InfoHub Logo

الدىنا جۇگىنىپ كەلگەن ادامدارعا جانعابىل بي ۇدايى اعىل-تەگىل ءسوز تۇيدەكتەرىن توگەدى ەكەن. سوندا 11-12 جاستاعى ەسكەلدى بالا:

— اتا، بۇل ءوز تاقپاعىڭىز با؟ — دەپ سۇراپتى. قارت:

— ءاي، بالام-اي، بۇل — اتادان بالاعا مۇرا بوپ كەلە جاتقان ءسوز. حالىق دانا عوي، زەر سالىپ قاراساڭ، تىرلىك-تىرشىلىك اتاۋلىنىڭ ءبارىن — ءبولمىس-بىتىمىن، جاي-كۇيىن تولعاپ ايتىپ كەتكەن عوي. بۇل دۇنيەدە سوزدەن قۇدىرەتتى نارسە جوق. سول بۇرىنعى وتكەن عۇلاما اتالارىمىز ەردىڭ قۇنىن ەكى-اق اۋىز سوزبەن بىتىرگەن عوي، — دەيدى.

سوندا بالا:

— ءسىز ماعان ايتىڭىزشى، مەنىڭ ناعاشىم تولە بيدەن اسقان بي جوق دەيدى، وسى قالاي؟ — دەپتى.

— ءيا، بالا، سەن ونى جايداق، جاداعاي ايتا سالما، دۇرىسى قالاي ەدى، حالىقتىڭ ماقال-ماتەلى، حالىقتىڭ باعا جەتپەس اسىل قازىناسى، ەكىنشى سوزبەن ايتساق، بۇل اتا-بابانىڭ اسا باعالى ءىنجۋ-مارجان گاۋھار ءسوزى — سول اتا-بابانىڭ بىزگە قالدىرعان اماناتى. اماناتقا قيانات قىلۋدىڭ جولى اۋىر، ونداي ادام، شاريعات جولىمەن ايتساق، جەتىنشى توزاققا بارادى. ونى قاتىما دەپ اتايدى. ول توزاقتىڭ جاماندىعى سونشالىق، تىرشىلىك يەسى تۇرماق، قارا تاستىڭ ءوزى دە جالىنداپ جانىپ، بالقىپ كەتەتىن جەر. ال ءجابىر-جاپاسى باسقا توزاقتان ءجۇز مىڭ ەسە كوپ... راس، ناعاشى اتاڭ وسال ەمەس، — دەپ، جاڭعابىل قاريا نەمەرەسىنىڭ بەتىنە سۇيسىنە قاراپ، ءسوزىن جالعاستىرا ءتۇسىپتى: — ادام نە نارسەگە دە سالماقپەن قاراۋ كەرەك. تولە بي ءار جاعدايعا، ءار ءىس-قيمىلعا، ءتىپتى ءاربىر دىبىسقا وي جىبەرىپ وتىرادى. سەن ناعاشى اتاڭنىڭ قازىعۇرتتىڭ باۋىرىندا ەگىن سالىپ، حالىقتى اق نانمەن اسىرىپ وتىرعانىن تالاي رەت ەستىدىڭ عوي. ال قازىعۇرت — تاۋ اتاۋلىنىڭ ىشىندەگى ەڭ قاسيەتتىسى. حالىق ونى باياعىدان بەرى جىرلاپ كەلەدى، — دەپ، تاعى دا مىناداي تاقپاق ايتىپتى:

— قازىعۇرتتىڭ باسىندا كەمە قالعان،
ول اۋليە بولماسا نەگە قالعان؟
جەتىم بوتا ۇستىندە جاتىپ قالىپ،
ويسىلقارا جانۋار سودان قالعان.

سوندا ەسكەلدى اتاسىنا قاراپ:

— بۇتكىل تىرلىك-تىرشىلىك اتاۋلى قازىعۇرتتان تارالىپتى دەپ ەستۋشى ەدىم. سول راس ەكەن-اۋ! — دەيدى.

— ءيا، بالام، دۇرىس ايتاسىڭ. كۇللى تىرشىلىك تەك قاسيەتتى تاۋدان باستاۋ العان، — دەيدى اتاسى جانعابىل.

---