InfoHub Logo

ۇشقالى تۇرعان «ارامىن»،

الدارىڭا بارامىن.

قيسىق،

قىڭىر،

قىرساۋدى

تالقىڭا سۇيرەپ سالامىن.

جەكسۇرىن،

جىلپوس،

توڭمويىن،

تورەشىلدى تابامىن،

تابامىن دا، شاعامىن!

ۇلى وتان سوعىسىنان كەيىن ەس جيىپ، ەڭسەسىن كوتەرە باستاعان ەل-جۇرتىمىزدىڭ ەزۋىنە كۇلكى ءۇيىرۋ كەرەك بولدى ما، الدە ەتەك الا باستاعان قوعام دەرتىنە ساتيرانىڭ «ۋىن» سەۋىپ ايىقتىرۋدى ماقسات ەتتى مە، ايتەۋىر ەكى ەسەپ – ءبىر ەسەپپەن «ارا» جۋرنالى قانات كاقتى. ءتۇرلى-تۇستى بوياۋمەن بەزەندىرىلگەن ساياسي-ساتيرالىق جۋرنالدىڭ نەگىزگى دىتتەگەن باعىتتاماسى دا العاشقى بەتتە ايعايلاپ تۇردى."ارا" — ساتيرالىق جۋرنال. 1956 جىلى ناۋرىزدان ايىنا ءبىر رەت، 0،75 باسپا تاباق كولەمىمەن شىعا باستادى. العاشقى شىعارۋشىلارى — ع. مۇسىرەپوۆ، ا. توقماعانبەتوۆ، ق. جارماعانبەتوۆ. “ارا” قوعام ومىرىندەگى كەمشىلىكتەردى، شارۋاشىلىق سالالارىنداعى قىرسىزدىقتار مەن جاۋاپسىزدىقتاردى، ادام بويىنداعى جاعىمسىز قىلىقتاردى باتىل اشكەرەلەدى. 1995 جىلدان باستاپ جۋرنال ا3 قالىپتاعى 4 بەتتىك گازەت بولىپ شىعىپ تۇردى. «ادام دەگەن ميلليونداعان عاسىرلاردىڭ تۋىندىسى» بولسا، حح عاسىردان ەكى-اق جاس كىشى عابەڭ، عابيت مۇسىرەپوۆ 1956 جىلى اشىلعان ساياسي-ساتيرالىق «ارا-شمەل» جۋرنالىنىڭ العاشقى باس رەداكتورى بولدى. قازاق ءباسپاسوزىنىڭ تاريحىنا كوز جۇگىرتسەك، بۇعان دەيىن دە «ساداق»، «شانشار»، «بالعا» اتتى ءازىل-سىقاق جۋرنالدارى جارىق كورىپ، بەسىكتەن بەلى شىقپاي جاتىپ شەتىنەگەن سابيدەي قىسقا عۇمىر كەشكەنىن پروفەسسور تەمىربەك قوجاكەيەۆ پەن تۇرسىنبەك كاكىش ۇلى اعالارىمىز عىلىمي ەڭبەكتەرىندە دالەلدەگەن. تۋماي تۋا شوككەن وسى ءبىر ءازىل-سىقاق ءۇش جۋرنالدىڭ تىزگىنىن بەيىمبەت مايلين، جۇسىپبەك ايماۋىت ۇلى، ءىلياس جانسۇگىروۆ ۇستاعانىن بىرەۋ بىلسە، بىرەۋ بىلمەيدى. قازىردە «ارا» ساتيرالىق جۋرنالى قايتادان ءتىرىلىپ، ايقىن گازەتىنىڭ ىشىنەن ايىنا ەكى رەت سەگىز بەتتەن شىعادى.

كوپەن امىربەك: «اسپانداعى قۇستى جەردەگى جەم ۇياتقا قالدىرادى» - دەگەن قازاقتىڭ ءسوزى بار. قازاققا قامقور بولادى دەپ جۇرگەن نەبىر ازاماتتارىمىز قامقور ەمەس، جەمقور بولىپ جاتقان جوق پا ءقازىر؟ سول جەمقورلىققا قارسى كۇرەستەن بۇرىن، سول جەمقورلىقپەن كۇرەسىپ جۇرگەندەرمەن كۇرەستىن كەزەڭى كەلدى. ال جاستارعا كەلەتىن بولساق، كوبىسىنىڭ دىتتەگەنى ءىشۋ، جەۋ، قىدىرۋ، جەڭىل-جەلپى ءومىر ءسۇرۋ. وسىنداي سەزىمدەر ولارعا ساز بالشىقتاي جابىسىپ العان با دەپ ۋايىمدايمىن. ەندى سول جاستاردى تاربيەلەيتىن، ساناسىنا وي سالاتىن، اقىلعا كەلتىرەتىن، ءوزىنىڭ ازىلدەرىمەن، كاريكاتۋرالارىمەن دۇرىس باعىتقا جەتەلەيتىن، جەمقورلىققا قارسى مىلتىقسىز مايدان اشاتىن، وعان توقتاۋ بولاتىن، سىن ساداعىن تارتاتىن وسى «ارا» بولار دەيمىن. سوندىقتان «ارا» جۋرنالى قازاققا كەرەك!

---