InfoHub Logo

قۇرمانعازىنى تاعى ءبىر اۋىر وقيعا كۇتىپ الادى. جالعىز بالاسى قازي قاتتى اۋىرىپ جاتىر ەكەن. بۇل جاعداي كۇيشىنىڭ جانىن قوزعايدى. بالانىڭ ۋايىمىمەن ۇيىندە استىڭ جوعىن، تۇرمىسىنىڭ قيىندىعىن دا ەلەمەيدى. ءبىراق قۇرمانعازىنىڭ تىلەگى بولىپ، قازي كوپ ۋاقىت توسەك تارتىپ جاتىپ، ايتەۋىر بەتى بەرى قارايدى. ابدەن ارىقتاعان بالا ەندى تەز وڭالىپ كەتۋ ءۇشىن جاقسى تاماق كەرەك بولادى. ونىڭ ۇستىنە كوپ ۋاقىتتان بەرى كۇيشىسىن ساعىنعان ەل ادامدارى، دوستارى اعىلىپ كەلە بەرەدى. بالاسىنا دا، كەلگەن-كەتكەن قوناقتارىنا دا قۇرمانعازى تاماق، قوناقاسى تاۋىپ بەرە المايدى. ويتكەنى، القا مەن بايعازىنىڭ جيعان-تەرگەن قارا-قۇراسىن باياعى اۋەستى قۋعاندا قۇرمانعازىنىڭ ءمىنىپ كەتكەن ەكى اتىنىڭ يەسى، باي سىپىرىپ الادى. ءسويتىپ، كۇيشىنىڭ ءۇي-ىشى تەك ولمەستىڭ كۇنى عانا بولىپ كۇنەلتىپ وتىرادى. باسقاسىنان بۇرىن قۇرمانعازىعا
قوناقتارىن، دوستارىن رازى قىلا الماعانى باتادى. پالەن جاسقا كەلىپ اق-قارانى، ءومىردىڭ نەبىر سوقپاعىن دا، توقپاعىن دا كورىپ، قانشاما ىستىق-سۋىققا كومپىستى بولعانىمەن، مىنا ءبىر جاعداي كۇيشىنىڭ جانىن قاتتىراق تەربەتەدى. قوناقتارى كەتكەسىن قازيدىڭ جانىنا جايلاپ، ىڭىرسىپ:

— سۇراساڭ مەنىڭ اتىم قۇرمانعازى،
قۇتقارماس قاشسا قويان قۇمنان تازى.
ۇيىڭە دوسىڭ كەلىپ قۇرى اتتانار،
قايتەيىن كەدەيشىلىك مالدىڭ ازى.
كۇرەڭنىڭ توبىعىنان تارتتىم تاڭبا،
باي مەنەن باس يمەدىم بيگە، حانعا.
ارىقتاپ سارى اۋرۋدان تۇرعانىندا،
اس تاۋىپ بەرە المادىم قازيجانعا.
ايتايىن ايت دەگەندە ولەڭىمدى،
بىلەمىن ءبىر كۇن بارىپ ولەرىمدى.
و دا ءبىر ماعان بەرگەن باقىت شىعار،
كەتەيىن جايىپ جۇرتقا ونەرىمدى.
قۇرەكەڭ ۇشقان قۇسقا مىلتىق اتقان،
جىگىتكە جاراسپايدى ۇيدە جاتقان.
كەشەگى بۋىرقانعان كەزەڭىمدە،
بايلاردى قابان ەدىم زار جىلاتقان، — دەپ دومبىراسىنا قوسىلىپ اندەتەدى. كۇي تارتادى. بۇل كۇي ەل اراسىندا «قازيجان» اتانىپ كەتەدى.

---