ەشتەڭەنى وزگەرتۋگە بولمايدى
مەرەكەلىك ءىس-شارالارعا بايلانىستى وتكىزىلەتىن باعدارلامالاردىڭ ءىس-جوسپارىن تالقىلاپ، بەكىتۋ ءۇشىن ۇجىمدا شاعىن جينالىس ءوتىپ جاتىر ەدى. جينالىستى باسقارۋشى سويلەپ وتىرعان، كەنەت جاڭادان كەلگەن قىزمەتكەر:
- مىنا ءبىر تاقىرىپقا كىشكەنە وزگەرىس ەنگىزۋگە بولمايدى ما؟ - دەدى.
- قاي تاقىرىپتى ايتاسىز؟ - دەدى جينالىستى باسقارۋشى.
- مىنا "ءتىلىم - تىرەگىم" دەگەن تاقىرىپتى ايتامىن.
- ول تاقىرىپ سىزگە نەسىمەن ۇناماي تۇر؟!
- ءسال جاتتاندىلاۋ ەستىلەتىن سەكىلدى. كىشكەنە وزگەرىس ەنگىزۋگە بولمايدى ما؟
- نەسى بار، اپ-ادەمى-اق تاقىرىپ! - دەدى جينالىستى باسقارۋشى. - ءبىز جىل سايىن وسى تاقىرىپپەن وتكىزىپ ءجۇرمىز عوي.
- تىم بولماسا، ەكى ءسوزدىڭ ورنىن اۋىستىرىپ كورۋ دە ويلارىڭىزعا كەلمەدى مە؟
جينالىستى باسقارۋشى شوشىپ كەتتى:
- ءسىز سويلەم مۇشەلەرىنىڭ ورنىن اۋىستىرىپ جىبەرگەننەن كەيىن نە بولاتىنىن بىلەسىز بە؟!
- نە بولادى ەكەن؟!
ءبىراق ەشكىم دە نە بولاتىندىعىن ايتا المادى.
- ال مىنا "تاۋەلسىزدىگىم - تۇعىرىم" دەگەن تاقىرىپتى شە؟ - دەدى جاڭادان كەلگەن قىزمەتكەر.
- ول تاقىرىپتى نە دەپ وزگەرتەيىن دەپ ەدىڭىز؟!
- تىم بولماسا، "تۇعىر ۇستىندەگى تاۋەلسىزدىك" دەپ وزگەرتىپ كورمەدىڭىزدەر مە؟
- قۇرمەتتىم! - دەدى جينالىستى باسقارۋشى. - ءسىز تىم تەرەڭدەپ باراسىز! تاۋەلسىزدىك تۇعىر ۇستىندە تۇرادى ما، الدە ءوزى بىردەڭەگە تۇعىر بولىپ تۇرادى ما، ونى شەشەتىن ءسىز ەمەس!
- وعان بولا نەسىنە ابىرجيسىزدار؟ - دەدى جاڭادان كەلگەن قىزمەتكەر. - بۇل بار بولعانى مەرەكەلىك ءىس-شارالاردىڭ تاقىرىبى عوي. سىزدەردى تۇسىنبەي وتىرمىن.
- مەن دە ءسىزدى ءتۇسىنىپ وتىرعان جوقپىن! - دەدى جينالىستى باسقارۋشى. - ول تاقىرىپتارعا نەمەنەگە شۇيلىگە قالدىڭىز؟! ءبىز جىل سايىن وسى تاقىرىپتارمەن وتكىزىپ ءجۇرمىز عوي. اپ-ادەمى-اق ءوتىپ ءجۇر. ۇلكەندەر الدا، جاستار ارتتا، قول شاپالاقتايتىن جەرلەرىندە قول شاپالاقتايدى.
- تىم بولماسا، باعدارلاما جاڭا اندەرمەن بايىتىلىپ وتىرار دەپ ۇمىتتەنەم.
- جوق! ءوزىنىڭ تاقىرىپتىق اندەرى بار. سول اندەردى ايتاتىن بەكىتىلىپ قويىلعان انشىلەرى بار.
جاڭادان كەلگەن قىزمەتكەر اۋا جەتپەگەندەي قارمانىپ بارىپ، جۇتىندى.
- ەڭ بولماسا، سول انشىلەر ۇستەرىندەگى كويلەكتەرىن اۋىستىرىپ وتىراتىن شىعار؟
- ەشقاشان! جىل سايىن سول ءبىر كويلەكپەن شىعادى.
- تامارا اپايعا قيىنداۋ ءتيىپ ءجۇر، - دەدى الدەكىم. - ول كىسى تولىعىپ كەتكەن. قىز كۇنىندەگى كويلەگى تارلىق ەتىپ ءجۇر.
- ول كىسىگە جاڭادان كويلەك تىكتىرۋ دە ويلارىڭىزعا كەلمەدى مە؟
- ودان بىردەڭە شىعا قويار ما ەكەن؟ - دەدى جينالىستى باسقارۋشى. - ول كىسىنىڭ ومىردەگى ەڭ ۇلى مۇراتى - سول ۇستىندەگى كويلەگىمەن زەينەت دەمالىسىنا شىعىپ كەتۋ.
جاڭادان كەلگەن قىزمەتكەر باسىن شايقادى.
- ءسىز بۇل جەرگە جاڭادان كەلگەن قىزمەتكەرسىز، - دەدى جينالىستى باسقارۋشى. - جاڭادان كەلگەن قىزمەتكەرگە كەيبىر نارسەلەر وعاش كورىنۋى مۇمكىن. الايدا بارا-بارا ۇيرەنىپ كەتەتىن بولاسىز. ءالى-اق ءوزىڭىز دە وسى ىرعاقپەن ءان سالا باستايسىز.
- سونىمەن ءىس-شارالاردىڭ تاقىرىبىن بەكىتەمىز بە؟ - دەدى جينالىستى باسقارۋشى. - بەكىتىلسىن دەگەندەرىڭىز قول كوتەرىڭىزدەر.
ءبارى قولىن كوتەردى. جاڭادان كەلگەن قىزمەتكەر دە قولىن كوتەردى.
- جاقسى، - دەدى جينالىستى باسقارۋشى. - ەندى باستىققا بارىپ بەكىتتىرىپ الا قويايىن.
- ەشتەڭەنى وزگەرتىپ جىبەرگەن جوقسىڭدار ما؟ - دەدى باستىق. - ءبىر جاڭالىق ەنگىزەمىز دەپ، بىردەڭەدەن قاتەلەسىپ كەتىپ جۇرمەيىك.
- جوق، ساكە! ەشتەڭەنى وزگەرتكەن جوقپىز. ءبارى دە ءباز-باياعىسىنشا.
قول قويىپ بەردى.
You Might Also Like
-
نۇرماش ايتادى: «دۇيسەن، ءبىزدىڭ ۇيگە بالا بول، سوندا ءبىزدىڭ ءۇيدىڭ كىسىلەرى سىزدىكىنەن ەكى رەت ارتىق بولادى». دۇيسەن ويلاپ تۇردى دا: «جوق، نۇرماش. سەن ءبىزدىڭ ۇيگە بالا بول، سوندا س...
-
پەتەربوردان جوعارى ارحانگەلسكيي دەگەن گۋبەرنە بار. سونىڭ كوپ جەرى سازدى بولىپ، ءشوپ شىقپايدى، مۇك شىعادى. وندا سامويەد دەگەن جۇرتتىڭ كۇن كورەتىنى بۇعىنىڭ ءبىر ءتۇرلى تۇقىمى. ول بۇعىنىڭ ءمۇيىزى تارماق-...
