InfoHub Logo

بۇدان بىلاي عىلىمي جوبالار مەن باعدارلامالاردى گرانتتىق جانە باعدارلامالىق-نىسانالى قارجىلاندىرۋ كونكۋرسى جىل سايىن وتكىزىلەتىن بولادى. بۇل تۋرالى «قازاقستان عىلىمىن دامىتۋدىڭ وزەكتى ماسەلەلەرى» سەكسياسىندا ق ر ءبىلىم جانە عىلىم ءمينيسترى اسحات ايماعامبەتوۆ ايتتى.

«بۇرىن الدەبىر عالىمنىڭ عىلىمي جوباسى وزەكتى ەمەس جانە تاعى دا باسقا سەبەپتەرمەن كونكۋرستان وتپەي قالسا، قايتادان قورعاۋ ءۇشىن ءۇش جىل كۇتەتىن. بۇدان بىلاي عىلىمي جوبالار مەن باعدارلامالاردى گرانتتىق جانە باعدارلامالىق-نىسانالى قارجىلاندىرۋ كونكۋرسى جىل سايىن وتكىزىلەتىن بولادى. سونداي-اق، ەندى ءداستۇرلى گرانتتاردان باسقا شاعىن گرانتتار، جەدەل گرانتتار، كوللاباراسياعا ارنالعان گرانتتار ەنگىزىلەدى. باعدارلامالىق-نىسانالى قارجىلاندىرۋ ناقتى ناتيجەلەرى بار عىلىمي-تەحنيكالىق مىندەتتەر نەگىزىندە عانا بولىنەتىن بولادى. سونىمەن قاتار، جاس عالىمدارعا ارنالعان كونكۋرستار جىل سايىن وتكىزىلەتىن بولادى»، - دەيدى اسحات ايماعامبەتوۆ.

ول وتكەن جىلى قارجى ءبولۋدىڭ اشىقتىعىن ارتتىرۋ ءۇشىن نورماتيۆتىك سالادا كوپتەگەن جۇمىستار اتقارىلعانىن ايتتى.

«مىسالى، جوبالار مەن باعدارلامالاردى قارجىلاندىرۋ تۋرالى شەشىم قابىلدايتىن، ولاردىڭ ىسكە اسىرىلۋىنا مونيتورينگ جۇرگىزەتىن ۇلتتىق عىلىمي كەڭەستەر تۋرالى ەرەجەگە وزگەرىستەر ەنگىزىلدى. ەندى ۇمىتكەرلەردى ىرىكتەۋدىڭ باستى تالابى - ولاردىڭ عىلىمي جاريالانىمدارىنىڭ ساپاسى. وتكەن جىلدىڭ ورتاسىندا ۇلتتىق عىلىمي كەڭەس قۇرامدارى جارتىلاي جاڭارتىلدى. اشىق داۋىس بەرۋ جانە وتىرىستاردىڭ ونلاين-ترانسلياسياسى ەنگىزىلدى»، - دەيدى ول.

---