جاڭا مەديسينا مەكتەبىنىڭ ستۋدەنتتەرىنەن ۇلكەن جاڭالىقتار كۇتەمىن - نازاربايەۆ
مەملەكەت باسشىسى نازاربايەۆ ۋنيۆەرسيتەتىنىڭ مەديسينا مەكتەبىندە بولدى، دەپ حابارلايدى اقوردانىڭ باسپا ءسوز قىزمەتى.
ءىس-شارا بارىسىندا قازاقستان پرەزيدەنتى بەيىندى ءبىلىم بەرۋدىڭ زاماناۋي تالاپتارىنا تولىقتاي ساي كەلەتىن مەديسينا مەكتەبىنىڭ جاڭا عيماراتىن ارالاپ كوردى.
سونداي-اق، نۇرسۇلتان نازاربايەۆ وقۋشىلارمەن جانە پەداگوگتارمەن كەزدەستى.
اڭگىمەلەسۋ بارىسىندا ەلباسى قازىرگى ۋاقىتتا الەمنىڭ مەديسينا مەن بيولوگيا سالاسىنداعى عىلىمي پروگرەسس الدىندا تۇرعانىن اتاپ ءوتتى.
- جاڭا مەديسينا مەكتەبىنىڭ جابدىقتالۋىن، وقىتۋ دەڭگەيىن الەمنىڭ ۇزدىك ۋنيۆەرسيتەتتەرىمەن سالىستىرۋعا بولادى. سوندىقتان مەن وزدەرىڭىزدەن ۇلكەن جاڭالىقتار كۇتەمىن. سىزدەردىڭ زەرتتەۋلەرىڭىز، زەرتحانالىق مۇمكىندىكتەرىڭىز، وقىتۋشىلاردىڭ عىلىمي الەۋەتى سىرقاتتىڭ ەڭ كۇردەلى تۇرلەرىن ەمدەۋدىڭ، ادام ءومىرىن ۇزارتۋدىڭ جاڭا ادىستەرىن تابۋعا مۇمكىندىك بەرەدى. بۇل مەكتەپ وزىمەن بىرگە باسقا ۋنيۆەرسيتەتتەردى ىلگەرى جەتەلەيتىن نەگىزگى بازالىق وقۋ ورنى رەتىندە قۇرىلدى، - دەدى مەملەكەت باسشىسى.
سونىمەن بىرگە، قازاقستان پرەزيدەنتى XXI عاسىردا اقپاراتتىق تەحنولوگيالارمەن قاتار مەديسينا مەن بيولوگيانىڭ دا الدىڭعى ورىنعا شىعىپ وتىرعانىن ايتتى.
- بارلىق عىلىمدار ءوزارا بايلانىستى، كوپتەگەن جاڭالىقتار ولاردىڭ توعىسۋىنان پايدا بولادى. وسى وقۋ ورنىنىڭ قابىرعاسىندا عىلىم دامۋعا ءتيىس، بىزگە جان-جاقتى عالىمدار قاجەت، - دەدى نۇرسۇلتان نازاربايەۆ.
سوڭىندا ەلباسى جينالعانداردى وقۋ ورنىنىڭ جاڭا عيماراتىنىڭ اشىلۋىمەن قۇتتىقتاپ، العا قويعان ماقساتتارىنا جەتۋىنە تىلەكتەستىك ءبىلدىردى.
ايتا كەتەرلىگى، مەديسينا مەكتەبىنىڭ عيماراتى 9 قاباتتان تۇرادى، جالپى كولەمى - 39 825 شارشى مەتر. وندا عىلىمي جانە وقۋ زەرتحانالارى، سيمۋلياسيالىق ورتالىق، اناتوميالىق زەرتحانا، لەكسيا زالدارى مەن توپتىق ساباق الۋعا جانە كەڭسەگە ارنالعان بولمەلەر، كىتاپحانا، اسحانا بار.
You Might Also Like
-
بۇگىن قازاقستان رەسپۋبليكاسى پرەمەر-مينيسترىنىڭ ورىنباسارى يمانعالي تاسماعامبەتوۆتىڭ توراعالىعىمەن 2017-2020 جىلدارعا ارنالعان عىلىمدى دامىتۋدىڭ باسىم باعىتتارى جونىندە كەڭەس ءوتتى.
