ەركەك بەس ءتۇرلى
ءومىردى كورىپ ءجۇرىپ، ءومىردى سۋرەتتەگەن جازۋشىلاردى وقىپ ءجۇرىپ، مەن ەركەك اتاۋلىنى بەس توپقا بولەم:
ءبىرىنشى — ايەلدى اۋلامايدى. سالقىن قاندى، كوتەرەم جاندى. ومىردەگى ايەلگە بىتكەن كورىكتىڭ، جالىن قۇشاقتىڭ، نازىك سەزىم، قىزبالىقتى قىلىقتىڭ بىرەۋى دە قىزىقتىرمايدى. وزدىگىنەن باس كوتەرمەيدى. ول وزىمەن ءوزى بولسا بولدى. ءبىرىن ءسۇيدى، بولماسا قويدى. بوي ۇرمايدى، جوقتامايدى. وندايلارعا ايەل — ايەل ەمەس، اينالاداعى اعاش، ءشوپ، سۋ، مال سياقتى زاتتىڭ ءبىرى. مەن بىلەتىن ادامدا بۇل — باينازار.
ەكىنشى — وتتى، جالىندى، ايەلگە قۇمار ەركەك. ايەلدى اۋلامپاز، ايەلدى العىر، سىپىرا سوعار. ايەل ارتىنا ارمانسىز ءتۇسىپ، ەسالاڭ سابىلىپ، ەسى شىعا ىزدەنەدى. ءبىراق، بىردەن بىرگە كوشكەن، كوپ ايەلدى، جاقسى كورگىش، ءبارىن دە سوڭىنا ءتۇسىپ قىزىقتاپ، قىدىرىپ تاستاپ وتىرادى. ىلعي سوڭىرقاپ، جانىن جانالاپ، جاڭادان جاڭانى ءسۇيىپ ءلاززات الادى. اقىلىنان ايۋاندىق سەزىمى كۇشتى. ۇدايى... بيلەگەن قۇمارلىقتىڭ بورانىندا... بۇل ستەفان سۆەيگ جازعان كىسىلەردىڭ كوبى — وسى. اسىرەسە، كازانوۆا.
ءۇشىنشى — ايەلدى جاقسى كورمەيدى، جەك كورەدى. جانى سۇيمەيدى... سۇيمەي تۇرىپ سۇيكەنەدى. العان ۇلگىسى اينالاداعى ايۋان قىلىعىنان — قۇستىڭ، قورازدىڭ، جىلقىنىڭ ايعىرىنىڭ ەكى اياقتى پەندەدەگى ۇلگىسى وسىلار. بۇل، ايەلدى كوپ اۋلايدى، كورىنگەنىن اتادى، ابيىرىن الۋدى ماقسات قىلادى... بۇل، ەۋروپا ادەبيەتىنە تۇسكەن دون-جۋان. بۇل — ومىردە ءتىپتى كوپ...
ءتورتىنشى — ايەلدى — ايەل دەپ ەمەس، ادام دەپ ارداقتاپ، اسىرا سىلتەپ، جابايى ادامنان جانىن جوعارىلاتام دەپ، ەكىنشى قارسىعا شىعىپ كەتىپ، ەركەكتىكتەن الىستاعان، سوپىلىققا تەرەڭدەپ، ايەلگە ەركەكتىك ماحابباتىن مۇقالتىپ، ءسۇيۋىن ءسوندىرىپ العان ابىزدار ومىردە بولمايدى ەمەس، كوپ زاماننان بولىپ تا كەلەدى. عىلىمي ادامنىڭ كوبىنە وسى مىنەز ورتاقتاسادى. تولستويدى وسىنىڭ قاتارىنان قاراستىرۋ كەرەك شىعار.
بەسىنشى — بار ايەلدى ەمەس، ءبىر ايەلدى سۇيەتىن، ءىسىن دە، ءىشىن دە، قانىن دا، جانىن دا سول سۇيگەنى ءۇشىن باعىشتاعان، كورمەسە، ساعىناتىن، كورسە وت بوپ قابىناتىن بىرەۋلەر بولادى. ول سۇيگەنى جالپىنىڭ ىشىندەگى جاباعىنىڭ ءبىرى بولسا دا، جامان جاعىنىڭ ءبىرىن كورمەستەن، جاقسىلىعىنا قول قويعان، جانى قۇمار، ءتانى قۇربان ول ەركەكتىڭ ەرەكشە ءبىر ءبىتىمى بولادى. شىنايى ماحاببات يەسى. مەن — وسى!
You Might Also Like
-
«كەرجازىق» كولحوزىنىڭ «پىسىق» بەلسەندىلەرى سىپىرا سوعىم سويدى. «پىسىقتاردىڭ» ون ەكى قارىس قارا قازاندارىندا قۇلاش-قۇلاش تۇيرەلگەن سارى الا قازىلار سارق-سۇرق قاين...
