InfoHub Logo

ءوزىڭدى جەتىلدىرۋدىڭ، تابىسقا جەتۋدىڭ جولى، ەڭبەكقور، تابىستى ادامدارمەن بىرگە بولۋ. سەن جۇگىرگەنىڭدە، الدىڭا ءتۇسىپ سەنى ودان دا جىلدام جۇگىرۋگە ىنتالاندىراتىن، كۇش-جىگەرىڭدى، شاماڭدى شىڭداپ، كەلەسى دەڭگەيگە ءوتۋىڭدى قامتاماسىز ەتەدى. سونداي-اق تابىسقا جەتكەن، تاريحتا ءىز قالدىرعان زيالى، تابىستى ادامداردىڭ ءومىر بايانىن، ءجۇرىپ وتكەن جولىن، قيىنشىلىقتاردى قالاي جەڭگەنىن، تابىسقا قالاي جەتكەنىن، قانداي جاقسى قاسيەتتەرى بارىن، اينالاسىنا قالاي پايدالى بولعاندىعىن وقىپ، سونى ۇلگى ەتىپ الۋ، سوعان ۇقساۋعا تىرىسۋ دا پايدالى بولىپ تابىلادى. بيزنەس ترەنينگتەردە جاستارعا وسىنى ايتىپ جۇرەتىن ەدىم. ءبىر رەتىندە زالداعى جاستاردان: «ارماندارىڭا، العا قويعان ماقساتتارىڭا جەتۋ مۇمكىن، ءبىراق وسى جولدا وزدەرىڭە ۇلگى بولاتىن تۇلعا، سونىڭ ىزىمەن ءجۇرىپ جەتىستىككە جەتۋلەرىڭە سەبەپشى بولاتىن ءبىر قاھارمان تاڭداساڭدار بولادى. وسىنداي ۇلگى بولارلىق تۇلعا رەتىندە سەندەر كىمدى اتار ەدىڭدەر؟» دەپ سۇرادىم. جاستار اراسىنان بىرەۋى قولىن كوتەرىپ: «گەندالف» دەدى. ونىڭ كىم ەكەندىگىن بىلمەگەندىكتەن بۇل جاۋاپقا اسا ءمان بەرمەگەن ەدىم. كەيىنىرەك سۇراستىرعانىمدا ۇستىمە سۋ قۇيعانداي بولىپ، الگى جاۋاپقا نە كۇلەرىمدى، نە جىلارىمدى بىلمەدىم. شەتەلدىك فانتاستيكالىق فيلمدەگى جاماندارمەن سوعىستاعى سيقىرشى اقساقالدى كەيىپكەر ەكەن. جاستارىمىز رۋحانياتىن ۇلتتىق قۇندىلىقتارىمىزدان ەمەس، شەتەلدىك قيالي پەرسوناجداردان الىپ جاتىر ەكەن عوي دەپ ءىشىم سىزداپ قويا بەردى. ومىرلەرى ۇلگى-ونەگەگە، عيبراتقا، كەرەمەتكە تولى قوجا احمەت ياسساۋي، تولە بي، ابىلاي حان سەكىلدى حاندارىمىز، بيلەرىمىز، شەشەندەرىمىز، تاريحي بابالارىمىز كوپ ەمەس پە؟ ولاردى تانىماي، باتىستىڭ قيال تۋىندىسىنان شىققان فيلمدەگى كەيىپكەردى ۇلگى دەپ اتاۋى دابىل قاعارلىق قۇبىلىس ەمەس پە؟ كەڭ بايتاق جەرىمىزدى جاۋلاپ الىنۋدان قاشاندا قورعايتىنىمىز سەكىلدى، بالالارىمىزدىڭ ساناسىنىڭ جاۋلاپ الۋىنا دا جول بەرمەۋىمىز كەرەك ەمەس پە؟ مەن وسى جاۋاپتان كەيىن ەلىمىزدىڭ كەلەشەگى بالالارىمىزعا تاريحىن، مادەنيەتىن، ۇلتتىق قۇندىلىقتارىن سىڭىرە وتىرىپ تاربيە بەرۋدى مىقتاپ قولعا الۋ كەرەك ەكەندىگىن جاقسىلاپ ۇققانداي بولدىم.

---