...ءبىز وسىلاي تابىسىپ ەدىك...
ءدال قاي جىلى جانە قاي كۇنى ەكەنى انىق ەسىمدە جوق. ايتەۋىر مەنىڭ مۇقاعاليمەن تۇڭعىش رەت كەزدەسىپ، جاقسى تانىس بولعانىم قازاق راديوسىنىڭ مۋزىكا رەداكسياسىندا ەدى. مەن تۋرالى حابار بەرىلمەكشى ەكەن. داۋىسىمدى جازىپ الاتىن بولعان سوڭ كەلگەم. الدىمنان ارسالاڭداپ انۋاربەك بايجانبايەۆ شىقتى. ول وسىندا باس ديكتور. ەكەۋمىز بۇرىننان جاقسى تانىسپىز. اماندىق سۇراسىن وتىرعانىمىزدا ءبىزدىڭ جانىمىزعا كەڭ جاۋىرىندى، بۇركىت تۇمسىق، پالۋان دەنەلى جاس جىگىت كەلدى. ەكى بەتىنەن قانى تامىپ تۋر. نۇرلى ەكەن. باتىل امانداستى.
— نۇراعا! اسسالاۋماعالەيكۋم! مەن مۇقاعالي دەگەن ءىنىڭىز بولامىن. ادەيى امانداسايىن دەپ كەلدىم سىزگە. رايىمبەك بابانىڭ ۇرپاعىمىن، اعا.
— بارەكەلدە، باۋىرىم، بارەكەلدە!
سۇراسا كەلىپ ونىڭ وسىندا ديكتور بولىپ قىزمەت ىستەيتىنىن ءبىلدىم. قاراسازدان استاناعا كوشىپ كەلگەنىنە دە كوپ بولماعان ەكەن. قارت شەشەسى، بالا-شاعاسىمەن پاتەر جالداپ تۇرىپ جاتقان سىڭايى بار.
نە كەرەك، ول ەكەۋمىز اسا كوپ سىرلاسا الماساق تا ءبىرىمىز جايلى ءبىرىمىز اجەپتەۋىر حاباردار بولىپ قالدىق. مەن وسىدان باستاپ اقىن ءىنىمنىڭ گازەت-جۋرنالداردا جاريالانعان كەيبىر ولەندەرىن وقىپ تا ءجۇردىم. جاس جىگىتتىڭ ولەڭدەرىندەگى قاراپايىمدىلىق، پەن ويلىلىق، ادام سەزىمىن قوزعاپ وتەتىن قۋاتتىلىق جاقسى ەسەر ەتە باستادى.
ماقاتايەۆ ەكەۋمىزدىڭ ەكىنشى رەت بەتپە-بەت كەزدەسۋىمىز جازۋشىلار وداعىندا بولدى. ول جەرگە اقىن تۇمانباي مولداعالييەۆتى ىزدەپ بارعام. مۇقاعالي تۇماشتىڭ كابينەتىندە وتىر ەكەن. مەنى وزىنە اعا ساناپ، ارسالاڭداپ قارسى الدى. ءبىراز اڭگىمە دۇكەن قۇردىق. ونەر تۋرالى، قازىرگى كەزەڭدەگى پوەزيا جونىندە، ءان جايىندا وزىمىزشە سىرلاسىپ، ءبىراز وتىرىپ قالدىق. تۇماشقا ءوز باسىمدا جۇرگەن دايىن اۋەنگە ءسوز جاز دەپ قولقا سالدىم. مۇقاعالي بولسا اندا-ساندا تاۋ قىراتىنداي مىنەزبەن قوزعالاقتاپ قويىن ءۇنسىز تىڭداپ وتىر. بايقايمىن، ول تۇمانبايدى، ال تۇماش ونى جاقسى سىيلايتىن سەكىلدى. ءسويتىپ، مەنى قوسقاندا ءۇش باۋىر — ەكى اقىن مەن ءبىر كومپوزيتور ءوز زامانىمىزدىڭ ونەرى جايلى كوڭىلدە كوكتەگەن ءبىراز ويلاردى ورتاعا سالىپ، ءوزارا وي ءبولىسىپ، سىرلاسىپ تاراستىق.
الگى كەزدەسۋدەن سوڭ مۇقاعالي ماعان ەتەنە جاقىن ءىنىم سياقتى بولىپ كەتتى. ەندى ونىڭ شىعارماشىلىعىنا بۇرىنعىدان دا باسا نازار اۋداراتىن بولدىم. وزىمە ەرەكشە ۇناعان ولەڭدەرى تۋرالى كەزدەسە قالعاندا وعان قۋانا ايتىپ تا ءجۇردىم. ونىڭ شىعارماشىلىعىندا كوپ اقىندارعا ۇقساي بەرمەيتىن ەرەكشەلىك، ەر مىنەز بار ەكەنىن اڭعارا باستادىم. مەرزىمدى باسپا ءسوز بەتتەرىندە جارىق كورگەن كولەمدى دۇنيەلەرى مەن شاعىن ولەندەرىن جاس اقىنداردىڭ جاتتاپ الىپ ايتىپ جۇرەتىنىنەن دە حاباردارمىن. ءبىراق نەگە ەكەنىن كىم ءبىلسىن، سول جىلدارى مۇقاعالي پوەزياسىنىڭ تابىستارى تۋرالى ەشكىم ماندىتىپ جازا قويمادى-اۋ دەيمىن. ءيا، ءدال سولاي. تەك ءابىش كەكىلبايەۆ ءىنىمىز ءتاۋىر دۇنيە جازدى دەگەندى ەستىدىم. پەندەمىز عوي...
مىنا تىنىمى جوق تىرشىلىكتە اركىم ءار شارۋامەن بايلانىپ، تاڭنىڭ اتىسىمەن كۇننىڭ باتىسىنا دەيىن تىپىرلايمىز دا جۇرەمىز ەمەس پە؟ ماسەلەن، مەن كومپوزيتورمىن. ال مۇقاعالي اقىن. اسىرەسە جەتپىسىنشى جىلداردىڭ ورتا شەنىندە ونىڭ پوەزياسى شارىقتاۋ شەگىنە جەتكەندەي اسپاندادى. بارلىق ەل، قالىڭ وقىرمان مۇقاعاليدىڭ وزگەگە ۇقسامايتىن دارا تالانت ەكەنىن مويىنداسا دا قولىندا باسپانىڭ تىزگىنى، مانساپتىق بيلىگى بار كەيبىر اعايىندارىمىز وعان جابىققاندا جاناشىر بولا قويماپتى. وسكەندى وشىرۋگە تىرىساتىن قازەكەمنىڭ ىشتەن شالىپ، سىرتتان ايداقتايتىنى بار ەمەس پە. مۇقاعالي دا وسىنداي سوراقى ارەكەتتەردىڭ تۇزاعىنا ءجيى ءتۇستى-اۋ شاماسى. مەن ونى اقىن ىنىممەن وڭاشا ءبىر اڭگىمەلەسكەندە انىق سەزدىم. ءبىراق تالانتتىڭ اتى تالانت قوي. كەدەرگىلەر كەزدەسكەن سايىن ول جىگەرىنە جىگەر قوسىپ، قايراتتانىپ، تاماشا دۇنيەلەر جازا بەردى. قىرسىققاندا سول جەتپىسىنشى جىلداردىڭ ورتا شەنىندە اقىن اۋىر سىرقات ەدى... ءوزىنىڭ ايتۋىنشا باۋىرىنا قاتتى كۇش تۇسكەن. سونىڭ اسەرىنەن باسقا ءىش قۇرىلىسى دا السىرەي باستاعان. ءجيى-جيى اۋرۋحاناعا جاتىپ، ەمدەلىپ شىعىپ ءجۇردى. "ولەڭدى ءوندىرىپ جازىپ ءجۇرمىن. ەندى بۇدان باسقا ماعان نە قالدى" دەگەنى ءالى ەسىمدە. نەگە ايتتى ەكەن وسىنى؟..
1975-جىلدىڭ كۇزى. ول كەزدە مۇقاعالي ەش جەردە جۇمىس ىستەمەي، ۇيدە شىعارما جازىپ جاتقان. نەگە ەكەنىن قايدام، ءىنىمدى ارنايى ىزدەدىم.
اقىرى تاپتىم. ەكەۋارا كەڭ-مول اڭگىمەلەسكەن سوڭ، مەن وعان اعا رەتىندە قولقا سالدىم:
— مۇقاش باتىر! مەن سەنىڭ ولەڭدەرىڭنىڭ قۋاتتىلىعىن ەندى عانا تولىق ءتۇسىنىپ، ەندى عانا تانىعاندايمىن. ءار ءسوزىڭ حالىققا جاقىن ءارى ۇعىنىقتى، قاراپايىم. ەندەشە نەگە ءوز حالقىڭ اۋزىنان تاستاماي ايتىپ جۇرەتىن انگە اينالدىرماسقا ونى؟ بۇعان قالاي قارايسىڭ.
— مەن بۇرىن-سوندى ءاننىڭ ءسوزىن جازعان اقىن ەمەس ەدىم، اعا... وسىنىڭ ءوزى قالاي بولار ەكەن...
ول اجەپتاۋىر ويلانىپ قالدى. مەن قايتالاپ قولقا سالدىم. بۇل جولى قارسىلىق كورسەتكەن جوق. تەك اۋىر كۇرسىندى. سوندا نە ويلادى ەكەن؟..
بۇل كەزدە مەن الماتى قالاسىنىڭ كوممۋنيستيچەسكيي (قازىرگى ابىلاي حان) كوشەسىمەن گوگول كوشەلەرىنىڭ قيىلىسىنداعى "قاراكوز" كافەسىنىڭ ۇستىندە تۇراتىنمىن. كەلىسىم بويىنشا مۇقاعالي ەكەۋمىز ۇيگە كەلدىك. سول كۇننەن باستاپ ءبىرىمىز كومپوزيتور، ءبىرىمىز اقىن رەتىندە تاپجىلماي وتىرىپ جۇمىس ىستەۋگە كەلىستىك. مۇقاعاليدىڭ ۇيىندەگى كەلىن — لاشىنعا تەلەفون ارقىلى حابار بەرىپ، ءمان-جايدى تۇسىندىردىك. كىم ءبىلسىن، العاشىندا كەلىنىمىز ەركە اقىن مەن "شاتاق،" كومپوزيتور بىرىگىپ جۇمىس ىستەيدى دەگەنگە سەنبەگەن دە شىعار... مەيلى، نانىڭىز، مەيلى، نانباڭىز، سول جولى مۇقاعالي ەكەۋمىز تۋرا وتىز كۇن بويى ءبىزدىڭ ۇيدە وندىرە جۇمىس ىستەدىك. مەن وتىزدان اسا ءان شىعاردىم. ال ول سول اندەردىڭ بارىنە مولدىرەتىپ تۇرىن ولەڭ جازىپ شىقتى.
بۇل كۇندە ءيىسى قازاق اسا جوعارى باعالاپ، قۇرمەتپەن ايتاتىن "سارىجايلاۋ"، "سالەم بەرەم جەتىسۋعا"، "سونبەيدى، اجە، شىراعىڭ"، "ەسىڭە مەنى العايسىڭ"، "بولماسىن سوعىس، بولماسىن"، "كەل ەركەم، الاتاۋىما"، "دومبىرا — دوسىم" جانە باسقا دا كوپتەگەن اندەر تۋرا سول وتىز كۇن ىشىندە ءارى جەدەل ءارى ءساتتى تۋعان دۇنيەلەر ەدى. ال ەندى ءار ءاننىڭ كاشتان جانە قالاي جازىلعانى وزىنشە ءبىر-بىر اڭگىمەگە ارقاۋ بولا الادى. مەن سونىڭ بىرنەشەۋىنە عانا بارىنشا قىسقاشا توقتالۋدى جون ساناپ وتىرمىن.
مۇقاعالي ەكەۋمىز ايدان استام ءبىزدىڭ ۇيدە بىرىگىپ جۇمىس ىستەدىك دەدىم عوي. سول كۇندەردىڭ بىرىندە اقىن ءىنىم ەكەۋمىزدىڭ باۋىرجان مومىشۇلىنا بارىن، سالەم بەرىپ قايتۋىمىز كەرەك بولدى. باۋكەڭنىڭ ۇيىندەگى جەڭەشەمىز قۋانا قارسى الدى دا بىزگە ەسكەرتۋ جاسادى.
— اعالارىڭ سەندەردى كۇتىپ قالدى. ايقايلاپ الۋى ابدەن مۇمكىن، — دەدى. جەڭگەمىزدىڭ ايتقانى ايداي كەلدى. "سوگىسىمىزدى" الدىق. سوسىن بارىپ باتىر اعامىز جازىلىپ سالا بەردى:
— سەندەر بىلەمىسىڭدەر؟ مەن مىنا شىلىم دەگەن بالەنى نەگە ءجيى شەگەمىن؟ نەگە انا پالەنى؟.. قان مايداندا كوز جۇمعان ەسىل ەرلەردى، مايدانداستارىمدى ىزدەيمىن!.. ساعىنامىن سولاردى!.. — دەپ قالدى باۋكەڭ.
مەن مۇقاعاليعا، ول ماعان قارادى. "باتىردىڭ مىنا تەبىرەنىسىمەن ءبىر ءان جازارما ەدى" دەدىم ىشتەي. اقىن ءىنىم مەنىڭ بۇل ويىمدى بىردەن اڭعارعانداي. ناناسىز با، ءدال سول جەردە مەنىڭ كومەيىمە بەلگىسىز ءبىر ءان ىرعاعى، ساعىنىش سازى كەلگەندەي بولدى. مازام كەتتى. اسىعىپ وتىرمىن. باۋكەڭ بولمە ءىشىن كوكالا تۇمان ەتىپ اڭگىمەسىن ساباقتايدى.
مومىش ۇلىنىڭ ۇيىنەن شىعىپ ۇيگە جەتكەنشە مەن دە، مۇقاعالي دا ءتىس جارمادىق. مەن بولاشاق، ءان تۋرالى، ال اقىن ءىنىم ونىڭ ءسوزى جايلى تولعاتىپ كەلەمىز.
ۇيگە كىرە كۇيساندىققا وتىردىم. مۇقاعالي بولسا داريعا جەڭگەسىنە: "ماعان اسحانانى بەرەسىز بە؟ جۇمىس ىستەۋ كەرەك"، — دەپ ءوتىنىشىن ايتتى دا قاعاز-قالامىن الىپ وتىرىپ قالدى. ءسويتىپ ءدال سول كۇنى "مەن سەندەردى ىزدەيمىن" اتتى جاڭا ءان دۇنيەگە كەلدى. ءساتتى شىقتى. دەرەۋ ءانشى نۇرعالي ءنۇسىپجانوۆتى ىزدەدىك. نوتاعا ەندى عانا تۇسكەن جاڭا ءاندى كورىپ ول دا قۋانىپ جاتىر.
كىم ءبىلسىن، سول كۇنى مۇقاعالي ەكەۋمىز باۋكەڭنىڭ ۇيىنە بارماساق، الگى ءان تۋار ما ەدى، جوق پا؟..
ەلدىڭ سۇيىكتى انىنە اينالعان "سارجايلاۋدىڭ" تۋۋى دا قىزىق. ول دا اقىن ءىنىم ەكەۋمىز بىرگە جۇمىس ىستەگەن 30 كۇننىڭ ىشىندە دۇنيەگە كەلگەن شىعارما. ىلگەرى ءبىر جىلداردا مۇقاعالي ەكەۋمىز اقىننىڭ تۋعان جەرىندە، جايلاۋدا بولعانىمىز بار. سول جولى ول اراق-شاراپقا مويىن بۇرماي سارى قىمىز ىشۋمەن بولدى. ءوزى بىلەتىن جەر-سۋ اتتارىن ايتىپ، تۋعان جەرىن، اعايىن-تۋىستارىن تانىستىردى. جۇرت ايتاتىنداي بوگدە "ەركەلىك" كورسەتكەن جوق، از كۇن بولسا دا جاقسى دەمالىپ قايتتىق، سول جولى ءبىر مالشى اعاسى تاماق، ۇستىندە بىزگە ءازىل تاستاپ ەدى:
— ەكى بىردەي تاماشا تالانت يەسى جايلاۋ تورىندە وتىر. ءبىرى اتاقتى كومپوزيتور، ءبىرى مىقتى اقىن. نەگە مىنا جاسىل جايلاۋ تۋرالى ءان شىعارماسقا. ناعىز سارىجايلاۋ دەگەنىڭىز مىنا جاتقان شالكودەنىڭ كەڭ ءتوسى ەمەس پە، — دەپ قالعان.
سول ءسوز مەنىڭ كوكەيىمدە كوپتەن جۇرەتىن. مۇقاعالي جانىمدا بولعان ايتا جۋىق ۋاقىتتىڭ ءساتتى ءبىر كۇنىندە ومىرگە ءان كەلدى. ال اقىن ءىنىم لەزدە ونىڭ ءسوزىن ەگىلدىرىپ، توگىلدىرىپ، قۇلپىرتىن تۋدىرا سالدى. ءسويتىپ "سارىجايلاۋ" ءانى شىقتى.
...جاسىراتىنى جوق، شىنايى جۇيرىكتەر مەن ناعىز تالانت يەلەرىنىڭ ارتىڭدا ءارتۇرلى سوزدەر قالادى. بىرەۋ قوسىپ، بىرەۋ بويامالاپ جەتكىزەدى. ءتىپتى ءقايسىبىرى كولەڭكەلى جاقتارىن تەرىپ الىپ، سىر بىلدىرمەي تاراتىپ جۇرەدى. بۇگىندە ارامىزدا جوق مۇقاعالي جايلى از بىلەتىندەر ونى اسىپ كەتكەن تەنتەك، تەك ءىشىپ قانا ءومىر كەشكەن دەپ بىلجىرايدى. بۇل — ناعىز قيانات. بىرىنشىدەن، ول اسا ەڭبەكقور ءارى ەرەكشە تالانتتى اقىن بولدى. ەركەلەسە ەلىنە، تۋعان جەرىنە، ءقادىرىن بىلەتىن اعالارى مەن جەڭگەلەرىنە ەركەلەگەن شىعار. ءقايسىبىر وسەكشىلەر ايتقانداي تەك ءىشىپ عۇمىر كەشسە، سوڭىنا بۇگىنگىدەي اسىل مۋرالاردى قالاي قالدىرا الار ەدى؟
مەن مۇقاعاليمەن اسىرەسە ونىڭ ءومىرىنىڭ سوڭعى كەزەڭدەرىندە قويان-قولتىق ارالاستىم. اعاسى رەتىندە اقىلىمدى دا ايتتىم. سوندا اڭعارعانىم ول پاك ءسابي سياقتى ءمولدىر تۇلعا ەدى. كىم بىلەدى، اششى سۋدىڭ جەلىگىمەن مىنەز وزگەرگەن كەزدەرى دە بولعان شىعار. ال مەن ءۇشىن ول ۇياڭ دا نازىك، اق، كوڭىل دە كوپشىل، ءارى مەيلىنشە قاراپايىم ازامات بولاتىن. راس، ادىلەتسىز مانساپقورلارعا قىرانداي شۇيىلەتىن. ءوزىن سىيلاعان ادامعا وزەگىن جارىپ بەرەتىن اق، كوڭىل ەدى. سەزىمى قانداي ۇشقىر دەسەڭشى؟!
بىرلەسىپ جۇمىس ىستەپ جاتقان كۇندەردىڭ بىرىندە قالا ورتاسىنداعى پانفيلوۆشىلار پاركىن ايەلىم داريعا، مۇقاعالي ۇشەۋمىز ابدەن ارالاپ كەلىپ، قىزىل كۇرەڭ شايدى ءىشىپ العان سوڭ مەن داريعاعا:
— داريعا، دومبىرامدى بەرشى ماعان، — دەپپىن عوي.
وسىنى بايقاپ قالعان اقىن ءىنىم قاعاز-قالامىن الىپ،
ءبىزدىڭ شاعىن بولمەنىڭ بىرىنە اسىعىس كىرىپ كەتىپ، ىلەزدە "دومبىرا — دوسىم" دەگەن ولەڭ جازىپ كەلىپتى.
— وسىعان ءان جاز، اعا، — دەيدى ءوتىنىپ.
ءسويتىپ ومىرگە تاعى دا ءبىر جاڭا ءان كەلدى. شىعارماشىلىق دەگەن قىزىق قوي.
ءبىر جولى ءبىزدىڭ ءۇيدىڭ ءىشى جانە مۇقاعالي ءبارىمىز مەدەۋ جاققا سەرۋەنگە شىقتىق. تاۋدىڭ اتى تاۋ عوي شىركىن. سالقىن سامال. تازا اۋا.
اساۋ بۇلاق، جاسىل شىرشالار مەن قالىڭ قاراعايلار. مۇرىنعا جۇپار ءيىسى كەلەدى. كومەيىمە ادەمى ىرعاق — جاڭا ءان كەلگەندەي. "جەتىسۋ قانداي عاجاپ، سۇلۋ ولكە ءا، باۋىرىم"، — دەيمىن مۇقاعاليعا.
ول ءسال ويلانعان قالپىندا ءبىراز تۋردى دا ۇلكەن ءبىر قوي تاستىڭ ۇستىنە شىعىپ وتىرىپ، شۇقشيا قالدى. اجەپتاۋىر وتىردى. مەن ءالى ىڭىلداپ ءجۇرمىن.
— اعا، مىنانى كورىڭىزشى. بۋىن سانى كەلەتىندەي مە، — دەيدى مۇقاعالي. ەكى ادامنىڭ سەزىمى ىشتەي قالاي قابىسادى دەسەڭشى. ءاننىڭ ىرعاعىمەن ءسوزى سايما-ساي كەلە قالدى. ۇيگە اسىعىس ورالىپ، دەرەۋ كۇيساندىققا وتىردىم. سول كۇنى "سالەم بەرەم جەتىسۋعا" ءانى شىقتى.
ءجا، ءار ءاننىڭ تۋعان ۋاقىتىن، ونىڭ سەبەبىن تىزبەلەي بەرسەك اڭگىمە ۇزاققا كەتەر. ەندى مۇقاعاليمەن اقىرعى رەت كەزدەسۋىمدى كوڭىل كوزىمەن ءبىر شولىن كورەيىنشى.
جاڭىلماسام، جوعارىدا ايتقانىنداي، اقىن ءىنىم ەكەۋمىز ءبىزدىڭ ۇيدە تۇپ-تۋرا وتىز كۇن ۇزدىكسىز جۇمىس ىستەدىك. ارا-اراسىندا سەرۋەنگە دە باراتىنبىز. ءبىراق، ءوندىرتىپ جۇمىس ىستەدىك. بۇگىندە ەل اراسىندا دا شىرقالىپ جۇرگەن ماقاتايەۆ سوزىنە جازىلعان مەنىڭ اندەرىمنىڭ كوبى سول وتىز كۇن ىشىندە مەنىڭ شاڭىراعىمدا جازىلعان دۇنيەلەر ەكەنىن ەكىنىڭ ءبىرى بىلە بەرمەس، بالكىم.
سول تۇستا قاي ءاننىڭ قالاي جازىلعانىنان بەلگىلى ءانشى باقىت ءاشىموۆا مەن نۇرعالي ءنۇسىپجانوۆتىڭ جانە قايرات بايبوسىنوۆتاردىڭ دا حابارلارى بار. ويتكەنى ولار مۇقاعالي ەكەۋمىزدىڭ جاڭا اندەرىمىزدى العاش رەت ورىنداعان انشىلەر.
كىم ءبىلسىن، بىلايعى جۇرت ءارتۇرلى ويلايتىن دا شىعار. نۇرعيسا مەن مۇقاعالي قالايشا اي بويى ءتارتىپ بۇزباي، تاپجىلماي، وندىرە جۇمىس ىستەدى ەكەن دەۋشىلەر دە تابىلار. مەيلى، ايتا بەرسىن. ال مەن ءوز باسىمنان كوشكەن ءومىر كەزەنىنىڭ ءبىر ۇزىگىن تانا ايتىپ وتىرمىن.
ءبىر كۇنى مۇقاعالي ماعان ويلى كوزىمەن قادالىپ تۇرىپ:
— اعا، مەن ۇيگە كەتەم. ەندى بوساعىڭىز. وسى دۇنيەلەر ەلىمنىڭ كادەسىنە جاراسا، وندا باقىتتىمىن. باۋىرىمنىڭ دەرتى قوزعالىپ قالىپتى، — دەدى. اۋىر كۇرسىندى. سوندا مەن ونى ءبۇل جالعان دۇنيەنىڭ جارىعىندا سوڭعى رەت كورىپ تۇرعانىمدى بىلسەمشى؟!
مۇقاعالي دۇنيەدەن وتكەن سوڭ قاتتى كۇيزەلدىم. جۇرەگىم السىرەپ ەكى ايعا جۋىق ەمحانادا جاتتىم. ارادا ەكى اي وتكەن سوڭ جۇمىسقا كيەتىن بەشپەنتتىڭ قالتاسىنان حات شىقتى. مۇقاعاليدىڭ جازۋى... "اعا، مەن عوي. دەرتىم قوزىپ بارادى. نە بولارىن بىلمەيمىن.
مىناعان نازار اۋدارىپ كورەرسىز" دەپتى.
ەمحانادا قاتتى اۋىرىپ جاتقاندا ماعان جىبەرگەن سول ولەڭى "ەسىڭە مەنى العايسىڭ" ەكەن. جانىم كۇيزەلىپ وتىرىن، اقىن ءىنىم كوز جۇمعاننان كەيىنگى ەكىنشى ايدىڭ اۋىر ءبىر كۇنىندە الگى ولەڭگە ءان جازدىم.
مىنە، اياۋلى مۇقاعاليىمدى بۇگىن دە ەسىمە الىپ وتىرمىن.
You Might Also Like
-
جاسىم توقسانىڭا تايانعاندا مۇقاعاليىم تۋرالى ەستەلىك ايتۋدى قۇدايدان سۇراپپىن با مەن؟! ...تاعدىردىڭ ىسىنە شاراڭ بار ما. بالامنىڭ جارىق دۇنيەمەن قوش ايتىسقانىنا دا ون التى جىل بوپ بارادى. مەن ءالى ءتىر...
-
قازاق ەستەلىگىنىڭ دەنى ادام جانىنىڭ كۇردەلىلىگىن اشۋعا ەمەس، جاقسىلاردىڭ جاقسى بولعاندىعىن ۋاعىزداۋعا اۋەس. ونىڭ وزىندىك سەبەبى دە بار: ەستەلىك كوبىنە-كوپ ءوزى ارامىزدا جوق ادامدار جايىندا جازىلادى،...
