InfoHub Logo

قازىرگى عاسىر - اقپارات عاسىرى. سو­نىڭ جەتىستىكتەرىنىڭ ءبىرى عالامتور جەلىلەرى جانە ونىڭ اتقاراتىن كوپقىرلى قىزمەت­تەرى. جاستار كوركەم ادەبيەت وقىمايدى دەپ ايتا المايمىز. مەكتەپ باعدارلا­ما­سىن­دا قازاق، ورىس ادەبيەتى ساباقتارىندا مىندەتتى تۇردە وقىپ، تانىسۋعا ءتيىستى   شى­عار­مالار ءتىزىمى وقۋشىلارعا بەرىلەدى.

عالامتور… ەسكى مەن جاڭانىڭ، وتكەن مەن بولاشاقتىڭ، قاتىگەزدىك پەن مەيىرىمنىڭ، بار مەن جوقتىڭ ميداي ارالاسقان ورتاسى. ءوز قاسىڭداعى وقيعاعا، ىسكە، ءتۇرلى تاعدىرعا نازار سالماۋىڭىز مۇمكىن، ءبىراق وزگە قيىرداعى قيلى تاعدىرعا كوز مونشاعىڭىزدى ۇزەسىز. ەڭ باستىسى قانداي اقپارات وقىساڭىز دا، سوعان ساي جاۋاپ قالدىرۋىڭىزعا، پىكىر بىلدىرۋگە قۇقىعىمىز بار.
عالامتور… تۇتاسقان الەم. ورمەكشىنىڭ تورى دەرسىز. ەندى شىنايى سۇيىسپەنشىلىكتىڭ ورنىن جىلتىرى مول ۆيرتۋالدى ماحاببات، شىنايى ارالاس-قۇرالاس دوستىقتىڭ ورنىن ۆيرتۋالدى سىيلاستىق باسىپ كەلەدى. تەك كوگىلدىر ساعىمدى عالامتورلاردىڭ ىشىندە سان مەن سيفرلاردىڭ، الدەبىر اتاۋلار مەن وزىڭە ءۇش قايناسا سورپاسى قوسىلمايتىن ەسىمدەردىڭ جاقىنىسىز… تانىسىڭىزدان اجىراپ، تانىماسىڭىزدى جاقىن تۇتاتىن مەزگىل ءقازىر. يىرىمىنە ەسسىز ۇڭىلگەن كەيبىر جاندار ونىڭ تۇتقىنىنا دا اينالىپ ۇلگەرگەن. جالعىزدىق پەن كۇيزەلىستىڭ اساۋ تولقىندارىنا جۇتىلعاندار قانشاما؟ بۇل دا ءبىر وتپەلى كەزەڭ شىعار. جاماندىعىن ايتىپ تاۋىسا المايسىز، ال جاقسىلىعى دا ۇشان-تەڭىز. تەك سونى ورنىمەن پايدالانا  بىلسەك، مۇمكىندىگىن بارىنشا تيىمدىلىكپەن جۇزەگە اسىرىپ، ادامي قالپىمىزدى نىقتاپ، ءبىلىمىمىزدى اسىرۋعا جۇمساساق.

ءححى عاسىردىڭ باستى جەتىستىكتەرىنىڭ ءبىرى – موبيلدىلىك. بۇگىندە بارلىعى وتە جىلدام ارەكەت جاسايدى. ەگەر بۇرىنىراقتا باياۋ جاسايتىن دەربەس كومپيۋتەردى كۇتىپ، ءبىر قۇجاتتى دايىندايتىن بولساڭىز، ءقازىر مىقتى ديەۆايستار بۇل ماسەلەنى ارتتا قالدىردى. ۋاقىت تا تەز وتەتىن بولدى. ءبىر بوساعان مينۋتىڭىزدى ءسىز مىندەتتى تۇردە عالامتوردى پايدالانۋمەن وتكىزەسىز. راس ەمەس پە؟ ارينە، قازىردە ونىڭ پايداسى مول. وقۋدا، جۇمىستا، ىزدەنۋدە عالامتور تاماشا كومەكشى. الايدا، عالامتور «دەرتىنە» شالدىعىپ، ونىڭ قۇربانى بولعان جاندار كوپ. دوسىڭىزبەن كەزدەسۋدە ءوزىڭىزدى ۇستاي الماي، تەلەفونعا قاراپ، كەلگەن حاتقا جاۋاپ بەرەسىز. ايتىپ جاتقان اڭگىمەسىن تىڭداماي، بار ويىڭىز سمارتفونىڭىزعا باعىتتالادى. شىن مانىندە تەلەفونعا ءسىزدىڭ جاۋابىڭىز تەز ارادا قاجەت ەمەس، ءتىپتى، نازارسىز قالدىرساڭىز دا وعان ءبارىبىر. ال دوسىڭىز نازارسىز قالعانى ءۇشىن قاتتى وكپەلەۋى مۇمكىن.

تابىسىمىزعا جەتەلەيتىن پايدالى، ساپالى اقپاراتتاردى تەز ارادا الىپ، جاڭا ءبىلىم سۋسىندايمىز. سول سەبەپتى عالامتوردى وزىندىك دامۋىمىزعا پايدالانا بىلەيىك. الەۋمەتتىك جەلىگە تاۋەلدىلىكتەن ارىلۋ ءۇشىن تەكسەرىلگەن تاجىريبەنى ۇسىنامىز. ول - سپورتپەن اينالىسۋ. ەر جىگىتتەر بەلگىلى ءبىر سپورتپەن نەمەسە قاراپايىم جاتتىعۋمەن اينالىسىپ، قىز بالالار بيمەن، جۇزۋمەن، يوگا نەمەسە جاتتىعۋمەن اينالىسۋىنا بولادى. ناتيجەسىندە - تاۋەلدىلىكتەن ارىلاسىز، دەنساۋلىعىڭىزدى تۇزەيسىز، وزىڭىزگە سەنىمدى بولاسىز.

اباي نەگىزگى مەكتەبى 8 سىنىپ وقۋشىسى

كاپيزوۆ ازات

 

---