InfoHub Logo

بارلىق ماماندىقتىڭ وزىندىك اۋىرتپاشىلىعى بار ەكەنى راس، ءبىراق ءمۇعالىم بولۋ بارىنەن دە قيىن. ويتكەنى ول ادام تاعدىرىنا جاۋاپتى.

مەكتەپ جىلدارى — كەرەمەت كەزدەر. ءبىراق، مۇعالىمدەر ءۇشىن ول 9 نە 11 جىل ەمەس، 20 نەمەسە ودان دا كوپ جىلدار بولۋى مۇمكىن. كوپ جاعدايعا قالجىڭمەن جەڭىل قاراي بىلمەسەڭ، مەكتەپتە وسىنشاما ۇزاق ۋاقىت ءجۇرىپ-تۇرۋ دا قيىن. ءيا، وقۋشىلارمەن دە ءجيى ازىلدەسىپ، وز-وزىڭە دە كۇلكىمەن قاراپ، سونداي-اق ارىپتەستەرمەن دە مىندەتتى تۇردە قالجىڭداسىپ تۇرعان ءجون بولار.

1. وقۋشىلارعا ايعايلاپ بەرۋ نەمەسە ودان دا جامانى

ۇستازدىق كيەلى ءارى وتە كونە ماماندىق. ادامزاتتى ەجەلدەن ويلاندىرىپ،تولعاندىرىپ كەلە جاتقان،قوعامدىق قۇرىلىس وزگەرىپ جاتسا دا، قاجەتتىگىن جويمايتىن ماڭىزدى ماسەلە — جاس ۇرپاقتى ءومىر سۇرۋگە دايىنداۋ. بۇل قيىننىڭ — قيىنى. كەيدە شىدامىڭ تاۋسىلىپ، ايعايلاپ بەرۋىڭ مۇمكىن، ارينە، نەگىزى بولمايدى عوي. ءمۇعالىم ايعايدان كوپ پايدا تاپپاس. مۇندايدا توزىمدىلىك تانىتۋعا تۋرا كەلەدى. مۇعالىمگە ءتان ەڭ ءبىرىنشى قاسيەت – بالانى قۇرمەتتەۋ.

2. ساباققا كەشىگۋ. ءمۇعالىمنىڭ كەشىگۋى

ءوزىڭ وقۋشى بولىپ جۇرگەندە، ءمۇعالىمنىڭ جاعدايى وقۋشىنىڭ جاعدايىنا قاراعاندا جەڭىلىرەك، جاقسىراق بولىپ كورىنەدى. پارتادا وتىرمايسىڭ، ءۇي جۇمىسىن جاسامايسىڭ — تەك تاپسىرما بەرەسىڭ دە جۇرەسىڭ. ال شىندىعىندا، مۇعالىمدەرگە دە مەكتەپكە كەشىگىپ كەلۋگە بولمايدى، وعان قوسا تەكسەرۋ ءۇشىن ۇيگە اكەتىلەتىن قانشاما جۇمىس بار، ال ديرەكتورمەن، ادىسكەرمەن جانە وقۋ ءىسىنىڭ مەڭگەرۋشىسىمەن قارىم-قاتىناس كەيدە كىنالى وقۋشىنىڭ ۋايىمىنان دا كوبىرەك ۋايىم اكەلەدى.

3. لاقاپ اتقا يە بولۋ. بىرنەشە جىلدان كەيىن تاعى بىرەۋىن يەلەنۋ.

مەكتەپتە ءمۇعالىمنىڭ ءبىرىن جاقسى كورسە، ەندى ءبىرىن ۇناتپاي جاتادى. جانە وقۋشىلاردىڭ وزىڭە قالاي قارايتىنى تۋرالى بىلۋىڭە تۋرا كەلەتىنى راس. قالاي بولعاندا دا، ءمۇعالىمنىڭ مىندەتى — وقىتۋ. ال ءستيلدى تاڭداۋ اركىمنىڭ ءوز ەركىندە: ءىش پىستىراتىن، كوڭىلدى، قاتال، ناشار، جالقاۋ ت.ب.

4. كەيدە 25/8 رەجيمىندە جۇمىس ىستەۋ

بۇگىنگى كۇن ءمۇعالىمنىڭ كوپ ىزدەنىپ، تىنىمسىز ەڭبەكتەنۋىن، ساباق بەرۋدىڭ امال–تاسىلدەرىن جەتىلدىرىپ وتىرۋدى قاجەت ەتەدى. ويتكەنى، وقۋشىلار، ءبىلىم مازمۇنى، وقىتۋ ستاندارتتارى مەن ءۇردىسى وزگەرىپ تۇرادى، ۇنەمى جاڭا تالاپتار پايدا بولىپ جاتادى.

بۇل ارادا وقۋشىلارعا ءپانىڭدى ۇيرەتىپ ۇلگەرۋ دە كەرەك. وعان قوسا ساباقتى قىزىقتى ەتىپ وتكىزۋ، ەلەكتروندى جۋرنال تولتىرۋ، داپتەر تەكسەرۋ، ەرتەڭگى كۇننىڭ ساباق جوسپارىن جازۋ، سىنىپ جەتەكشىنىڭ قۇجاتتارى، ونىڭ سىرتىندا سان الۋان مالىمەتتەر مەن حابارلاما، حاتتامالار سياقتى ءبىر ادامنان اسىپ ارتىلاتىن جازبا جۇمىستارى. ءتۇرلى بايقاۋلار مەن كونفەرەنسيا، سەمينارلارعا دايىندىق... ال قالعان بىرنەشە ساعات ۇيگە قايتاتىن جولعا عانا جەتەتىن سياقتى.

5. بالالار نازارىن اۋدارۋدىڭ 55 ءادىسىن ويلاپ تابۋ

ءبىرىنشى ساباق نە سوڭعى ساباق بولۋىنا قاتىستى وقۋشىلاردىڭ ۇيقىسى كەلۋى مۇمكىن، ەشتەڭە ىستەگىسى دە، ەستىگىسى دە كەلمەۋى مۇمكىن. ءتۇرلى سەبەپتەرگە بايلانىستى ساباقتا بالالاردىڭ نازارىن وزىڭە اۋدارۋ وڭاي ءىس ەمەس. جانە سول نازارىن اۋدارا الۋ — كەز-كەلگەن ءمۇعالىمنىڭ باستى مىندەتى دە شىعار.

وسىنداي قىزىعىنان قيىندىعى، زەينەتىنەن بەينەتى باسىم جولدى تاڭداعان ءقادىرلى ۇستازداردىڭ ءاردايىم رۋحى وردە، ورنى توردە بولسىن!

---