InfoHub Logo

تاۋاسار مەن اماندىق باتىرلاردىڭ وقيعاسى قالماقتاردىڭ ورتا ءجۇز جەرىن شاپقىنشىلىققا ۇرىندىرىپ، كوپ جەردى باسىپ العان شاعى ەكەن. نۇرانىڭ شىعىس جاعىندا قىزەمشەك دەگەن قوس وركەشتى شوقى بار. قالماقتار سونىڭ ەتەگىنەن قورعان سالىپ، بەكىنىس جاساعان ەكەن. ەكى شوقىنىڭ ۇستىنە ەكى قاراۋىل قويادى. قازاقتار جاساعى بولسا، نۇرانىڭ باستى جاعىنا كەلىپ ورنىعىپتى.

ارعىننىڭ باس باتىرى جانىبەك تاۋاسار باتىرعا ءجۇز جىگىت قوسىپ بەرىپ، بارلاۋعا اتتاندىرادى. ولار وزەننەن ءوتىپ، جاۋدىڭ ورنالاسقان جەرىن تۇگەل ءبىلىپ الادى. قايتار جولىندا قالماقتاردىڭ قورشاۋىندا قالىپ، ەرىكسىز سوعىسۋعا تۋرا كەلگەن. قازاق جىگىتتەرى قارسىلاسىپ، ولگەنى ءولىپ، جارالانعانى جارالانىپ، اتتارىنان قۇلايدى. بايقاۋسىزدا كۇرزىنىڭ اۋىر سوققىسى تيگەن تاۋاسار باتىردىڭ ءوزى دە ەسى اۋىپ، اتىنان قۇلاپ تۇسەدى. ءبىر كەزدە ەسىن جيىپ، جان-جاعىنان قاراسا، قالماق جەندەتتەرى اتتان قۇلاعان قازاق ساربازدارىن ارالاپ، دەنەسىنە نايزا سۇعىپ كورىپ، قوزعالماسا جايىنا قالدىرىپ، قوزعالعانىن، ىڭىسىعاندارىن باسىن شاۋىپ ءولتىرىپ جۇرگەنىن كورەدى. تاۋاسار باتىر بولسا ولگەن ادامعا ۇقساپ تىپ-تىنىش جاتا قالىپتى. ءبىر كەزدە قالماقتار كەلىپ دەنەسىنە  نايزا قاداسا دا شىداپ، تىپىر ەتپەستەن تىرشىلىك نىشانىن بىلدىرمەي جاتىپ قالادى. ءوز ىستەرىن تىندىرعان قالماقتار جايىنا كەتكەن سوڭ، قاراڭعى ءتۇسىپ، ءتۇن بولىسىمەن باتىر جىلجىپ وزەنگە جەتىپ، ودان ءوتىپ وزدەرى ورنالاسقان جەرگە كەلەدى. جانىبەككە جاۋدىڭ ورنالاسۋىن، ءوزىنىڭ باستان كەشكەن وقيعاسىن بايانداپ بەرەدى. سوندا جانىبەك باتىر بەس مىڭ ساربازدى تاۋاسار مەن اماندىق باتىرلارعا قوسىپ بەرىپ، قامالدى شابۋعا قايتادان جۇمساعان ەكەن. جانىبەكتىڭ ءوزى بولسا قالعان اسكەرىمەن جاۋدىڭ شەگىنىپ، قاشار جولىن، جابۋعا شىعادى. تاۋاسار باتىر جانىنا باتقان جاراسىنا قاراماستان تاڭعا جاقىن بەس مىڭ اسكەرمەن كەلىپ، جاۋ بەكىنىسىن تالقان ەتەدى. قالماقتار قاشقان كەزدە ولاردىڭ سوڭىنا تۇسەدى. قاشقان جاۋ بولسا جانىبەك باتىردىڭ توسقاۋىلىنا كەلىپ كيلىگەدى. ودان قالماقتار قۇتىلا الماپتى. ءسويتىپ، قازاق ەلىنىڭ ىرىستى ولكەلەرىنىڭ ءبىرى نۇرا بويى جاۋدان ازات ەتىلىپتى.

وقۋعا كەڭەس بەرەمىز:

ءجالاڭتوس باتىر

ەلشىبەك باتىر تۋرالى

بەردىقوجا (ءى نۇسقا)

---