InfoHub Logo

سوۆەت ەلىندە جاڭا جىل — جاڭا تىلەك، جاڭا ءىس. سەكۋندتان قۇرالعان ۋاقىت جىلداردى جاساسا، ءبىزدىڭ ادامدار ۇلكەندى — كىشىلى ەڭبەگىمەن كوممۋنيزمنىڭ كەڭ سارايىن جاساپ جاتىر. بۇگىنگى ۇندەر، بۇگىنگى توستار جاڭا تولقىنمەن وسىنى ايتادى. سولارعا قوسىلا مەنىڭ دە ايتارىم بار.

وتكەن جىلى ادەبيەتىمىز بۇرىن شىقپاعان بيىككە شىقتى. تولىق ماعىناسىندا پروفەسسيونالدىق ادەبيەت دەپ تانىلۋى «اباي» رومانى مەملەكەتتىك باس بايگەنى الۋى — بۇعان ايقىن دالەل. 1950 جىل وسىنداي ۇلكەن ولشەۋىشىن الا كەلىپ تۇر. ونىڭ ۇستىنە بۇگىننەن ەرتەڭ اساتىن سالتىمىز بار. بۇنىڭ ءبارى ادەبيەتتىك ويدى، ىزدەنۋدى، جاۋاپتىلىقتى تەرەڭدەتە، قيىنداتا تۇسەدى. ول قيىندى جەڭبەي، ول تەرەڭگە بويلاماي ادەبيەت ءومىر شىندىعىن كورسەتە المايدى. كورسەتسە شالا-شارپى كورسەتەدى.

جاڭا جىلدا مەن، وزىمە وسىنداي شارتتار قويىپ، ۇلكەن ءىستىڭ ۇستىندە وتىرمىن. ادەبيەتىمىز ءالى سوسياليستىك يندۋستريانى مەڭگەرە العان جوق. ەلىمىزدىڭ ماقتانىشى بولىپ وتىرعان قاراعاندى سياقتى ءوندىرىس الىپتارى، كومىر كوچەگاركاسى، ەڭبەك قازانى عانا ەمەس، ادام ساناسىنىڭ قاينار بۇلاعى دا، ادەبيەت ماقتانىشى دا بولىپ وتىر. وسى قاراعاندى جايىندا ەكى كىتاپ جازباقپىن. ءبىرىنشى كىتاپ سوۆەتتىك قاراعاندىنىڭ العاشقى ون جىلىن قامتيدى. الداعى جازدا، ەڭ ءارى كەتسە رەسپۋبليكامىزدىڭ وتىز جىلدىعىنا دەيىن جازىپ بىتىرمەكپىن. ەكىنشى كىتاپ تەمىرتاۋدى ىشىنە الا، كەيىنگى ون جىلدى قامتيدى. بۇل 1951 جىلدىڭ سىباعاسى.

قاراعاندى 1930 جىلدىڭ 20 مايىندا تورت-بەس جاپىراق باراق، جالعىز عانا ءتۇتىنسىز تۇربا ەدى. سودان بۇگىنگى قاراعاندىنى جاساۋ كەرەمەت ەمەس پە؟ ول بولشيەۆيك پارتياسى باستاعان مىڭنىڭ كەرەمەتى! ءبىردىڭ باسىنا سىيمايدى. ءبارىن كورسەتۋ ءتىپتى قيىن. نەگىزگى قاسيەتتەرىن بەرە السام دا ماقتان ەتەر ەدىم.

1950

---