مەكتەپ كىتاپحاناشىلارى «پەداگوگ» لاۋازىمىنا تەڭەستىرىلۋى مۇمكىن
مەكتەپ كىتاپحاناشىلارىن «پەداگوگ» لاۋازىمىنا تەڭەستىرۋ ماسەلەسى پىسىقتالادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-مينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆانىڭ جاۋابىندا ايتىلعان.
«وقۋ-اعارتۋ مينيسترلىگى بيىل 2 165 ورتا ءبىلىم بەرۋ ۇيىمى كىتاپحاناشىلارىنىڭ بىلىكتىلىگىن ارتتىرۋ كۋرستارىن وتكىزۋدى جوسپارلاپ وتىر. كۋرستا IT-قۇزىرەتتىلىك پەن سيفرلىق ساۋاتتىلىق، اۆتورلىق قۇقىق، زاماناۋي كىتاپحاناشىنىڭ Soft جانە Hard skills داعدىلارى، كىتاپحانالاردى الەۋمەتتىك جەلىلەردە ىلگەرىلەتۋ، كىتاپحاناداعى نەتۆوركينگ سياقتى كەڭ اۋقىمدى تاقىرىپتارى قامتىلعان»، - دەپ اتاپ وتەدى تامارا دۇيسەنوۆا جاۋابىندا.
ونىڭ اتاپ وتۋىنشە، مەملەكەتتىك ءبىلىم بەرۋ ۇيىمدارى قىزمەتكەرلەرىنىڭ ۇلگى شتاتتارىندا «پەداگوگ-كىتاپحاناشى» لاۋازىمى قاراستىرىلماعان.
«قازاقستان رەسپۋبليكاسى ۇكىمەتىنىڭ 2008 جىلعى 30 قاڭتارداعى № 77 «مەملەكەتتىك ءبىلىم بەرۋ ۇيىمدارى قىزمەتكەرلەرىنىڭ ۇلگى شتاتتارىن بەكىتۋ تۋرالى» قاۋلىسىندا «پەداگوگ-كىتاپحاناشى» لاۋازىمى قاراستىرىلماعانىن ەسكەرە وتىرىپ، ءبىلىم بەرۋ ۇيىمدارىنداعى كىتاپحاناشىلاردى «پەداگوگ» لاۋازىمىنا تەڭەستىرۋ ماسەلەسى جان-جاقتى زەردەلەنىپ (قاجەتتىلىك، لاۋازىمدىق نۇسقاۋلىق، جالاقى ت.ب.)، پىسىقتالاتىن بولادى. جۇرگىزىلگەن زەرتتەۋلەر ناتيجەسىندە كىتاپحاناشىلار «پەداگوگ» لاۋازىمىنا تەڭەستىرىلگەن جاعدايدا «پەداگوگ مارتەبەسى تۋرالى» قازاقستان رەسپۋبليكاسى زاڭىندا قاراستىرىلعان بارلىق نورمالار، ونىڭ ىشىندە اتتەستاتتاۋدان ءوتۋ دە ولارعا قاتىستى بولادى»، - دەدى مينيستر.
You Might Also Like
-
عالىم نۇرزادا امانگەلدى قازاقشا ىمداۋ ءتىلىن تانۋدىڭ ينتەللەكتۋالدى جۇيەسىن جاساپ شىعاردى. بىرەگەي ازىرلەمە ەرەكشە قاجەتتىلىكتەرى بار ادامدارعا ارنالعان.
-
تەستىلەۋ باستالعالى 23 مىڭعا جۋىق ادام ماگيستراتۋراعا ءتۇسۋ ءۇشىن ەمتيحان تاپسىردى. ولاردىڭ 43%-ى شەكتى بالل جينادى. ورتاشا كورسەتكىش – 73 بالل. ەڭ جوعارى بالل – 130.
