ەكى مەيرام
«ەڭبەكشى قازاق» گازەتى ءوزىنىڭ 2 جاس تولىپ، 3 جاسقا اياق باسقان كۇنى بولعاندىقتان، بۇگىنگى ۇلى وكتيابر توڭكەرىسىمەن بىرگە مەيرام ەتىپ، جالىندى سالەم، اشىق جۇزىمەن وقۋشىلارىنا بوي كورسەتىپ وتىر.
«ەڭبەكشى قازاق» گازەتى، جالپى مادەنيەتى تومەن، شارۋاسى باياۋ، قاراڭعى ەلدى اعارتۋ جولىندا، قولىنان كەلگەن كومەگىن بەرىپ، ءجون سىلتەۋدە شاماسى كەلگەنشە تارتىنىپ قالعان جوق. ءبىراق ەڭبەكشىل ەل الدىندا بارلىق مىندەتىن وتەپ، ماقساتىنا جەتتى، بورىشىن تولىق اتقاردى دەي المايمىز. ويتكەنى قازاقستان استاناسىندا شىعىپ، ەن دالاداعى جالشىلار تابىنىڭ سۋرەتىن ايناداي اشىپ، كوزگە ەلەستەتە العان جوق. ورتالىققا قولى جەتپەي، بىرەن-ساراڭ تىرناقتىلاردىڭ جابىرىنە تۇسكەن كەيبىر مومىنداردىڭ مۇنىڭ شاعىپ، مۇددەسىن ايتۋدا ءالى دە بولسا قاراڭعىلىقتان قۇتىلا الماعانىن كورىپ وتىرمىز.
مادەنيەت جۇزىندە كەيىن قالعان قازاق حالقى سياقتى قاراڭعى ەل الدىندا ءوزىنىڭ ۇستاعان جول، قۇرعان پلاندارىنىڭ (جوسپار) مىڭنان ءبىرىن دە وتەگەن جوق دەسەك تە، جالشىلار تابىنا سەزىم بەرىپ، سانا ورناتۋ، تاپ جىگىن ايىرۋ سىقىلدى ءىرى ماقساتقا ەرەكشە نازار سالىپ، ماڭىزىن كوبىرەك اۋداردى، «ەڭبەكشى قازاق» ءالى دە وسى جولمەن بارۋىنا جالپى دالا كەدەيلەرىنىڭ الدىندا سەنىمدى ۋادەسىن بەرە الادى.
قاراڭعى ەل ىشىنە سانا ورناتاتىن، ساياسي ءبىلىم بەرىپ، مادەنيەتىن گۇلدەندىرەتىن ءار حالىقتىڭ ءوز تىلىندە شىعىپ تاراعان گازەت-جۋرنالى دەسەك، «ەڭبەكشى قازاق» گازەتى دە، ءوزىن ءسۇيىپ وقۋشىلارىنا ءقادىرى قىمبات ازدى-كوپتى بەرگەن ماعلۇماتىمەن، كوپ كەمشىلىكتەرىنە وقۋشىلارىنان كەشىرىم سۇراپ، ءۇش جاسقا قاراعان جىلىندا شاماسىنان كەلگەنىنشە جۇرت پايداسى تابىلار دەگەن ءىرى ماسەلەلەردى شەشىپ وتىرماقشى.
الداعى جىلدا «ەڭبەكشى قازاقتىڭ» كۇتكەن ماقساتتارى: قازاق ءتىلىن قولدانۋ، تۇراقسىز كەمشىلىكتى تاستاپ، عىلىم-بىلىمگە بەيىمدەيتىن وتىرىقشىلىقتى قولدانۋ، ەل ىشىندە شارۋا ۇيىمدارىن اشىپ، تۇرمىستارىن جوندەۋگە جول كورسەتۋ، ەل ىشىندەگى بۇزىقتارمەن كۇرەسۋ، الەۋمەتشىلىك تۇرمىسىنان تۇسىنىك بەرىپ، ەسكى ادەت-عۇرىپتاردىڭ كەرەكسىزدەرىن تامىرىمەن قۇرتۋ، ايەلدەر بوستاندىعى ءۇشىن قالىڭمال الۋشىلارمەن كۇرەسۋ ءام وقۋ وقىتۋ جولىندا جول سىلتەپ، جەتە ماعلۇمات بەرىپ تۇرماقشى.
گازەت كەي ساحارادا جايىلعان قاراڭعى ەل ەڭبەكشىلەرىنىڭ اراسىنا تارالىپ، ساياسي سەزىم، جاڭا تۇرمىس ورناتۋدا كوزدەگەن نىساناسىنا جەتە بەرمەك...
07.11.1923 جىل
You Might Also Like
-
قازاقستان باسپاسوزدەرى تۋرالى جازعاندا الدىمەن گازەت-جۋرنالداردان باستاۋعا تۋرا كەلەدى. كەڭەس ۇكىمەتى ورناعاننان بەرى قازاقستاندا باسپا ءسوز جۇمىسىنان ءبىرىنشى قولعا العانى گازەت، جۋرنال جۇمىسى. وسى ق...
-
ءۇش جىلدان بەرى جەر ءجۇزىنىڭ پاتشاشىلدارى، بايلارى، باستىعى انگليا، فرانسيا، جاپونيا ءھام باسقا مەملەكەتتەر كەڭەس ۇكىمەتىن قۇرتپاق بولىپ، جان-جاعىنان كوك نايزالارىن سالىپ باقتى. انگليا، فرانسيا، جاپون...
