InfoHub Logo

ماركەتولوگتى، تجم جۇمىسشىسىن، الەۋمەتتانۋشىنى، كوممۋنيكاسيانى جاساۋشىنى جانە ۇكىمەتتىك مەكەمەنىڭ قىزمەتكەرىن نە بىرىكتىرەدى دەپ ويلايسىز؟ ولاردىڭ بارلىعى دا بەلگىلى ءبىر اۋداندا قانشا ادامنىڭ تۇرىپ جاتقانىن ءبىلۋى كەرەك. Facebook جاڭا ونەرتابىسىن تانىستىردى، ونىڭ ارقاسىندا قالىپتى حالىق ساناعىنان باس تارتىپ، الەمنىڭ تۇكپىر-تۇكپىرىندەگى ادامداردىڭ سانىن ەش كۇش جۇمساماي-اق بىلۋگە بولادى ەكەن.

مارك سۋكەربەرگ Facebook ارقىلى الەمدى باسقارعىسى كەلەتىندەي. ولاي دەۋگە بولمايدى دەسەك تە، ونى اقپارات تاراتۋدان دا ارتىق مۇمكىندىگى بار قۇرال ەتكىسى كەلەتىنى بەلگىلى. بۇل بولسا جاساندى ينتەللەكتكە جانە وزگە دە الەۋەتتى تەحنولوگيالارعا تاۋەلدى. ءقازىردىڭ وزىندە زەرتتەۋ كومپانيالارى جاساپ جاتقان الگوريتمدەر ءوزىنىڭ العاشقى ناتيجەلەرىن بەرىپ تە جاتىر. ولاردى دۇرىس قولدانۋ عانا قالىپ وتىر.

Facebook كومانداسىنىڭ بۇكىل الەم بويىنشا تەگىن ينتەرنەتتى قوسۋدى جوسپارلاپ وتىرعانى بەلگىلى. جوبا 2016 جىلدىڭ سوڭىندا كەيبىر شالعاي وڭىرلەردە باستاۋىن الادى. بۇل ماقساتتا كومپانيا سپۋتنيك ارنالارىن جانە پيلوتسىز ۇشاتىن اپپاراتتار تۋرالى الەۋەتتىك زەرتتەمەلەرىن قولدانۋعا ۇمىتتەنىپ، بىرنەشە كەلىسىمشارت جاساسىپ تا قويدى. بۇعان قاجەتتى تەحنولوگيالاردىڭ ءبىرى – Connectivity Lab.

Facebook كومپانياسىنىڭ جاڭالىعى حالىق تىعىزدىعىنىڭ كارتاسىن 10 مەترلىك دالدىكپەن انىقتاۋعا باعىتتالعان. Connectivity Lab الدىن ادامنىڭ ءتۇرىن تانىپ ءبىلۋ ءۇشىن قولدانىلعان تەحنولوگيانى نەگىز رەتىندە الىپ وتىر. ءبىراق بۇل جولى نەيروندى جەلى سپۋتنيكتەردەن الىنعان سۋرەتتەردى وڭدەۋ ءۇشىن قولدانىلعان. ول عيماراتتاردىڭ ءتۇرلى كەسكىندەرىن ايىرىپ تانۋدى ۇيرەندى، سول ارقىلى تاڭقالارلىق دالدىككە قول جەتكىزىلدى. بۇل جۇمىسقا Google Maps كادرلارى عانا قاجەت بولىپ شىقىتى.

جاڭا تەحنولوگيا Facebook مەنەدجمەنتىنە ءوز جوبالارىن قاي اۋدانداردان باستاۋ جانە بۇل ماقساتتا قانداي ادىستەردى قولدانۋ كەرەك ەكەنىن شەشۋگە مۇمكىندىك بەرەدى. سپۋتنيك پروۆايدەرلەرىمەن قاتار، كومپانيانىڭ تاعى ءبىر زەرتحاناسى ارنايى قۇراستىرىپ جاتقان درونداردى قولدانۋ جوسپارلانعان. مۇنداي كارتالار ءتۇرلى تابيعات اپاتتارىنىڭ سالدارىن جويۋعا دا كومەكتەسۋ ءۇشىن قاجەت ەكەن.

2016 جىلدىڭ سوڭىندا Facebook پەن كولۋمبيا ۋنيۆەرسيتەتىنىڭ زەرتتەۋشىلەرى بىرىگۋ ارقىلى عالامشاردىڭ تۇگەلدەي سۋرەتىن وڭدەپ شىعۋدى جوسپارلاپ وتىر. وسىدان كەيىن بۇل كاتا قالاعان ادامعا قولجەتىمدى بولادى.

---