردىسكە قادام. فينليانديا مەن سينگاپۋردا مۇعالىمدەردەن جىل سايىن، گونكونگ پەن رەسەي فەدەراسياسىندا كەمىندە ءۇش جىلدا ءبىر رەت بىلىكتىلىگىن ارتتىرۋ تالاپ ەتىلەدى.
2025 جىلعا قاراي 1 000 مەكتەپ سالۋ
ءبىزدىڭ الدىمىزدا جىل سايىن كەمىندە 200 مەكتەپ اشۋ مىندەتى تۇر. 2021 جىلى 270 مەكتەپ اشىلدى. بيىل كەمىندە 200 مەكتەپ اشۋ جوسپاردا بار. قۇرىلىستى قارجىلاندىرۋ جانە قۇرىلىستىڭ ءوزى اكىمدىكتەردىڭ قۇزىرىندا ەكەنىن اتاپ وتكىم كەلەدى. ءبىز ءتيىستى قۇقىقتىق بازانى قۇردىق جانە جان باسىنا شاققانداعى قارجىلاندىرۋ جانە مەملەكەتتىك تاپسىرىستى ورنالاستىرۋ جۇيەسىن دامىتۋ ارقىلى جەكە ينۆەستورلاردىڭ رەسۋرستارىن بەلسەندى تۇردە تارتتىق. ءبىز ءۇش اۋىسىمدى جانە وقۋشى ورىندارىنىڭ تاپشىلىعىن جويىپ قانا قويماي، سونىمەن قاتار ءبىر اۋىسىمدىق وقىتۋعا كوشۋگە تىرىسۋىمىز كەرەك.
كاسىپتىك باعدار بەرۋ
بۇل باعىتتا «اتامەكەن» ۇكپ جانە باسقا دا مۇددەلى تاراپتارمەن بىرلەسكەن جۇمىستار جۇرگىزىلىپ جاتىر.
كوللەدجدەردە تەگىن ءبىلىم الۋعا گرانت سانىن كوبەيتۋ
بيىل بىلتىرمەن سالىستىرعاندا 20 مىڭ گرانت ارتىق بولىنەدى. 2022 جىلى مەكتەپ، بالاباقشا، كوللەدج مۇعالىمدەرىنىڭ جالاقىسىن كوتەرۋ. پرەزيدەنت ق.ك. توقايەۆتىڭ وسى تاپسىرماسى اياسىندا رەسپۋبليكالىق بيۋدجەتكە قوسىمشا قاراجات سالىندى.
«2022 جىلعى 1 قاڭتاردان باستاپ ق ر پرەزيدەنتى قاسىم-جومارت توقايەۆتىڭ تاپسىرماسى بويىنشا بالاباقشا تاربيەشىلەرىنىڭ، مەكتەپ جانە كوللەدج مۇعالىمدەرىنىڭ، سونداي-اق قوسىمشا ءبىلىم بەرۋ جۇيەسى ماماندارىنىڭ جالاقىسى 25%-عا ءوستى. مەملەكەت باسشىسىنىڭ وسى جانە باسقا دا تاپسىرمالارى بويىنشا ءبىز قاجەتتى جۇمىستى جالعاستىرامىز» دەپ اتاپ ءوتتى مينيستر.
You Might Also Like
-
الاكول – الماتى مەن شىعىس-قازاقستان وبلىستارىنىڭ شەكاراسىندا ورنالاسقان تۇزدى سۋ قويماسى. بۇل كولدىڭ سۋى – ەجەلدەن بەرى ءوزىنىڭ ەمدىك قاسيەتتەرىمەن بەلگىلى. الاكولدى كول دەپ اتاۋ قيىن، س...
