عالىم قازاقشا ىمداۋ ءتىلىن تانۋدىڭ ينتەللەكتۋالدى جۇيەسىن ويلاپ تاپتى
عالىم نۇرزادا امانگەلدى قازاقشا ىمداۋ ءتىلىن تانۋدىڭ ينتەللەكتۋالدى جۇيەسىن جاساپ شىعاردى. بىرەگەي ازىرلەمە ەرەكشە قاجەتتىلىكتەرى بار ادامدارعا ارنالعان.
ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى اقپاراتتىق تەحنولوگيالار فاكۋلتەتىنىڭ وقىتۋشىسى نۇرزادا امانگەلدى 5 جىلدان بەرى زەرتتەۋ جۇرگىزگەن. عىلىمي جوبا جاساندى ينتەللەكتكە نەگىزدەلگەن جانە سويلەۋ مەن ەستۋ قابىلەتى بۇزىلعان ادامدارعا باعىتتالعان. جۇيە قازاقشا ىمداۋ تىلىنە بەيىمدەلگەن، بۇل – ونىڭ باستى بىرەگەيلىگى.
جۇيەنى ازىرلەۋ بارىسىندا نۇرزادا امانگەلدى ءبىر ىمنىڭ بىرنەشە نۇسقاسىن دايىنداعان. عالىم ولاردى كورسەتىلۋ كۇردەلىلىگى بويىنشا توپتارعا ءبولىپ، ءارقايسىسى ءۇشىن جاساندى نەيروندى جەلى مودەلىن ازىرلەگەن.
جۇيە بولاشاقتا ىم ءالىپبيىن، ىم ءتىلىن بىلەتىن سۋردواۋدارماشىلاردى دايىنداي الادى. مۇنداي ماماندار ءتۇرلى مەملەكەتتىك ۇيىمدارعا قاجەتتى. بۇگىنگى تاڭدا ءبىز ءموبيلدى قوسىمشا جاساۋعا كىرىستىك. ونىڭ كومەگىمەن ىم تىلىمەن ءوزارا سويلەسۋگە بولادى. سويلەۋدى ماتىنگە، ءماتىندى ىمعا جانە كەرىسىنشە تۇرلەندىرەتىن جۇيە قۇرىلادى. وسى جوبامنىڭ ارقاسىندا ەرەكشە قاجەتتىلىكتەرى بار ادامداردىڭ مەكتەپتە ىڭعايلى وقۋى، مەديسينالىق جانە مەملەكەتتىك مەكەمەلەردە قىزمەت الۋى جانە ەركىن سويلەسۋى مەن ءۇشىن وتە ماڭىزدى. وسى تاقىرىپتى زەرتتەپ، ءوز ۇلەسىمدى قوسۋ – ازاماتتىق بورىشىم، - دەيدى عالىم.
زەرتتەۋ ناتيجەسى بويىنشا نۇرزادا امانگەلدى اۆتورلىق كۋالىككە يە بولدى جانە الەمدىك رەيتينگى جوعارى جۋرنالداردا 3 ماقالا جاريالادى. وتكەن جىلى ۋنيۆەرسيتەتتىڭ «JANA ASU» ىشكى گرانتتىن العان.
«قازاقستاندىق ساڭىراۋلار قوعامى» قوعامدىق بىرلەستىگىنىڭ ۆيسە-پرەزيدەنتىمەن كەزدەسۋ بارىسىندا ولاردىڭ بالالاردى وقىتۋعا قاتىستى ماسەلەلەرىن ءبىلدىم. قازاقشا جانە باسقا تىلدەر بويىنشا ىمداۋ ءتىلىن ۇيرەتۋگە ارنالعان زياتكەرلىك ترەناجەر – قازاقستاننىڭ ساڭىراۋ قوعامىنداعى ەستۋ قابىلەتى بۇزىلعان بالالارعا زور كومەك كورسەتە الاتىن قاجەتتىلىك. مۇنداي وقىتۋ جۇيەسى بالالارعا ىمداۋ ءتىلىن ۇيرەنۋگە جانە قورشاعان ورتادا قارىم-قاتىناس جاساۋدى ۇيرەنۋگە مۇمكىندىك بەرەتىن ءتيىمدى قارىم-قاتىناس قۇرالدارىمەن قامتاماسىز ەتە الادى. اقش پەن قازاقستاننىڭ عالىمدار توبى ءبىزدىڭ ەلدەگى ەستۋ جانە سويلەۋ قابىلەتى بۇزىلعان ادامدار ءۇشىن ءبىلىم بەرۋ جانە وعان قولجەتىمدىلىك سالاسىندا ءبىرقاتار زەرتتەۋ باستادى. ءبىزدىڭ بىرلەسكەن جۇمىسىمىز ەلىمىزدە عانا ەمەس، ورتالىق ازيادا پايدالى بولاتىن ۇلكەن عىلىمي جوباعا اينالادى دەپ سەنەمىز، - دەيدى نۇرزادا امانگەلدى.
ول عىلىمي ازىرلەمەسىن كوممەرسيالاندىرۋدى قولعا الماق. عىلىم قورىنىڭ بايقاۋىنا قاتىسۋ ءۇشىن ءوتىنىم جولداعان.
You Might Also Like
-
وقۋ-اعارتۋ ءمينيسترى عاني بەيسەمبايەۆ جاڭا وقۋ جىلىنا وراي ءبىلىم بەرۋ باعدارلاماسىنداعى وزگەرىستەرگە قاتىستى پىكىر ءبىلدىردى.
-
مەكتەپ كىتاپحاناشىلارىن «پەداگوگ» لاۋازىمىنا تەڭەستىرۋ ماسەلەسى پىسىقتالادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستردىڭ ورىنباسارى – ەڭبەك جانە حالىقتى الەۋمەتت...
