InfoHub Logo

ەمتيحان — ءار ستۋدەنت ءومىرىنىڭ اجىراماس بولىگى جانە ول ادامدى كۇيزەلىسكە دۋشار ەتپەي، سالماق سالماي ءوتۋى ءتيىس. وسى ماقالادا كەلتىرىلگەن كەڭەستەر ەمتيحاننان سۇرىنبەي وتۋگە كومەكتەسەدى، سونداي-اق، تەست تاپسىرار، پرەزەنتاسيامەن ءسوز سويلەر الدىندا جانە باسقا دا تاپسىرمالاردى ورىنداۋدا پايدالى بولماق.

1- ەمتيحان تۋرالى نەعۇرلىم كوبىرەك ءبىلۋ كەرەك. دۇشپاننىڭ سىرىن ءبىلۋ قاجەت. ستۋدەنت ەمتيحان قالاي وتەتىنى تۋرالى نەعۇرلىم كوبىرەك بىلسە، سوعۇرلىم جاقسىراق دايىندالادى. مىسالى، ەمتيحان قالاي وتەتىتىن: اۋىزشا ما، تەست پە، الدە ەسسە تۇرىندە مە، تەست بولسا، ءار سۇراق نەمەسە ەسەپ قالاي باعالاناتىنىن ءبىلىپ الۋ كەرەك.

1- كومەك سۇراۋ. شىنىمەن كومەك كەرەك بولسا، وعان ۋايىمداپ، ۇيالۋدىڭ قاجەتى جوق. وقىتۋشىلاردان جانە تابىستى ستۋدەنتتەردەن كومەك الىپ، قاجەتسىز كۇيزەلىستەن، ۋايىمنان ارىلىپ، ەمتيحاندى جاقسى تاپسىرىپ شىعۋعا بولادى.

3- ەمتيحان تاپسىراتىن ءپان بويىنشا ماتەريالداردى سۇرىپتاپ، دايىنداۋ. ارينە، ودان بۇرىن قاجەت ماتەريالدىڭ ءبارى قولىڭىزدا بار ەكەنىنە كوز جەتكىزىپ الۋ كەرەك. كەي ستۋدەنتتەر قايتالاۋ جوسپارىن قۇرۋ ءۇشىن كۋرستىڭ مازمۇنىن پايدالانادى. ەمتيحاندى وقۋلىقتاعى ماتەريال نەگىزىندە تاپسىراتىن بولساڭىز، ءار تاراۋداعى ەڭ ماڭىزدى دەگەن فاكتىلەر، سيفرلەر مەن سانداردى ءتىزىپ، قىسقاشا تۇيىندەمە جاساپ الۋ پايدالى بولماق. بۇل بۇكىل كىتاپتى تۇتاس قايتا وقىماي، ماڭىزدىسىن عانا قايتالاۋعا مۇمكىندىك بەرەدى.  

4- ەمتيحان وتەتىن ۋاقىتىن، ورنىن ءبىلىپ، كەرەك زاتتاردىڭ ءبارىن قولدا ۇستاۋ. كەرەك زاتتارىڭىزدى الدىن-الا تۇگەندەپ، ازىرلەپ قويۋ كەرەك. ودان بولەك، ەمتيحان تاڭەرتەڭ وتەتىن بولسا، وعان بىرنەشە كۇن قالعاندا-اق ۇيقىڭىزدى قاندىرىپ، ەرتە تۇرۋعا داعدىلانا بەرۋ كەرەك. بۇل ءدال ەمتيحان كۇنى ۋاقىتىندا ويانا الماي قالۋ ءقاۋپىن ازايتادى.

5- سابىر ساقتاپ، ەمتيحان تۋرالى ءسوزدى كوبەيتە بەرمەۋ. ەمتيحانعا دەيىن دە، ودان كەيىن دە تەك ول تۋرالى ايتا بەرۋدىڭ قاجەتى جوق. بۇل ناتيجەنى جاقسارتپايدى، كەرىسىنشە، قوبالجۋدى ارتتىرادى. ەمتيحان ءوتىپ كەتكەننەن كەيىن ول تۋرالى ايتا بەرۋ ناتيجەسىنىڭ دۇرىستىعىنا دەگەن كۇماندى ارتتىرىپ، كوپ قاتە كەتكەن سياقتى كورىنە باستايدى.

بۇل كەڭەستەر — ستۋدەنت ەمتيحاندى ءساتتى تاپسىرۋ ءۇشىن ىستەي الاتىن ارەكەتتەرىنىڭ كەيبىرەۋى عانا. وقۋ ورنىن ءبىتىرىپ كەتكەندەرمەن دە سويلەسىپ العان پايدالى بولماق. ولار ستۋدەنتكە جاقسى ىقپال ەتەتىن قوسىمشا ستراتەگيالارىمەن ءبولىسۋى مۇمكىن. دايىندالۋدىڭ ءتۇرلى ادىس-تاسىلدەرىن بايقاپ كورىپ، سودان كەيىن وزىڭىزگە ەڭ لايىقتىسىن تاڭداپ الۋعا بولادى.

---