ءبىر قۇمالاق...
– باياناۋىل سوۆحوزىندا ساۋلىقتاردى قولدان ۇرىقتاندىرۋ ويداعىداي ۇيىمداستىرىلعان ەكەن. سەن سوندا بارىپ، ىسپەن تانىسىپ، رەپورتاج جازىپ كەل، – دەدى باستىعىم.
–جارايدى، شاكە.
سوۆحوز كەڭسەسىندە كۇتىپ وتىرعان زووتەحنيكپەن ۇرىقتاندىرۋ پۋنكتتەرى ورنالاسقان مالدى اۋىلدارعا ءجۇرىپ كەتتىك. انە-مىنە دەگەنشە سولاردىڭ بىرىنە كەلىپ تە قالدىق. تۇندە قىربىق قار جاۋعان ەدى. بازدان شىعىپ ورىسكە بەت العان وتار ءىزى جوسىلىپ جاتىر. ال ۇرىقتاندىرۋ پۋنكتى بازعا قاراما-قارسى ەسكى ءۇيدىڭ ءبىر بولمەسىنە ورنالاسقان ەكەن. زووتەحنيك مەنى سولاي قاراي باستادى. ءبىر عاجابى، پۋنكتتىڭ ەسىگىنىڭ الدىنداعى قىربىق قار دا پۋنكتكە كىرىپ شىققان ادامداردىڭ ىزىنەن باسقا ءىز جوق ەدى.
ۇرىقتاندىرۋشى مەن زووتەحنيك ماعان جارىسا مالىمەت بەرۋدە. ۇرىقتاندىرۋشى ماعان كۇندەلىكتى ۇرىقتاندىرۋدان وتكەن ساۋلىقتاردى تىركەيتىن جۋرنالدى ۇسىندى. ونداعى جازۋعا قاراعاندا، سول كۇنى جيىرما بەس ساۋلىق شاعىلىستان وتكەن. بولمە ىشىنە ءجىتى كوز سالا تۇرىپ، ولاردىڭ سوزدەرىندە شيكىلىك كوپ ەكەنىن بىردەن اڭعاردىم. ويتكەنى پۋنكت ەدەنىنە تاياۋدا توسەلگەن تاقتايلاردىڭ اراسى بىر-بىرىنەن تىم الشاق ەدى. كەزىندە ارىق-تۇراق مال تۇرعان بولسا كەرەك. سودان قالعان بولار ويىپ الىنباعان كەپكەن قارا قي كورىنىپ جاتىر ەدى.
– اپاي، ساۋلىقتار وسى ارادا ۇرىقتاندىرىلا ما؟ – دەپ سۇرادىم شەتكەرى تۇرعان ەدەن سىپىرۋشىدان.
– ءيا، ءيا، – دەدى ول. ۇرىقتاندىرۋ پۋنكتى وسى ەكەنىن كورىپ ءتۇرعان جوقسىز با؟
ونىڭ بۇل سوزىنە انا ەكەۋى قارقىلداي كۇلىپ ءماز بولىستى. ولاردىڭ تۇرىنەن قويدىڭ سۋرەتىن گازەت-جۋرنالدان، تەليەۆيزوردان، كينودان كورەتىن ءتىلشى پاقىردى تۇرماستاي قىپ ءبىر تۇرالاتتىڭ-اۋ جارايسىڭ دەگەن ريزاشىلىق اڭعارىلىپ تۇردى.
– ال وندا ەدەنگە توسەلگەن تاقتايلاردىڭ اراسىندا تۇسكەن قويدىڭ ءبىر قۇمالاعىن الىپ كورسەتىڭىزشى. ايەل قىپ-قىزىل بولىپ تومەن قارادى.
–ەندى، ەندى... –دەپ ءتىل قاتپاق بولعان زووتەحنيكتىڭ ءسوزىن ءبولىپ:
– سونان سوڭ موروزوۆتىڭ ستوليگىن كورسە الماي تۇرمىن. الدە... زووتەحنيك ساسقالاقتاپ:
– سونى اكەلىپ بەرەمىز،- دەپ ەدى.
– قاشان؟ ۇرىقتاندىرۋ بىتكەندە مە؟ ول ءۇنسىز قالدى.
– ءجا، قوشقارلاردى كورسەك. جيىرماعا تارتا قوشقار قورا ىشىندە ارنايى بولىنگەن ورىندا كۇتىلۋدە ەكەن.قوشقارلار كۇيلى، تۇرعان ورىندارى دا كوڭىل كونشىتەرلىكتەي ەدى.
– اعا، ءتول توگىنىڭ استىندا قالىڭىزدار!
– راحمەت، اينالدىم. بار سەنىم ءبىر اللادا، سودان سوڭ مىنا تۇرعان قوشقارلاردا. ۇرىقتاندىرۋشىنىڭ ەزۋىنە كۇلكى ءۇيىرىلدى. –شىندىعى وسى،- دەدى ول الدەن سوڭ.
– مەندەي اناڭ بار شىعار، مىنا كىسى بولسا دىمكەس. شيەتتەي بالامىز بار. زووتەحنيك كۇنى ىلگەرى كەلىپ: «وسىلاي دەپ ايتىندار»،- دەپ وتىنگەن سوڭ ونىڭ ءسوزىن جەرگە تاستاي الماي، سىزگە وتىرىك ايتىپ، بىزدەن ءبىر قاتەلىك كەتتى.
– ۇقتىم، اپاي.
جول بويى ونىڭ شيەتتەي بالا-شاعا، ءبىر قاتەلىك كەتتى دەگەن ءۇنى قۇلاعىنىڭ تۇبىندە تۇرىپ العانداي ەدى. ءبىر قاتەلىك... تەك بۇعان ونىڭ زارەدەي قاتىسى جوق ەدى. وتىرىك، جالعان اقپار، جالعان مالىمەت كەنىنەن قانات جايىپ، ۇلكەن قاتەرگە اينالىپ، سوۆەتتىك قوعامنىڭ داۋاسىز دەرتىنە اينالا باستاعان الىپ ەلدى اقىرى الىپ ۇرار كەزەنگە كەلىپ تىرەلەر كۇنگە بىرتە-بىرتە جاقىنداپ كەلە جاتقانىن وتىرىكتىڭ ورگە باسۋىنا سول ارقىلى جابۋدى جابا توقىپ، جاقسى اتانۋعا مۇددەلى يدەولوگتار ەل باسىندا وتىرعانىن ولار قايدان ءبىلسىن؟..
الدىڭعى ۇشەۋى: «ءبىر پالەدەن امان قالدىق-اۋ!» – دەپ جەڭىل كۇرسىنسە، ءتىلشى: «وسى جۇرت قىزىق وزدەرى جالعان اقپار بەرەدى دە، ارتىنان گازەتتى وتىرىك جازادى دەپ كىنالايدى»،- دەگەن ويعا بەرىلىپ، قاتتى رەنجۋلى ەدى.
الدا ءالى دە ۇزاق بۇرالاڭ جول جالعاسىپ، ءومىر ءبىر بەلەستەن ءبىر بەلەسكە جەتەلەپ كەتە بارعان...
You Might Also Like
-
باستاۋ كوزىن كۇنى كەشەگى «لەنينشىل جاستان» الاتىن قايمانا قازاقتىڭ جاسىنداي جارقىلداعان «جاس الاشى» – 95-تە... كوڭىلدى قۋانىشقا بولەگەن وسى ءبىر ساتتە وتكەنىڭدى وي كوزى...
