InfoHub Logo

ءىلياس گاۋھار اباي قىزى

قىزىلوردا وبلىسى

 جاڭاقورعان اۋدانى اققۇم بەكەتى

№221 نەگىزگى ورتا مەكتەبى 9- سىنىپ وقۋشىسى

 

ومىردە كەزدەسكەن  قيىندىقتاردى كورە ءجۇرىپ،  دۇرىس قابىلداعان شەشىمىمىز- ەرتەڭگى كۇننىڭ باعدارشامى. ويتكەنى، سەنىڭ تاڭداۋىڭا قاراي ءومىردىڭ كىلتى اشىلادى. سول كىلت ءبىزدى ءوز ورتامىزعا جەتەلەيدى. ولاي بولسا، دۇرىس تاڭداۋ جاساۋ – ادامي ارماننىڭ بيىك شىڭى.

شەشىم دەگەندە ءبارىنىڭ ويىنا تۇسەتىن ءبىرىنشى تاڭداۋ ماماندىققا كەلىپ تىرەلەدى. ماماندىق تاڭداۋ – ماڭىزدى ءىس. ماماندىق تاڭداۋ دەگەن ءوزىڭ اينالىسقىڭ كەلەتىن جۇمىستى تاڭداۋ عانا ەمەس، ءوزىڭ ارالاسقىڭ كەلەتىن ورتانى دا تاڭداۋ. «ماماندىقتىڭ جامانى جوق، ءبىراق ونىڭ كەز كەلگەنىنە يكەمدىلىك قاجەت، بۇل جاي كۇنەلتۋ، تاماق اسىراۋدىڭ عانا جولى ەمەس، ۇلكەن ونەردى، زور شەبەرلىكتى قاجەت ەتەتىن نارسە»، - دەپ جۇسىپبەك ايماۋىتوۆ ايتىپ كەتكەندەي ول – سەنىڭ العا قويعان ماقساتىڭ. ماقساتقا جەتۋ- تەك جاقسى مامان بولۋ ەمەس، سول ماقساتقا جەتۋ جولىنداعى  سەنىڭ ادامدىق قاسيەتىڭ مەن قاجىرلىلىعىڭ. ال، مەنىڭ ماقساتىم – ۇستاز بولۋ. ۇستاز – تاۋسىلمايتىن كەن، توقتامايتىن بۇلاق. مەنىڭ ۇستاز بولعىم كەلەتىن سەبەبى، ءمۇعالىم قورشاعان ورتاعا، بۇكىل الەمگە نۇر شاشىپ تۇراتىن جارقىراعان كۇن سەكىلدى. «ۇستاز... جاراتىلىسىنان وزىنە ايتىلعاننىڭ ءبارىن جەتە تۇسىنگەن، كورگەن، ەستىگەن جانە اڭعارعان نارسەلەردىڭ ءبارىن جاقسى ساقتايتىن، ەشنارسەنى ۇمىتپايتىن، العىر دا اڭعارىمپاز اقىل يەسى»، - دەپ الەمنىڭ ەكىنشى ۇستازى ءال – فارابي اتامىز ايتقانداي، بار الەمگە ءوز بىلگەنىن ۇيرەتىپ، قانشاما جانداردى تاربيەلەپ، ءبىلىم كوزىن اشقان اياۋلى جان – ۇستاز. مەن دە وسىلاي ءوز ەلىمە، سوڭىمنان ىلەسكەندەرگە ۇلتتىق ءقادىر- قاسيەتىمىزدىڭ وزگە ۇلت وكىلدەرىنەن ارتىق تۇراتىن ەڭ قۇندى ەرەكشەلىكتەرىن تانىتا الاتىنداي  ۇلەسىمدى تيگىزگىم كەلەدى. بۇعان سەبەپ، سوڭعى كەزدەرى جاڭالىقتى، تەلەباعدارلامالاردى  قاراپ وتىرساڭ، ۇلتتىق قۇندىلىعىمىزدىڭ- ادامي سانا-سەنىمىمىزدىڭ ەۋروپالىق انايى، ۇلتتىق ەرەكشەلىگىمىزگە جات ادەتتەرىمەن ارالاسىپ، جارتىلاي جالاڭاش كيىم كيگەن نەمەسە ءتۇرلى سالپىنشاقتارمەن ساندەگەن جالتىرباس قىزداردى، سىرعا تاققان جىگىتەردى كورسەتىپ جاتادى. ولاردىڭ بارلىعىنىڭ مەكتەپتە وقىعانى اقيقات، ءبىراق ۇلتتىق نامىس، ۇلتتىق قۇندىلىق دەگەندى بويىنا سىڭىرمەگەنى انىق.   سوندىقتان مەن ساباقتان تىس ۋاقىتتا كونە جىرلار مەن ءسالت-داستۇرىمىزدى وقىپ، ۇيرەنگەندى ادەتكە اينالدىرىپ كەلەمىن. ويتكەنى، ادامدىق قۇندىلىق ءوزىمىزدىڭ سالت-داستۇرىمىزدە تەرەڭ ساقتالعان دەپ ويلايمىن. 

«ادامي كاپيتال – جاڭعىرۋ نەگىزى»،- دەيدى  مەملەكەت باسشىسى «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا. ولاي بولسا، ادامي كاپيتالدى دامىتۋدا جەتەكشى قىزمەت اتقاراتىن مۇعالىمدىك ماماندىق- مەنىڭ ماقساتىم. مەنىڭ ومىرلىك ۇستانىمىم بولعان بۇل ماماندىققا، مەنى قورشاعان ورتا ءوز ۇلەسىن تيگىزدى. سەبەبى، مەن ءوزىمنىڭ اياۋلى ۇستازدارىما قاراپ، بوي تۇزەپ كەلەمىن. ولار- ءومىردىڭ اق پەن قاراسىن ۇيرەتكەن، مەنىڭ دۇرىس تاڭداۋ جاساپ،  دۇرىس شەشىم قابىلداۋىما سەبەپشى بولعان ۇلى ادامدار. ەندەشە، مەنىڭ جۇرگەن ورتام، مەكتەبىم- ارمانىمنىڭ العاشقى باسپالداعى.            

توقسان اۋىز ءسوزدىڭ توبىقتاي ءتۇيىنى، ءبىزدىڭ كەلەشەگىمىزدىڭ كەلبەتى،وركەندەۋى ءبىزدىڭ شەشىمىمىزگە بايلانىستى. سوندىقتان دا دۇرىس تاڭداۋ جاساۋ - بولاشاعىمىزدىڭ اسقار اسۋى.

---