InfoHub Logo

ەرتەدە تاۋ بوكتەرىندە جاتقان جىلقىلاردى ۇرىلار ايداپ كەتۋلى. جىلقى ىشىندە بوزايعىر بار ەكەن. ول ۇيىردەن ۇزاپ الىسقا كەتپەي، شەت جاعىندا جايىلىپ جۇرسە كەرەك. ۇرىلار جىلقىلاردى قۋعاندا بوزايعىردى دا ۇيىرىمەن قوسا اكەتكەن. جولدا ءۇش كۇن بولىپ، ءتورتىنشى كۇنى جەردىڭ، ونى ايداپ كەلە جاتقان ادامداردىڭ بوتەن ەكەنىن سەزگەن بوزايعىر اينالا پىسقىرىنىپ، اۋىلىنا قاشىپ كەلەدى. بوزايعىردىڭ ۇيىرىنەن بۇلايشا ءبولىنىپ كەلۋى تەگىن ەمەس ەكەنىن بىلگەن بايدىڭ بالاسى، ايعىردى جۇگەندەپ، ەرتتەپ، قارۋ-جاراعىن اسىنىپ، جىلقىنىڭ سوڭىنان قۋادى. جىلقىعا جەتىپ، الدىن وراپ ءۇيىردى كەيىن قايىرادى. مۇنى كورگەن قاراقشىلار جان-جاقتان قاۋمالاپ بالانى ورتاعا الىپ، قولعا ءتۇسىرىپ، قورلاماقشى بولادى. ءبىراق ولاردىڭ بۇل ويىن تۇك شىقپايدى. ويتكەنى بالا بوزايعىرمەن ءبىر شەتكە شىعىپ، ۇرىلارعا تۇتقيىلدان ءتيىسىپ، ەكەۋىن قۇلاتادى. قىزىپ العان ايعىر مەن قايتا شاۋىپ، قاراقشىلاردىڭ تاعى ەكەۋىن ءتۇسىرىپ، اۋىلعا قاراي جىلقىمەن بەت بۇرعاندا، بالانىڭ ەندى ۇستاتپايتىنىنا كوزدەرى جەتكەن ۇرىلاردىڭ ءتىرى قالعانى ونى بىلتەلى مىلتىقپەن اتىپ، سانىنان جارالايدى. وق تيگەن بالا بۇرىنعىدان دا
بەتەر وشىگىپ، تۇلا بويىن ىزا كەرنەپ، جارالى سانىن قىل بەلبەۋمەن قاتتى تاڭىپ، قاراقشىلارعا قايتا تيىسەدى. ولاردىڭ قالعاندارىن قۇلاتىپ، جىلقىنى ايداپ اۋىلعا قايتادى. جولشىباي ءبىر توبەنىڭ ەتەگىنە جەتىپ، ىلگەرى جۇرۋگە شاماسى كەلمەي قانسىراپ، اتىنان جىعىلادى. بوزايعىر ارى-بەرى وقىرانىپ، بالانىڭ قاسىنان كەتە الماي، اقىرى بولماعان سوڭ اۋىلعا تارتادى.

بالانىڭ اكەسى بوزايعىردى كورىپ، «بالام ولگەن ەكەن، ەندى نە بولسا دا ىزدەيىن» دەپ جولعا شىعادى. بوزايعىر يەسىنە باس بەرمەي، تاۋدا قالعان بالاعا قاراي ونى الا جونەلەدى. كەلسە، شىنىندا دا بالا ءولىپتى. بالاسىنىڭ ولىمىنە اكەسى قاتتى قايعىرىپ، جىلاپ-ەڭىرەپ وتىرعاندا قاسىندا تۇرعان بوزايعىر وقىرانىپ، كىسىنەيدى. تاعى دا ۇرىلار كەلىپ قالعان ەكەن دەپ، باي زارەسى كەتىپ ورنىنان ۇشىپ تۇرسا، ەرىنىڭ قاسىنا ىلگەن دومبراسى بار، سالت اتتى جالعىز جۇرگىنشى ەكەن. جولاۋشى بالانىڭ جانىنا كەلىپ، اكەسىنە كوڭىل ايتادى. باي بولعان جاعدايدى وعان تۇگەل
باياندايدى. سوندا جولاۋشى:

— شىركىن، جانۋارىم-اي! ات بولسا وسىنداي، ەر بولسا سەنىڭ بالاڭداي بولسىن! «جاقسى ات ەر سۇيەگىن دالاعا تاستامايدى» دەگەن وسى دا. بالاڭا استىنداعى اتى ساي ەكەن. جاقسى ات ەرگە قانات بىتىرەدى دەگەن. مىنا جاعداي ءدال سوعان كەلەدى، — دەپ، دومبىراسىن الىپ، ءبىر كۇيدى تارتىپتى. كۇي كۇڭىرەنە بارىپ اياقتالعاندا بالانىڭ اكەسى:

— زامانداس! مىنا تارتقان قايعىلى سازىڭىزدىڭ اتى قالاي؟ — دەپ سۇراعاندا دومبىراشى:

— باۋىرىم، مىنا تۇرعان بوزايعىرعا رازى بولىپ، سوعان ارناپ تارقان كۇيىم ەدى، اتىن «بوزايعىر» قويدىم. بۇل ايعىر بولماسا، بالاڭ قايدا قالار ەدى، سەن ونىڭ سۇيەگىن قايدان تابار ەدىڭ؟ — دەپتى.

---