InfoHub Logo

ەسكەلدىنىڭ ۇلكەن اتاسى جانعابىل باتىر ايگىلى الىبەك ۇلى تولە بيمەن باستاس، قادىرلەس، قۇدا بولعان. تولە ءبيدىڭ ۇلبيكە دەگەن قىزى ەسكەلدىنىڭ اناسى. ەسكەلدى دۇنيەگە كەلىپ، تولە بيدەن ءسۇيىنشى سۇراپتى دەيدى.

سوندا تولە بي: «تىلەكتى اللا ەسكەردى، جالايىر ەلىنە ەسكەلدى، بالانىڭ اتى ەسكەلدى بولسىن. ەلىنىڭ ەسىنە ەس قوسىلىپ، حالقىنىڭ قامىن ويلايتىن ازامات بولسىن!» — دەپ باتسىن بەرىپتى.

ەسكەلدىنىڭ ات جالىن تارتىپ ءمىنىپ، ەل ىسىنە ارالاسقان كەزى — جوڭعار شاپقىنشىلىعىنىڭ ءورشىپ، اسىرەسە جەتىسۋدى قونىستانعان قازاق رۋ-تايپالارىنىڭ زور كۇيزەلىسكە ۇشىراۋىمەن تۇسپا-تۇس كەلەدى. جويقىن شاپقىنشىلىق جىلدارىندا جالايىر ەلى اتا قونىسىنان اۋا كوشىپ، سىر بويىنا ىعىسۋعا ءماجبۇر بولادى. وسىنداي قيىن-قىستاۋ كەزەڭدە ەسكەلدى بي ءوزىنىڭ ايگىلى ۇزەڭگىلەستەرى بالپىق بي، وراقتى باتىر، قابان جىراۋ سياقتى ەلگە تۇتقا ازاماتتارمەن تىزە قوسا قيمىلداپ ءجۇرىپ، اتامەكەننەن جاۋدىڭ ىرگەسىنىڭ تۇرىلۋىنە مۇرىندىق بولادى. ەسكەلدى العاش رەت جوڭعارلارمەن بولعان ىلە-باقاناس شايقاسىندا (1723) باتىرلىعىمەن كوزگە تۇسەدى. وسى سوعىستا جوڭعارلاردىڭ جەتىسۋداعى ەڭ بەرىك بەكىنىسىن بۇزىپ، ەسكەلدى باتىر باستاعان قول قابانباي باتىردىڭ اسكەرىنە قوسىلدى. كۇش بىرىكتىرگەن قازاق قوسىندارى تۇرىلە قاشقان جوڭعار جاقتارىنا جوڭعار قاقپاسىنىڭ تۇبىندە سوققى بەرىپ، زور شىعىنعا ۇشىراتادى.

 

---