بوزشولاق
قۇرمانعازى الپىسىنشى جىلداردىڭ ورتاسى اۋعانشا جيدەلىدە ءجۇرىپ قالادى. وعان سەبەپ بولعان كۇيشىنىڭ پاپاسپەن دوستاسۋى بولادى. ۋاقىتشا سوۆەتكە ءقادىرلى پاپاس ۇندەمەسە دە ونىڭ تورەدەن شىققان تۋىسى، اقسۇيەكتىگى اۋباكىر سياقتىلار باتا المايتىن قورعان بولادى. ءبىراق قۇرمانعازىنىڭ سوڭىنان قالمايتىن اۋباكىر كۇيشىنىڭ تاعى ءبىر جاقسى اتتى بولعانىن ەستىپ، ادامدارىن جىبەرىپ ءبىر تۇندە سارى اتتى ۇرلاتىپ الدىرادى. اتىن ىزدەپ بارعان كۇيشىنى اۋباكىر سوگىپ: «ساعان جاقسى ات نەگە كەرەك؟ اۋەلى اناۋ قۇرىم كيىز جاپقان ءۇيىڭدى نەگە اعارتىپ المايسىڭ، قۇرىمباي مىرزا!» — دەپ كەمسىتەدى. ونىمەن قويماي قارسىلاسار ويى دا جوق تىپ-تىنىش تۇرعان قۇرمانعازىنى قاپىلىستا جىگىتتەرىنە ۇستاتىپ، سىلەيتىپ ساباپ، ەستەن تاندىرىپ تاستايدى. ءتۇن ورتاسىندا عانا كوزىن اشقان قۇرمانعازى ءۇستى-باسى كوك الا قويداي بولىپ ۇيىنە كەلىپ، قالاي كەگىن الۋدى ويلايدى.
اۋەلى بەيبىت جولمەن كورەيىن دەپ، قۇرمانعازى اۋباكىردىڭ سىيلاسى دەگەنمەن، شىمان تورەنىڭ بالاسى جانشاعا بارادى. قۇرمانعازىنىڭ ويىنشا، جانشا وتكەن وقيعانى ەسىنە الماس، بۇل جاسى كەلىپ، دارەجەسى كوتەرىلىپ تۇرعان كەزىندە مەيىرىمى تۇسەر دەيدى. ءبىراق جانشا ساۋ كۇنىندەگى ادەتىنە باسىپ، قۇرمانعازىنى بالاعاتتاپ قۋىپ جىبەرەدى. «باي بايعا قۇيادى» دەگەن وسى ەكەن عوي دەپ، قۇرمانعازى قايتىپ بارا جاتىپ، شىمان اۋلەتىنىڭ جىلقىسىنان ىرىكتەپ ەلۋ اتتى قۋىپ كەتەدى. بۇحارانىڭ اشۋىنان قورقىپ قالعان، كولەڭكەدە وسكەن اقسۇيەكتەر قۇرمانعازىنىڭ سوڭىنان باتىپ قۋا دا المايدى. ءبىراق «جارانىڭ اۋىزىنا تۇز سەۋىپ قايتەمىن»، — دەپ قۇرمانعازى شىمان توبىنىڭ اتتارىن اۋىلىنىڭ قاسىنا الىپ كەلىپ، قۋىپ تاستاپ، ءوزى ءبىراز جەلپىنىپ ءوشىن العانداي بولادى. كەيىن اۋباكىردىڭ قويعان اتى «قۇرىمباي» ەسىنە ءتۇسىپ، «قاندى اۋىزدان شىققان ءسوز ەكەن، ءىزسىز قالماسىن» دەپ ولەڭ شىعارىپ:
سۇراساڭ مەنىڭ اتىم قۇرىمباي-دى،
جايىقتىڭ سۋى ماعان جۇرىنداي-دى.
شىماننىڭ ەلۋ اتىن ءبىر ايدادىم،
قۇرىمباي جاي ادامعا ۇرىنبايدى» دەيدى.
قۇرمانعازىنىڭ بۇل ولەڭى حالىق اراسىنا كەڭ تارالىپ كەتەدى. شىمان اڭگىمە بولعان جەردە وسى ولەڭ ايتىلماي قالمايدى ەكەن دەسەدى.
اۋباكىر دوسى جانشانى ءبىر تىزە بۇكتىرگەن كۇيشىنىڭ بۇل ىسىنە قاتتى ىزا بولادى. قۇرمانعازىنى قالايدا تىنىش جۇرگىزبەۋگە ۋادە بەرەدى. ءوزىنىڭ پىكىرلەس ءبىر ستارشىنىمەن بىرىگىپ: «قۇرمانعازى قوعامعا ءقاۋىپتى ادام» دەپ سول كەزدىڭ جەك كورەتىن ادامىنا قولداناتىن قارۋى — «بەيبىت ۇكىم» جاساپ، كۇيشىنى ۇركىتكە ايداتاتىن بولادى. ونى ەستىگەن قۇرمانعازى تاعى امالسىز تاسالانادى. اۋباكىر جيىرما ستارشىنعا بوبلىك شاشىپ، قۇرمانعازىنى تابىلسا، ۇستاۋ كەرەگىن بىلدىرەدى. ءبىراق ستارشىن بىتكەننىڭ ءبارى دە «قۇرمانعازى ءبىزدىڭ قاراۋىمىزدا جوق» دەپ حابار بەرەدى. ولاردىڭ ىشىندە ورتا دىبىس ستانسيانىڭ دەپۋتتى بەردىنوۆ، بەكبولات ۇستىبايەۆ، جانتىلەسوۆ، ءناۋرىزالين تاعى باسقالاردىڭ اتتارى اتالادى.
كۇندەردىڭ كۇنىندە اۋباكىر قۇرمانعازىنى ۇستاتىپ ايداتادى. كۇيشىنى ساراتوۆقا دەيىن جاي ارباعا مىنگىزىپ الىپ كەلەدى. ارباعا شەككەن بوزشولاقتىڭ ەرىكسىزدىك جاعدايىن تاقىرىپ ەتىپ الىپ، قۇرمانعازى كۇي شىعارادى. كۇيدىڭ اتى «بوزشولاق اتتى بوق دۇنيە» بولادى. كەيىن كۇي «بوزشولاق» اتانىپ كەتەدى. قۇرمانعازى بۇل كۇيدە بوزشولاقتىڭ جۇرىسىنەن باستاپ، ءوزىنىڭ ەرىكسىزدىك ءحالىن سۋرەتتەيدى.
You Might Also Like
-
تال تۇستە بالىق تاڭەرتەڭگى كەزدەي ەمەس، از تۇسەدى، ءتىپتى كەيدە قارماعىڭدى قاپپايدى دا. كەشە مەن بالىققا تاڭنان بارسام دا، قۇر الاقان قايتتىم. ءبارى دوسان ىنىشەگىمنىڭ الەگى.
-
قۇرمانعازىنى تاعى ءبىر اۋىر وقيعا كۇتىپ الادى. جالعىز بالاسى قازي قاتتى اۋىرىپ جاتىر ەكەن. بۇل جاعداي كۇيشىنىڭ جانىن قوزعايدى. بالانىڭ ۋايىمىمەن ۇيىندە استىڭ جوعىن، تۇرمىسىنىڭ قيىندىعىن دا ەلەمەيدى....
