نازاربايەۆ: ۋنيۆەرسيادا وتكىزۋ كەز كەلگەن ەلدىڭ قولىنان كەلمەيدى
نۇرسۇلتان نازاربايەۆ استانادا 2017 جىلعى 28ء-شى بۇكىلالەمدىك ۋنيۆەرسيادا ويىندارىنىڭ العاشقى الاۋىن جاقتى دەپ حابارلايدى nur.kz پورتالى.
ۋنيۆەرسيادا الاۋىنىڭ العاشقى ەستافەتاسى استاناداعى نازاربايەۆ ۋنيۆەرسيتەتىنەن باستالدى.
"ءبىزدىڭ ەلىمىزدىڭ تاۋەلسىزدىك جىلدارىندا جەتكەن جەڭىسى ايتارلىقتاي بولدى. قازاقستاندا مۇنداي اۋقىمدى الەمدىك سايىستار بۇرىن-سوڭدى وتكىزىلمەگەن. كەز كەلگەن مەملەكەتتىڭ بۇعان شاماسى كەلە بەرمەيتىنى بەلگىلى. الايدا، تاڭداۋ قازاقستانعا ءتۇستى. سوندىقتان ءبىزدىڭ دايىندىعىمىز بار ەكەنىنە جانە بۇل شارانى ابىرويمەن الىپ شىعاتىنىمىزعا سەنەمىن"، - دەيدى نازاربايەۆ الاۋ جاعۋ سالتاناتىندا.
نازاربايەۆ سونىمەن بىرگە ۋنيۆەرسيادانىڭ قازاقستاندا وتكىزىلۋىنىڭ پايداسىن ايتتى.
"ءبىز وتكىزىپ جاتقان جارىس بىرىنشىدەن جاستاردى سپورتقا باۋليتىن بولادى. ەكىنشىدەن وسى جارىس ءۇشىن سالىنعان بارلىق نىساندار بولاشاقتا ءبىزدىڭ سپورتشىلارعا قىزمەت ەتەدى. ۇشىنشىدەن ءبىز ەلىمىزدى الەمگە تاعى ءبىر مارتە تانىتامىز"، - دەپ اتاپ ءوتتى ەلباسى.
الاۋ جاعىلعاننان كەيىن شىراق 3،5 ساعات بويى استانانى "جارىقتاندىرىپ" تۇرادى. شىراقتى ۇستاپ جۇرۋشىلەر ونىمەن قالانىڭ ورتالىق كوشەلەرىن ارالاۋدا.
الدىمەن الاۋ نازاربايەۆ ۋنيۆەرسيتەتىنەن «بايتەرەك» مونۋمەنتىنە جەتكىزىلەدى. كەيىن "بايتەرەكتەن" وڭ جاعالاۋداعى قالالىق اكىمدىككە جول تارتادى. ەستافەتانىڭ ۇزىندىعى 12 شاقىرىم بولماق.
الاۋدى بارلىعى 60 ادام الىپ جۇرەدى. ولاردىڭ اراسىندا بوكسشى دانيار ەلەۋسىنوۆ پەن ۆاسيليي ليەۆيت، گىر كوتەرۋ سپورتىنىڭ شەبەرى الىبەك ناۋرىزباي ۇلى، دجيۋ-دجيتسۋدان الەم چەمپيونى ءمولدىر مەكەنبايەۆا مەن شاحماتشى قىز دينارا ءسادۋاقاسوۆا بار.
ەرتەڭ، 26 قاڭتاردان باستاپ الاۋ بىرتىندەپ قازاقستاننىڭ وزگە دە قالالارىن "جارىقتاندىرادى". ءار قالادا شىراق جاعىلىپ، ەستافەتا جالعاساتىن بولادى.
شىراقتى الماتىعا ارنايى جولاۋشىلار ۇشاعى جەتكىزىپ، 29 قاڭتار كۇنى ول ۋنيۆەرسيادانىڭ اشىلۋ سالتاناتىندا ورتاق الاۋ ىدىسىنا بىرىكتىرىلەدى.
ۋنيۆەرسيادا الاۋى 22 500 شارى مەتر جەرمەن وتەتىن بولادى. ونىڭ ىشىندە 200 شاقىرىم جەردى شىراق ۇستاۋشىلار باعىندىرماق.
You Might Also Like
-
وسكەمەن قالاسىنىڭ مەكتەپتەرىندە اعىلشىن ءتىلىن بىلمەيتىن اتا-انالارعا ءتىل ۇيرەتۋ كۋرستارى اشىلدى. العاش رەت قولعا الىنعان شارا ارنايى جۇرگىزىلگەن ساۋالنامانىڭ ناتيجەسىندە جۇزەگە اسىپ وتىر. بۇل تۋرال...
-
باتىس قازاقستان وبلىسى اكىمدىگى ءبىلىم باسقارماسى كازتالوۆ اۋدانىنىڭ «پسيحولوگيالىق-پەداگوگيكالىق تۇزەۋ كابينەتى» «پسيحولوگيالىق-پەداگوگيكالىق تۇزەۋ كابينەتىنىڭ» تاربيەلەن...
