فاتيمانىڭ حاتتارىنان
اياۋلى ءىلياس!
اقتوبە وسى كۇنى ءتىپتى سۋىق. كۇندە بوران، كوز اشىپ ءجۇرىپ بولمايدى. الەۋمەت جۇمىسى دەگەن باستان استى. ءبىر ساعات يا ءبىر مينۋت قولىم بوس بولمايدى.
ءىلياس! سەنىڭ «شامام كەلسە تىلەگىڭدى اتقارام... مىناۋ قىزمەت اراسىندا ونداي تولعانۋ قيىن دا بولسا ىستەۋگە تىرىسام» دەگەن سوزدەرىڭدى وقىعاندا، توبەم كوككە جەتكەندەي بولدى. جاس بالاشا قۋاندىم. راس، قازىرگى كۇنى قىزمەت وتە اۋىر. ونى بىلمەي وتىرعانىم جوق، ءبارىن دە بىلەم. وسى كۇنگى بار سەنگەنىم سەنسىڭ. «ءىلياس قايتسە دە بىردەڭە جازار، سونى وقىسام كوڭىلىم تىنىشتالار» دەگەن ءۇمىتىم زور.
الماتىعا ءيۋننىڭ باس كەزىندە بارماقشىمىن. باراردا تەرمەزدەن نە تاشكەننەن تەلەگرامم بەرەرمىن.
كورىسكەنشە كۇن جاقسى بولسىن.
پاتيما. 10/ III - 1930 ج. اقتوبە
ءىلياس!
مىنا بۇگىن تاشكەنگە كەلگەنىمە ەكىنشى كۇن. (17 اپرەل، تۇنگى ساعات 3-تە كەلگەم). جول بويى اۋىرىپ كەلدىم. مۇنداعىلار ساۋ، اقىرىنداپ سويلەسىپ جاتىرمىن. ەكەۋمىزدىڭ قوسىلۋىمىز تۋرالى حابارلارى جوق كورىنەدى. قايتىپ باستاپ، نە دەپ اياقتارىمدى بىلمەي وتىرمىن. قارسى الۋلارى جاقسى، وزدەرى ابدەن ساعىنىپ قالىپتى.
ال ساعان جانە ءبىر جۇمىس: سەن ماعان ءوزىڭنىڭ اتىڭنان تاشكەندەگى ادەبيەت جيناعىڭدى تاۋىپ العا بىرەر قاعاز جىبەر. نەشىنشى جىلى، قايدا بەرىلگەنى تۋرالى بارلىعىن انىقتاپ جاز.
مەن كەتەردە سەنىڭ اسقار تۋرالى جازعان سىنىڭدى وقىعام. سىن دۇرىس سياقتى. تەگى كەلەشەگى بار، نەدە بولسا بىردەڭە شىعادى-اۋ دەگەندەر تۋرالى سىن جازعان دۇرىس-اۋ دەيمىن. ەشتەڭە شىقپايتىندار تۋرالى ازىرگە قويا تۇرعان ماقۇل سياقتى. ويتكەنى ولاردى ماقتاپ بولمايدى، بوقتاۋعا تاعى تۇرمايدى.
پاتيماڭ. 19 / IV -1933 جىل
ءىلياسىم!
جولدان جازعان ەكى وتكرىتكەڭدى الدىم. بۇگىن ماسكەۋدەن جىبەرگەن تەلەگرامماڭدى الىپ، مىنا حاتتى جازىپ وتىرمىن.
بالالار ادەبيەتىنە بايگە جاريالادىق. مەزگىلى ءبىرىنشى فيەۆرال. تاقىرىبى: قىزىل اسكەر تۇرمىسىنان، بۇرىنعى ەسكى تۇرمىستان، وسى كۇنگى تۇرمىستان.
جۋرنالعا تاپسىر دەگەن ماتەريالداردى تاپسىردىم. ەكى بولىك باسپاق بالدى. «ءۇريت سوق-سوقتى» ءبىر، «ماسقارا» مەن «ءتۇن قاراڭعى، تۇندىك جابۋلىنى» ءبىر نومىرگە جىبەرمەك بولدى. بەيىمبەت جاقسى. كۇنى-تۇنى جازۋدا. كەڭسەگە كوپ كەلمەيدى. ءۇي-ىشىن تاۋعا شىعارعان. ءابدىلدا دا «مەدەۋدە» جاتىر. بىردەڭە جازام دەيدى.
ءالى ۇمىتىپ بارا جاتىر ەكەمىن: مەن جاقىندا «زەلەنوە يابلوكو» دەگەن رومان وقىدىم. امەريكادا 2 جىلدىڭ ىشىندە 625 رەت باسىلىپ شىققان ەكەن. وتە جاقسى رومان، تاۋىپ الىپ وقى! «زولوتوي تەلەنوك» دەگەن روماندى تاۋىپ الىپ قوي. ونى دا جاقسى دەپ ماقتاپ ءجۇر.
ساعىنعان پاتيماڭ. 25. VII — 1934 الماتى
You Might Also Like
-
ءومىردى كورىپ ءجۇرىپ، ءومىردى سۋرەتتەگەن جازۋشىلاردى وقىپ ءجۇرىپ، مەن ەركەك اتاۋلىنى بەس توپقا بولەم:
-
1936 جىل قازاقستاننىڭ تاريحىندا قانداي ەلەۋلى، قانداي ماڭىزدى بولسا، بۇل جىل قازاق ادەبيەتىنىڭ تاريحىندا دا اسا ءونىمدى، اسا ايگىلى جىل.
