InfoHub Logo

كوپتەگەن ادامدار وزدەرىنىڭ كاسىبي ماقساتتارى تۋرالى ويلانباي تۇرىپ جۇمىس ىزدەي باستايدى. الايدا جۇمىس ىزدەۋدى باستاماس بۇرىن، ءسىزدىڭ مانسابىڭىزعا قانداي تالاپتار قويىلاتىندىعىن انىقتاپ العانىڭىز ابزال. بۇل ءسىزدىڭ مىقتى جانە ءالسىز جاقتارىڭىزعا وبەكتيۆتى تۇردە قاراۋدى قاجەت ەتەدى. مىسالى، ءسىز وزىڭىزگە ۇيىمداستىرۋشىلىق، ادامداردى جۇمىلدىرۋ سەكىلدى جۇمىس قاجەت دەپ ويلاۋىڭىز مۇمكىن، ءبىراق مۇنى ءسىزدىڭ مىقتى تۇسىڭىز دەپ قابىلداۋعا بولمايدى. ەكىنشىدەن، ءسىز ۇيرەنۋ جاڭا قادامدار جاساۋعا كومەكتەسەتىنىن ۇمىتپاۋىڭىز كەرەك. سونىمەن قاتار، تاعى ءبىر ەسكەرەتىن جايت — ءسىزدىڭ ۇزاق مەرزىمدى ماقساتتارىڭىزعا جەتۋ ءۇشىن، ءسىزدىڭ قىزىعۋشىلىعىڭىزدى قاناعاتتاندىرمايتىن جۇمىستاردى ورىنداۋعا قانشالىقتى دايىن ەكەنىڭىزدى تەكسەرىڭىز. ءوزىڭىزدىڭ مىنەز-قۇلقىڭىزعا باعا بەرە وتىرىپ، قويىلاتىن كاسىبي تالاپتاردىڭ ناقتى جيىنتىعىن جاساپ شىعارۋعا تىرىسىڭىز. اتاپ ايتقاندا، بىرنەشە ماڭىزدى سۇراقتارعا جاۋاپ بەرىڭىز. ءسىز قانداي ءومىر سۇرگىڭىز كەلەدى؟ مىسالى، اۋىلدا نەمەسە قالادا ءومىر سۇرگىڭىز كەلەدى مە؟ بوس ۋاقىت سىزگە قانشالىقتى كەرەك؟ ءسىز ءۇشىن جالاقى ماڭىزدى ما؟ ءسىز تۇراقتىلىقتى ۇناتاسىز با الدە جاڭاشىلدىققا جاقىنسىز با؟ قانداي جۇمىس جاساعىڭىز كەلەدى؟ مىسالى، ءسىز جالعىز نەمەسە ۇجىممەن جۇمىس جاساعاندى ۇناتاسىز با؟ ءتۇرلى ءىس-شارالارىنىڭ ۇيىمداستىرۋشىسى بولعىڭىز كەلەدى مە؟ ءوز تالاپتارىڭىزدى قاناعاتتاندىراتىنداي، ماماندىق تاڭداۋدا تومەندە كورسەتىلگەن باستى تارماقتاردى نەگىزگە الۋعا تىرىسىڭىز: 

جۇمىس جاساۋ ءستيلىن باعالاڭىز. ءسىزدىڭ بويىڭىزدا جەكە جۇمىس جاساۋعا قابىلەتتىلىك، ليدەرلىك قاسيەتتەر باسىمىراق پا نەمەسە سىزگە بەلگىلى ءبىر قۇرىلىممەن جۇيەلەنگەن جۇمىس ورتاسى مەن قاداعالاۋشى قاجەت پە؟ ءسىزدىڭ جۇمىس جاساۋ ءستيلىڭىز سىزگە جالعىز جۇمىس ىستەي الاتىنىڭىزدى نەمەسە ۇجىمنىڭ ءبىر بولىگى بولا الاتىندىعىڭىزدى تۇسىنۋگە كومەكتەسەدى.

ءوز تالانتتارىڭىزدى ءبىلىڭىز. ەگەر ءسىزدىڭ قانداي دا ءبىر ءحوببيىڭىز نەمەسە قابىلەتىڭىز بولسا، ونى ءوز جۇمىسىڭىزبەن بايلانىستىرۋعا تىرىسىڭىز. سوندا سىزگە جۇمىسىڭىز ناتيجەلى جانە ءارى جاعىمدى بولا الادى.

قارجىلىق ماقساتتار قويىڭىز. ءوزىڭىزدىڭ قارجىلىق قاجەتتىلىكتەرىڭىزدى ناقتى انىقتاڭىز جانە قارجىلىق ماقساتتارىڭىزدى قاناعاتتاندىرا الاتىن جۇمىستى تاڭداڭىز.

ءسىز تاڭداعان ماماندىقتى مەڭگەرۋ، ياعني وقۋ ءۇشىن قانشا قاراجات كەتەتىنىن انىقتاڭىز جانە ءسىز ءۇشىن قولجەتىمدىلىگىن زەرتتەڭىز. شاكىرتاقى، بايقاۋلار مەن وليمپيادالار سىندى مۇمكىندىكتەردى قاراستىرىڭىز.

ءوزىڭىزدىڭ قىزىعۋشىلىقتارىڭىزعا سايكەس ماماندىقتار ءتىزىمىن جاساڭىز. سونىمەن قاتار دايىنداعان ءتىزىمدى بارىنشا قىسقارتۋعا دا تىرىسىڭىز. ءسىز مۇنى سىزگە سايكەس كەلەتىن تارماقتار بويىنشا جاساۋىڭىز كەرەك. دۇرىس شەشىم قابىلداۋ ءۇشىن اتا-انالارىڭىزبەن كەڭەسىپ العانىڭىز دا ءجون.

مانساپ جولىنداعى ماقساتتارىڭىز بەن مىندەتتەرىڭىزگە شولۋ جاساپ شىعىڭىز جانە تەك سول ماقساتتارمەن شەكتەلمەڭىز — ءسىزدىڭ جۇمىس جاساۋ جوسپارىڭىز سىزگە جاڭا نارسەنى ۇيرەنۋگە، بىلۋگە سەپتىگىن تيگىزۋى قاجەت.

شونايەۆا داۋلەتبيكە

---