InfoHub Logo

جامبىل – ءوز زامانىنىڭ ۇلى اقىندارىنىڭ ءبىرى. بالا كەزىنەن اقىندىق دارىنىمەن ءوز ورتاسىندا تانىلا باستادى. بۇگىندە مىنە، جامبىلدىڭ تۋعانىنا 175 جىل تولىپ، ەلىمىزدە جامبىلعا ارناپ اتاۋلى مەرەكەلىك ءىس-شارالار وتكىزىلۋدە. جامبىلدىڭ وسىپ-ونگەن توپىراعىندا ان-كۇي، اقىندىق جىراۋالىق ونەر ايرىقشا ورىن العانى ايقىن بايقالدى. ەل ومىرىندەگى تابىس پەن جاڭعىرۋلاردى، جەڭىس پەن ەرلىك ىستەردى ەرەكشە شابىتپەن جىرلاپ جەتكىزگەن. قانداي دۇنيەنى بولماسىن، اقىن كوزىمەن بارلاپ، سۋرەت كۇيىندە تانىپ ۇيرەنگەن جامبىل ومىردەن وتكەنشە وسى اڭعارىمپاز قالپىنان تانعان ەمەس. قاي زاماننىڭ اقىنى بولسا دا، جاي پەندەلەر سەكىلدى ءوز زامانىنا تاۋەلدى. ءوز زامانىنىڭ تۋىندىسى. جامبىل شىعارماشىلىعى دا ءوز ءداۋىرىنىڭ شىندىق ساۋلەسى. ول حالىق ادەبيەتىن، وزىنەن بۇرىنعى اقىندار شىعارمالارىن، اۋىزشا تاراعان جىر-داستانداردى جاتقا بىلگەن. مۇحتار اۋەزوۆتىڭ ايتۋى بويىنشا، ميلليون جول ولەڭدى مۇدىرمەستەن جاتقا ايتاتىن بولعان. سول ميلليوننىڭ ىشىندە قانداي ادەمىلىك، كوركەمدىك ۇلگى جوق دەيسىز؟! كونەنىڭ كوزىمەن جىرلانعان ءار داستاننىڭ جولىندا وزگەشە سارىن بار. ءجۇرىپ وتكەن جولدىڭ ەنشىسىندە قانشاما قايعى-مۇڭ، سوعان ساي قانشاما قۋانىش بار. وسىنىڭ بارلىعىن ولەڭ جولىنا سىيعىزا ءبىلۋ – اقىننىڭ قولىنان عانا كەلەدى.

بۇگىن دە قازاق ەلى جىر الىبىنىڭ 175 جىلدىق مەرەيتويىن سالتاناتتى تۇردە اتاپ وتۋدە. بۇل ايتىلعان ماقالامداعى وي سالاتىن جازبالارىم، قۇندى دەرەكتەر، تانىمدىق دۇنيە، تاربيەلىك ءمانى زور شىعارمالارى، بىزگە قالدىرعان ولشەۋسىز عيبراتى ەكەنىن تاعى دا ءبىر رەت ەسىمىزگە تۇسىرە الدىق دەپ بىلەمىن. جامبىل جىرلارىنىڭ حالىقتار جۇرەگىنەن وشپەس، ولمەس ورىن الۋى-ونىڭ ۇلىلىعىنىڭ بەلگىسى. ۇرپاقتارى باردا ۇلى اقىن جىرى عاسىردان عاسىرعا جاساي بەرەدى!

ەلباسى نۇرسۇلتان ءابىش ۇلى نازاربايەۆ ۇلى جامبىلعا ادامدىق پەن ادامگەرشىلىكتىڭ، ادىلەتتىلىك پەن ىزگىلىكتىڭ الىپ جىرشىسى دەگەن تاريحي باعاسىن بەردى. جامبىل بابامىزدىڭ شىعارماشىلىق مۇراسى حالقىنىڭ تالايعى تاريحي شىنايى ءومىرىنىڭ ايناسى!

جامبىل جابايەۆ ءوزىنىڭ عاسىرعا جۋىق عۇمىرىندا تاۋ مەن دالانى جىرلادى. پوەزيا الەمىندەگى تۋعان حالقىنىڭ ماقتانىشى، الەمدىك دەڭگەيدەگى جىر الىبىنا اينالدى. ونىڭ اقىل-ويعا، پاراساتقا، تەرەڭ تاريحقا، ءمولدىر سىرعا، نازىك سەزىمگە، باي وبرازعا تولى پوەزياسى ولەڭگە قۇشتار، ونەرسۇيەر ءاربىر جاندى ءسۇيسىنتتى. جامبىل بابامىز — ەسىمى قازاق ادەبيەتىندە التىن ارىپتەرمەن قالعان عاجايىپ قۇبىلىس! الىپ تا بيىك، ايدىندى دا ايبىندى جىراۋشى.

---