InfoHub Logo

جامبىل وبلىسىندا ون توعىزىنشى عاسىردىڭ اياق كەزىندە ءبىر بايدىڭ اسى بولىپ، ۇلكەن جيىن بولعان ەكەن. سول كوپ جيىننىڭ ىشىندە وڭتۇستىك قازاقستاننان ءبىر سال، ارقادان ءبىر سال كەلگەن ەكەن. ول ەكەۋىنىڭ دە وزگە جۇرتتان ءسان-سالتاناتى ەرەكشە بولىپ، كوپشىلىكتىڭ كوڭىلىن اۋدارسا كەرەك.

ۇلى ءجۇزدىڭ جىگىتتەرى:

— ءبىزدىڭ وڭتۇستىكتىڭ سالىنىڭ سالتاناتى، ات-تۇرمانى، كيىمى ارتىق.

ارقا ەلىنىڭ جىگىتتەرى:

— ارقانىڭ سالىنىڭ سالتاناتى ارتىق، — دەپ باسەكە، تالاس سوزدەر بولسا كەرەك. سول توپتا ارقانىڭ سالى بىلاي دەپتى وڭتۇستىكتىڭ سالىنا:

— ەرتەڭ ەكەۋىمىز ادام بالاسى كيمەگەن كيىم، ادام بالاسى مىنبەگەن اتقا ءمىنىپ كەلەمىز. ماقۇل ما؟

— ماقۇل.

— ەرتەڭ تۇستە وسى توپقا كەلەمىز، — دەسىپ كەتىستى.

ەل اسىعا كۇتۋدە. سالدىڭ كيگەن كيىمى مىنانداي ەدى: شۇباتىلعان كەڭ شالبارىنىڭ بالاعىنىڭ ىشىنە ءبىر قىز سىيىپ وتىرادى ەكەن. تورعىننان، جىبەك شاعيلاردان تىككەن كيىمدەرىنىڭ اينالاسىن وقالانعان، باستا ۇكىلى قۇندىز بورىك، كەستەلەپ، مارجانداپ، مونشاقتاپ وقالاعان. مىنگەندەرى جورعا، ۇستىندە كەستەلى كەجىم، جالىن دەيىن مارجانداپ بەزەندىرىلگەن، ۇستىندە سوم كۇمىس ەر-توقىم، قۇيىسقانداپ، ومىلدىرىكتەپ تاستالعان. ءبىر تۇيەگە ەكى ساندىق ارتقان، ءىشى تولعان اسىل كيىمدەر، جولداستارى دا بىركەلكى كيىنگەن. حالىق ەكى سالدىڭ كەلۋىن كۇتىپ، ەرتەڭىن دە ءتۇس بولماي جينالدى. توپتىڭ ءبىر شەتىنەن وڭتۇستىكتىڭ سالى كەلدى. استىندا شوقتىعىنا قول جەتكىسىز بوز جورعا ارعىماق، ءتورت اياعىنا كۇمىس بىلەزىك سالعان، جال-قۇيرىعىن وقالاعان قوزا مارجانمەن وقالاعان كەجىم، ۇكىلەپ تاستاعان. ۇستىنە كيگەن كيىم دە كەشەگى كيىمنەن ەكى ەسە ارتىق كيىنگەن. جولداستارى دا ءبىر تۇستە كيىنىپ، ءبىر ءتۇستى اتتار مىنگەن. ەل تاڭعالىپ تۇرىسادى. «مىنادان ارقانىڭ سالى قالاي ارتىلتا الار ەكەن» دەپ، وڭتۇستىك جىگىتتەرى كوتەرىلىپ تۇر.

حالىق ەندى ارقانىڭ سالىن كۇتۋدە، ول بۇدان ارتىق قانداي سالتاناتپەن كەلەر ەكەن دەپ. ءبىر كەزدە كەلە جاتقان توبى كورىندى. ىلعي اقبوز ات مىنگەن، اق كيىم كيگەن، قاتار تۇزەپ، سالتاناتپەن كەلە جاتىر. سال كورىنبەيدى. حالىق توبىمەن كۇتىپ تۇر. جاقىنداپ كەلگەندە سالدىڭ جولداستارى
قاق جارىلىپ، ورتاسىنان ارقانىڭ سالى شىعا كەلدى. استىندا كۇمىس ەر-توقىم ەرتتەلگەن قابان شوشقا، كۇمىس جۇگەن، ۇستىندە كەجىم جاپقان، مارجانداپ، وقالاپ، ومىلدىرىكتەپ تاستاعان. ال ۇستىنە كيگەنى قۇرىم كيىزدەن شاپان، شالبار، قالپاق تىكتىرىپ كيىپتى. اينالاسىن وقالاپ، قۇندىز ۇستاپ ادەمىلەگەن. ەل مۇنى كورىپ ءتىپتى تاماشالادى. ارقانىڭ سالى يۋكتىڭ سالىنا:

— ءبىز كەشە ۋادەلەسىپ ەدىك قوي. ادام بالاسى كيمەگەن كيىم، ادام بالاسى مىنبەگەن ات ءمىنىپ كەلەيىك دەپ. ال سەنىڭ مىنا ارعىماعىڭدى اركىم مىنەدى. مىنا كيىمدەرىڭدى دە اركىم كيەدى. ال مىنانداي قۇرىم كيىزدەن كيىم كيىپ، شوشقا مىنگەن ادام بالاسى جوق شىعار، — دەپ ارقانىڭ سالى جەڭىپ كەتىپتى.

مىڭ توعىز ءجۇز ەلۋىنشى جىلى شىمكەنت قالاسىندا تۇراتىن جاروللا ساتىپالدييەۆ بالا كەزىندە كورگەن ەكەن. سول قارتتان ەستىگەن اڭگىمە.

---