InfoHub Logo

«Bolashaq» قاۋىمداستىعىنىڭ قۇرىلعانىنا 20 جىل تولدى.

قازاقستان تاۋەلسىزدىك العان ساتتەن باستاپ، ەل دامۋىنا باعىتتالعان جاڭا رەفورمالاردى ىسكە اسىرۋ جانە حالىقارالىق ساحنادا مەملەكەتىمىزدى لايىقتى دەڭگەيدە تانىتۋ ءۇشىن جوعارى بىلىكتى كادرلار قاجەت بولدى. وسى ماقساتتا 1993 جىلى قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆتىڭ باستاماسىمەن «بولاشاق» حالىقارالىق ستيپەندياسى قۇرىلىپ، باسەكەگە قابىلەتتى ۇلت قالىپتاستىرۋدى كوزدەگەن ەڭ ماڭىزدى جوبالاردىڭ بiرiنە اينالدى.

«تاۋەلسىزدىكتىڭ باستاپقى اۋىر جىلدارىندا ءبىزدىڭ كەمەل كەلەشەگىمىزدى كورە ءبىلۋ اركىمگە بۇيىرا قويعان جوق. مەن جاڭا ءبىلىم الىپ، ەلىمىزدى العا سۇيرەسىن دەپ العاشقى ستيپەندياتتاردى اتتاندىردىم. بۇل ءبىزدىڭ سەنىمدى ستراتەگيالىق تاڭداۋىمىز ەدى»، – دەپ حالىقارالىق «بولاشاق» ستيپەندياسىنىڭ مەرەيتويلىق فورۋمىندا ەلباسى باعدارلامانىڭ زور ءمانىن ەرەكشە اتاپ وتكەن بولاتىن.

ۋاقىت وتە كەلە بارلىق تۇلەكتىڭ باسىن قوسىپ، ولاردىڭ پروبلەماسىن شەشۋدى قولعا الاتىن، قوعامدىق ينستيتۋتتاردىڭ ءارتۇرلى دەڭگەيىندە ولاردىڭ مۇددەسىن بىلدىرەتىن، سونداي-اق «بولاشاقتىقتاردىڭ» الەۋەتىن سان الۋان قوعامدىق مىندەتتى تالقىلاۋعا جانە شەشۋگە باعىتتايتىن ۇيىم قۇرۋ قاجەتتىلىگى تۋدى.

وسىلايشا 2001 جىلدىڭ 30 ناۋرىزىندا «قازاقستان رەسپۋبليكاسى پرەزيدەنتىنىڭ حالىقارالىق «Bolashaq» ستيپەندياسى تۇلەكتەرىنىڭ قاۋىمداستىعى» قۇرىلدى. ۇيىمنىڭ نەگىزگى قوزعاۋشى كۇشى ەلىمىزدەگى پروگرەسسيۆتى جانە كەلەشەگى زور جاس مامانداردىڭ قوعامداستىعى بولىپ سانالاتىن باعدارلاما تۇلەكتەرى بولدى. مەملەكەتتىك ستراتەگيالاردى ىسكە اسىرۋعا جاردەمدەسۋ، كادرلار ساباقتاستىعىن قامتاماسىز ەتۋ، جاسامپازدىق جانە يننوۆاسيا ارقىلى بايىرعى داستۇرلەردى ساقتاۋ قاۋىمداستىق جۇمىسىنىڭ باستى قاعيداتتارىنا اينالدى.

بۇگىندە 13 مىڭنان استام قازاقستاندىق جاس باعدارلاما ستيپەندياتى اتانسا، 2000-عا جۋىق شەتەلدە ءبىلىمىن جەتىلدىرۋدە. باعدارلاما تۇلەگى جانە قاۋىمداستىق كەڭەسىنىڭ ءتوراعاسى باقتيار ماكەن اتالمىش ۇيىم جايىندا بىلاي دەيدى:

«قاۋىمداستىقتىڭ نەگىزگى ماقساتى – رەسپۋبليكانىڭ تۇكپىر-تۇكپىرىندەگى «بولاشاق» ستيپەندياسىنىڭ تۇلەكتەرى مەن ولاردىڭ الەۋەتىن بىرىكتىرۋ، سونداي-اق ەلىمىزدىڭ الەۋمەتتىك دامۋىنا ۇلەس قوسۋ.

20 جىل ىشىندە «Bolashaq» قاۋىمداستىعى 100 مىڭنان استام ادامدى تارتا وتىرىپ، 500-دەن اسا جوبا مەن ءىس-شارانى ەلىمىزدىڭ بارلىق وڭىرىندە ىسكە اسىردى. قاۋىمداستىقتىڭ كورپوراتيۆتىك قورلارى قازاقستاننىڭ 8 وڭىرىندە جۇمىس ىستەۋدە.

قاۋىمداستىق ەلىمىزدىڭ جوعارى ءبىلىمدى پاتريوت جاستارىن كوبەيتۋگە ىقپال ەتۋ ماقساتىندا جاستاردىڭ الەۋەتىن اشاتىن جانە دامىتاتىن ءتۇرلى جوبانى ىسكە اسىرۋدا. ماسەلەن، «جاستار ۇيىمدارىنىڭ نەتۆوركينگى جانە تاجىريبە الماسۋ» جوباسى – جاستار جىلى اياسىندا جۇزەگە اسىرىلعان ءىرى جوبالاردىڭ ءبىرى. جوباعا 1100-دەن اسا جاس بۋىن وكىلى اتسالىسىپ، ىنتىماقتاستىق بايلانىس ورناتىپ، جاستار ۇيىمدارىن قولداۋ مەن دامىتۋعا ارنالعان شەبەرلىك سىنىپتار مەن كونفەرەنسيالارعا قاتىستى.

قاۋىمداستىق جاستار اراسىندا كاسىپكەرلىك پەن بيزنەستى دامىتۋعا، يننوۆاسيالىق تىڭ جوبالاردى قولداۋعا ۇلكەن كوڭىل بولەدى. «Bolashaq Business Competition» زياتكەرلىك ويىنىنىڭ ۇيىمداستىرىلۋى، «Bolashaq business cases» بيزنەس-كەيستەر جيناعىنىڭ جارىققا شىعۋى، «Startup «Bolashaq» رەاليتي-شوۋ فورماتىنداعى بيزنەس-يدەيالار بايقاۋىنىڭ ءساتتى وتكىزىلۋى – سونىڭ دالەلى. 2020 جىلى «Bolashaq» قاۋىمداستىعى يننوۆاسيالىق شەشىمدەر مەن ۇسىنىستاردى، بيزنەس جۇرگىزۋدىڭ ۇزدىك ستراتەگيالارى مەن پراكتيكۋمدارىن جيناقتاعان «جاستار جانە يننوۆاسيالار» ونلاين-فورۋمىن وتكىزدى. فورۋم Zoom، Facebook جانە YouTube پلاتفورمالارىندا 25 سپيكەر مەن 500-گە جۋىق قاتىسۋشىنى، ال Facebook جەلىسىندە 3000-نان اسا كورەرمەندى جينادى. سپيكەرلەر جاڭا تەحنولوگيا، ساياسات، بيزنەس جانە الەۋمەتتىك مەديا سالالارىنداعى بىلىمىمەن ءبولىستى.

قاۋىمداستىق جۇزەگە اسىرعان، تىلدىك كەدەرگىلەردى ەڭسەرۋگە جانە شەت ءتىلدى ۇيرەنۋگە ىنتالاندىرۋعا باعىتتالعان «English for Jastar» الەۋمەتتىك-ۆولونتەرلىك جوباسى ەلىمىزدەگى ادامي كاپيتالدىڭ ساپاسىن جاقسارتۋعا مۇمكىندىك بەردى. بۇل جوبانى «Nur Otan» پارتياسىنىڭ «Jas Otan» جاستار قاناتى قاۋىمداستىقپەن بىرلەسىپ 2018 جىلدان باستاپ ىسكە اسىردى. وعان اعىلشىن ءتىلىن جەتىك مەڭگەرگەن وتاندىق جانە شەتەلدىك جاستار تارتىلدى. وسى جوبانىڭ ارقاسىندا اۋىل مەكتەپتەرىندەگى 5500-دەن استام بالا شەت ءتىلىن مەڭگەرىپ شىقتى.

«Bolashaq» قاۋىمداستىعى نۇر-Cۇلتان قالاسى اكىمدىگىمەن بىرلەسە وتىرىپ، جاستار مەن قالا تۇرعىندارىنىڭ كىتاپ وقۋعا دەگەن قىزىعۋشىلىعىن ارتتىرۋ ءۇشىن «Bolashaq Books» جوباسى شەڭبەرىندە تۇراقتى تۇردە بۋككروسسينگ وتكىزىپ تۇرادى. 2017 جىلدان بەرى «Bolashaq Books» جوباسى اياسىندا قازاقستاننىڭ 20 قالاسىندا 28 كىتاپ سورەسى ورناتىلدى. 2018 جىلى قاۋىمداستىق نۇر-Cۇلتان قالاسى اكىمدىگىنىڭ جانە «اتامەكەن» ق ر ۇلتتىق كاسىپكەرلەر پالاتاسىنىڭ قولداۋىمەن «Job Fair 2018» كورمەسىن وتكىزىپ، العاش رەت ەلوردالىق جوعارى وقۋ ورىندارىنىڭ 600-دەن استام تۇلەگى مەن ماگيسترانتىن، 100-دەن استام وزىق ۇلتتىق جانە شەتەلدىك جۇمىس بەرۋشى كومپانيانى، ەكونوميكانىڭ ءتۇرلى سەكتورى وكىلدەرىن ءبىر الاڭدا بىرىكتىردى.

2021 جىلى «Bolashaq Women» كلۋبىنىڭ اياسىندا وسكەلەڭ ۇرپاقتىڭ قۇندىلىقتارى، زاماناۋي قازاقستاندىق قىزدىڭ بەينەسىن قالىپتاستىرۋ، قىز بالالارعا ءوز جولىن تابۋعا، كاسىبيلىككە، تۇلعالىق دامۋعا كومەك كورسەتۋ ماقساتىندا «تابىستى جانە باقىتتى قىزدىڭ زاماناۋي بەينەسى» اتتى ونلاين-فورۋم وتكىزىلدى. فورۋمعا ءتۇرلى سالانىڭ 250-دەن استام وكىلى مەن 7 سپيكەر قاتىسىپ، قازىرگى قوعامنىڭ قۇندىلىقتارى مەن ايەل ومىرىندەگى ەكونوميكالىق، الەۋمەتتىك جانە باسقا دا سالالاردىڭ وزەكتى ماسەلەلەرىن تالقىلادى.

2011 جىلى «بولاشاق» باعدارلاماسىنىڭ تۇلەكتەرى بالالار مەن جاستار اراسىندا مەملەكەتتىك ءتىلدى ناسيحاتتاۋ جانە قازاق تىلىندە ساپالى ءارى باسەكەگە قابىلەتتى كونتەنت قۇرۋ بويىنشا قوماقتى جۇمىسقا كىرىستى. قازاقستاننىڭ مەملەكەتتىك ءتىلىن بىلەتىن، جاقسى كورەتىن جانە قۇرمەتتەيتىن ۇرپاقتى تاربيەلەۋگە كومەكتەسۋ ماقساتى قويىلدى. بۇل باستامانى ەلىمىزدىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازاربايەۆ قولدادى. «Bolashaq» كورپوراتيۆتىك قورى جۇزەگە اسىرعان «وزىڭنەن باستا» الەۋمەتتىك جوباسى وتباسىلىق جانە بالالارعا ارنالعان كونتەنتتى جاساي وتىرىپ، مەملەكەتتىك ءتىلدىڭ دامۋىنا ۇلكەن ىقپال ەتتى. وسى جوبا اياسىندا Disney، Sony Pictures، Marvel، Lucasfilms، BAZELEVS جانە Europa Corp ستۋديالارىنىڭ 36 ءفيلمى قازاق تىلىنە اۋدارىلىپ، ۇلتتىق ءونىمنىڭ قاتارىن كوبەيتتى. قازاق ءتىلى Sony Picturesء-تىڭ 7-تىلىنە، ال Walt Disneyء-دىڭ 39-تىلىنە اينالدى جانە بۇكىل الەم بويىنشا DVD، Blu-ray-دا كورۋگە بولاتىن گولليۆۋدتىق فيلمدەردىڭ نەگىزگى جەتى تىلىنە ەندى.

قاۋىمداستىق سالاۋاتتى ءومىر سالتىن بەلسەندى ناسيحاتتاۋدا 6 سپورت تۇرىنەن 2 سپارتاكيادا مەن 2 CrossFit سايىسىن ۇيىمداستىردى. سونىمەن قاتار قاۋىمداستىق مۇشەلەرى «سەنىڭ جاڭا قىرىڭ» اتتى رەسپۋبليكالىق سپورت اكسياسى مەن Bi-marathon قايىرىمدىلىق مارافونىنا تۇراقتى قاتىسىپ كەلەدى. 2019 جىلى ۇيىمداستىرىلعان «Bolashaq» قاۋىمداستىعىنىڭ II سپارتاكياداسىندا شاعىن فۋتبول، ۆولەيبول، ۇستەل تەننيسى، ارمرەستلينگ، شاحمات جانە اسىق اتۋدان سايىستار ۇيىمداستىرىلىپ، جارىستا 175 ادام سىنعا ءتۇستى.

«بولاشاق» ستيپەندياسى مەملەكەت ۇسىناتىن الەۋمەتتىك ليفتىلەردىڭ ەڭ جارقىن ۇلگىلەرىنىڭ ءبىرى ەكەنى انىق. قاۋىمداستىق مۇشەلەرى، بولاشاقتىقتار ەل باسشىلىعىنىڭ باستامالارى مەن ساياساتىن ءاردايىم قولدايدى.

ەگەمەن قازاقستاننىڭ تۇراقتى دامۋىنىڭ كەپىلى – ءبىلىمدى جانە پروگرەسسيۆتى جاستار. ەلباسى نۇرسۇلتان نازاربايەۆ پەن مەملەكەت باسشىسى قاسىم-جومارت توقايەۆ جاستارعا ءارقاشان ەل بولاشاعىنىڭ كەپىلى رەتىندە قارايدى. ءوزىنىڭ 20 جىلدىق مەرەيتويىن اتاپ ءوتىپ جاتقان «Bolashaq» قاۋىمداستىعى ەلىمىز تاۋەلسىزدىك العان ساتتەن باستاپ بارلىق تاريحي وزگەرىس پەن جاڭالىقتىڭ تەتىگى رەتىندە دامىپ كەلەدى. الداعى ۋاقىتتا دا مەملەكەتىمىزدىڭ وركەن جايۋى جولىندا اۋقىمدى ىستەردى اتقارا بەرەدى.

---