ەلىمىزدىڭ جوعارعى وقۋ ورىندارىنىڭ كوشباسشىسى - قازۇۋ
قازىرگىدەي ءبىلىمنىڭ ءقادىرى بارىنشا ارتقان، اقپاراتتى تەحنولوگيالار زامانىندا ەلىمىزدە جوعارى ءبىلىم بەرۋمەن اينالىساتىن مەكەمەلەر از ەمەس – بۇل، ارينە زاڭدى قۇبىلىس. الايدا سول تولىپ جاتقان وقۋ ورىندارىنىڭ ءبارى بىردەي زامان، قوعام تالابىنا تولىق جاۋاپ بەرەدى دەپ ايتۋ قيىن.
جوعارعى وقۋ ورىندارىنىڭ ىشىندەگى شوقتىعى بيىك، دارا ۋنيۆەرسيتەت – ۇستىمىزدەگى جىلى 85-جىلدىق مەرەيتويىن اتاپ وتكەن، كونەكوز ۋنيۆەرسيتەت – ءال-فارابي اتىنداعى قازاق ۇلتتىق ۋنيۆەرسيتەتى بولىپ تابىلادى. بۇل ۋنيۆەرسيتەت ءوزىنىڭ ۇزاق عۇمىرىندا قالىپتاسقان بايىپتى دا بايسالدى تاجىريبەسىمەن ەرەكشەلەنەتىن ءداستۇرشىل وقۋ ورنى عانا ەمەس، سونداي-اق زامانا تالابىنا دەر كەزىندە جاۋاپ بەرۋشى، ءبىلىم بەرۋدىڭ جاڭا تەحنولوگيالارىن ءبىرىنشى بولىپ يگەرۋشى، جاڭاشىل ۋنيۆەرسيتەت تە. بۇل باعىتتا ۋنيۆەرسيتەتتە سوڭعى جىلدارى ەلباسىمىز ن.ءا.نازاربايەۆتىڭ تاپسىرماسىن ىسكە اسىرۋدا كوپ جۇمىستار اتقارىلۋدا.
قازاقستاندىق ۋنيۆەرسيتەتتەردىڭ ىشىندە العاش رەت – ءال-فارابي اتىنداعى قازۇۋ الەمدەگى 800 ەڭ ۇزدىك ۋنيۆەرسيتەتتەر اراسىندا 207 ورىنعا يە بولىپ، QS «World University Rankings» حالىقارالىق رەيتينگىسىندە تاعى 13 ورىنعا كوتەرىلدى. بۇل توپقا پوستكەڭەستىك كەڭىستىكتەن تەك ەكى ۋنيۆەرسيتەت كىرەدى: قازۇۋ جانە لومونوسوۆ اتىنداعى ماسكەۋ مەملەكەتتىك ۋنيۆەرسيتەتى (رف).
ۋنيۆەرسيتەتتىڭ ءبىلىم بەرۋ ساپاسىن ارتتىرۋ جانە حالىقارالىق رەيتينگىسىن كوتەرۋ باعىتىنداعى ءىس-شارالارعا تاريح، ارحەولوگيا جانە ەتنولوگيا فاكۋلتەتى دە ءوز ۇلەسىن قوسۋدا. فاكۋلتەتتە «تاريح»، «ارحەولوگيا» جانە «ەتنولوگيا»، «مۇراجايتانۋ جانە ەسكەرتكىشتەردى قورعاۋ»، «مۇراعاتتانۋ، قۇجاتتانۋ جانە قۇجاتتارمەن قامتاماسىز ەتۋ»، «كىتاپحانا ءىسى» سياقتى نەگىزگى ماماندىقتارىمەن بىرگە، ۇستىمىزدەگى وقۋ جىلىندا «تاريح جانە گەوگرافيا»، «باسقارۋدى قۇجاتتامامەن قامتاماسىز ەتۋ جانە ارحيۆتەردەگى اقپاراتتىق تەحنولوگيالار» جانە باسقا دا ءبىرقاتار قوعامدا سۇرانىسقا يە بولىپ وتىرعان جاڭا ماماندىقتار بويىنشا وقۋ باعدارلامالارى جاسالىپ، وقۋ ۇدەرىسىنە ەنگىزىلدى. اتالمىش ماماندىقتار بويىنشا ءبىلىم بەرۋ فاكۋلتەتتىڭ ءۇش كافەدراسى – «قازاقستان تاريحى»، «دۇنيە ءجۇزى تاريحى، تاريحناما جانە دەرەكتانۋ»، «ارحەولوگيا جانە ەتنولوگيا» كافەدرالارىنىڭ بازاسىندا جۇزەگە اسىرىلادى.
فاكۋلتەت ءبىرقاتار جىلداردان بەرى بولونيا ۇدەرىسى ەلدەرىمەن بەلسەندى ارىپتەستىك قىزمەتىن جالعاستىرىپ كەلەدى. سونىڭ ىشىندە ءبىلىم بەرۋ ءىسىن ينتەرناسيوناليزاسيالاۋ باعىتىنداعى ءىس-شارالارعا دۇنيە ءجۇزى تاريحى، تاريحناما جانە دەرەكتانۋ كافەدراسى دا ءوز ۇلەسىن قوسۋدا. وسى باعىتتاعى اسا ماڭىزدى جەتىستىك – ءال-فارابي اتىنداعى قازۇۋ مەن الەمنىڭ بەلگىلى ۋنيۆەرسيتتەتەرى – رەسەي مەملەكەتتىك گۋمانيتارلى ۋنيۆەرسيتەتى، يتاليانىڭ لا-ساپيەنزا ۋنيۆەرسيتەتى، سونداي-اق تۇركيانىڭ ستامبۋل ۋنيۆەرسيتەتتەرىمەن قوس ديپلومدىق ءبىلىم بەرۋ باعدارلاماسى بويىنشا ماماندار دايىنداۋ تۋرالى كەلىسىمنىڭ جاسالۋى بولىپ تابىلادى. ۇستىمىزدەگى جىلى اتالمىش كەلىسىمدەر ءىس جۇزىنە اسىرىلىپ، ەڭ العاشقى قوسديپلومدى ماماندار دايىندالىپ تا شىعارىلدى. اتاپ ايتقاندا، ءال-فارابي اتىنداعى قازۇۋ جانە يتاليانىڭ لا ساپيەنسا ۋنيۆەرسيتەتتەرىنىڭ ديپلومىن قاتار العان سەيلبەكوۆا مەرۋەرت جانە ءال-فارابي اتىنداعى قازۇۋ جانە رمگۋ-دىڭ ديپلومدارىن قاتار العان جۇنىسبايەۆا ايدا دۇنيە ءجۇزى تاريحى، تاريحناما جانە دەرەكتانۋ كافەدراسىنا وقىتۋشىلىق قىزمەتكە قالدىرىلدى.
سونداي-اق، كافەدرادا ماماندار دايارلاۋ اياسىندا ەۋروپا، اقش، رەسەي، كورەيا جانە تۇركيانىڭ ەڭ ۇزدىك جوو-مەن جانە عىلىمي ۇيىمدارىمەن قىزمەتتەستىك بايلانىستار ورناتىلعان. كافەدرا ماگيسترانتتارى اتالمىش ۋنيۆەرسيتەتتەردە عىلىمي-زەرتتەۋ تاعىلىمنامالارىنان تۇراقتى تۇردە ءوتىپ تۇرادى. سونىمەن بىرگە، اتالمىش شەتەل ۋنيۆەرسيتەتتەرىنەن عالىمدار شاقىرتۋ ءىسى جولعا قويىلعان. اتاپ ايتقاندا، كافەدرانىڭ شاقىرتۋىمەن 2017 جىلدىڭ 16 قازانى – 30 قاراشاسى ارالىعىندا نيەۆادا ۋنيۆەرسيتەتىنىڭ (اقش) پروفەسسورى پول ۆەرت كەلىپ، ستۋدەنتتەر مەن ماگيسترانتتارعا «باتىستاعى يمپەرياتانۋ» اتتى كۋرسىن وقىسا، 2018 جىلدىڭ 12 قازانى –2019 21 قاڭتارى ارالىعىندا ۆاشينگتون ۋنيۆەرسيتەتىنىڭ پروفەسسورى م.ا. تولماچيەۆا فۋلبرايت (Fulbright) باعدارلاماسى بويىنشا «ەۋرازيا تاريحى الەمدىك بايلانىستاردا» اتتى كۋرسىن وقىدى. ال ۇستىمىزدەگى جىلدىڭ 1 ناۋرىزى – 11 ءساۋىرى ارالىعىندا وقىلعان ميننەسوتا ۋنيۆەرسيتەتىنىڭ (اقش) پروفەسسورى كولەن ماكفاددەننىڭ دارىستەرى فاكۋلتەت ستۋدەنتتەرى مەن ماگيستراننتارى تاراپىنان زور قىزىعۋشىلىق تۋعىزدى. قازىرگى تاڭدا دۇنيە ءجۇزى تاريحى، تاريحناما جانە دەرەكتانۋ كافەدراسىنىڭ شاقىرتۋىمەن فاكۋلتەتتە ۆارشاۆا ۋنيۆەرسيتەتىنىڭ وقىتۋشىسى يرەنا سكۋبا جانە ۆيسكونسون ۋنيۆەرسيتەتىنىڭ وقىتۋشىسى نوتان سنودگراسس دۇنيە ءجۇزى تاريحى بويىنشا ءبىرقاتار پاندەردەن ساباق بەرۋدە.
مۇنداي تابىستار ۋنيۆەرسيتەتىمىزدىڭ ءاربىر فاكۋلتەتىندە، ءاربىر كافەدراسىندا بار دەسەك ارتىق ايتقان بولمايمىز. ۇلتتىق ۋنيۆەرسيتەتتەگى سوڭعى جىلدارى قول جەتكىزىلگەن وسى جەتىستىكتەردىڭ بارلىعى دا ۋنيۆەرسيتەت تۇلەكتەرىنىڭ الەمدىك نارىقتاعى باسەكەگە قابىلەتتىگىن ەسەلەپ ارتتىرىپ وتىر.
قازىرگى تاڭدا ەلباسى جانە ۇكىمەت قازاقستاننىڭ جوعارى وقۋ ورىندارىنا الەمدەگى ەڭ ۇزدىك 200 جوو قاتارىنا كىرۋ مىندەتىن قويىپ وتىر. قازۇۋ الەمدىك كەڭىستىكتە مويىندالعان ەلىمىزدىڭ جەتەكشى ۋنيۆەرسيتەتى رەتىندە وسى ماڭىزدى مەملەكەتتىك تاپسىرمانى ىسكە اسىرۋدا ماقساتتى جۇمىس اتقارۋدا. ءبىزدىڭ ۋنيۆەرسيتەتتىڭ جاقىن بولاشاقتا بۇل بەلەستى باعىندىرۋعا عىلىمي، وقۋ-مەتوديكالىق جانە كادرلىق پوتەنسيالى تولىق جەتەتىندىگىنە ءبىز – وسى ۋنيۆەرسيتەتتىڭ وقىتۋشى-پروفەسسورلار قۇرامى جانە ستۋدەنتتەرى تولىق سەنىمدىمىز.
جاساي بەر قازۇۋ – ەلىمىزدىڭ ءبىلىم بەرۋ سالاسىنىڭ كوشباسشىسى!
قارتابايەۆا ە.ت.،
دۇنيە ءجۇزى تاريحى، تاريحناما جانە دەرەكتانۋ
كافەدراسىنىڭ دوسەنتى، ت.ع.ك.
قۇرمانبەك ا. 2 كۋرس ماگيسترانتى
You Might Also Like
-
قارجىنى قاسىقتاپ جيناپ ءجۇرىپ، شومىشتەپ توگەتىن كەيبىر قانداستارىمىزدىڭ بۇگىنگى كۇيى ادام الاڭداتارلىق بولىپ وتىر. ەجەلگى قارىزدى قويىپ، ەندىگىدە بىرەۋدەن سۇراپ العان اقشاسىن «كرەديت» دە...
