InfoHub Logo

وتكەن بوكەي حان مارقۇم بولعان سوڭ، جاڭگىر حاندىق دارەجەسىن الۋعا پاتشا اعزام حازىرەتىنە بارعان ۋاقىتتاعى جولداستارى قايبالى شوكە، قارا قازاقتان بايباقتى ۇرىعىنىڭ التىكە تانىس، شەركەشتى ءجاميش بالاسى ەكەن. حان ءبىر اربا دا، شەركەش بي ءوز الدىنا ءبىر اربا دا، تورەلەر ات ۇستىندە ەكەن. تورەلەر ات ۇستىنەن جالىعىپ ءماسليحات ەتەدى، «ەندىگى تۇسكەن جەردە شەركەشتىنىڭ ارباسىن بىزدەر مىنەلىك، ول — قارا قازاق، بىزدەر — تورەمىز، اربا بىزدەرگە لايىق قوي»، — دەپ. مۇنى ءبىلىپ شەركەشتى بي ۇيگە كىرمەي، سىرتتاعى ارباسىنىڭ ۇستىندە جاتىپتى. حان شاقىرتىپ الىپ: «شەركەشتى، اربادا ناعىپ جاتىرسىڭ؟» — دەگەندە، ايتىپتى: «ايىرىلاتىن ارباعا امانداسىپ جاتىرمىن»، — دەپ. حان ايتىپتى: «بۇل پىكىرلەرىڭىزدى قويىڭىز، اركىم ءوزىنىڭ كولىگىمەن ءجۇرسىن»، — دەپ.

سونان پاتشا حازىرەتىنە ءجۇز كورىسكە كىرگەندە، حان جۇرەكسىنىپ شوكەگە: «الدىنان ءجۇر!» — دەپتى-اۋ. سوندا شەركەش ايتىپتى: «بۇل ەسىكتى كورمەيمىن دەپ كەلىپ پە ەڭ، كورەم دەپ كەلدىڭ عوي، كىرمەيمىن دەپ كەلىپ پە ەڭ، كىرەم دەپ كەلدىڭ عوي، ءوزىڭ ءجۇر»، — دەپتى. كىمدە بولسا، اۋەلگى كىرگەن كىسى حان بولماق ەكەن. شەركەش سونى ويلاپ ايتقان ەكەن. سونان كۇندە پاتشا تاراپىنان بيلەرگە ءوز الدىنا ءتۇرلى نىعىمەتلار بەرىلەدى ەكەن. ءبىر كۇنى تورەلەر ايتادى: «پاتشا بۇگىن بىزدەردى جىبەرەدى ەكەن»، — دەپ. شەركەش ايتىپتى: «بۇل ورىنعا تاماق ءۇشىن كەلگەنىمىز جوق قوي»، — دەپ. بۇل سوزدەرىن تىڭداپ، ءبىلىپ تۇرعان ادامدار حانعا جەتكىزىپتى ھام شەركەش حانعا ايتىپتى: «پاتشادان ناماز وقيتىن ورىن سۇراساق  قالاي بولار؟» — دەپ. حان سول سوزىمەنەن پاتشادان سۇراپتى: «مۇحاممەديسكيي زاكون بويىنشا، بىزلەرگە ناماز وقيتىن ورىن بولار ما؟» — دەپ.
«بولار»، — دەپ پاتشا حازىرەت ءبىر ەسىك اشىپ، ءىشى مەشىت، جايۋلى جايناماز، وراۋلى شالما، ءتاسبيح سىقىلدى ءتۇرلى جاقسى زاتتار. سول ورىنعا كەتكەنشە ناماز وقىپ تۇرعانلار ايتادى: «پاتشانىڭ مۇسىلمانعا ناماز وقۋعا سالدىرعان مەشىتى ەكەن، ەڭ اۋەلى ەسىگىن اشقان — جاڭگىر»، — دەپ.

سونان حان حاندىق دارەجەسىن، بيلەرگە شەن بەرىلگەندە، شەركەش بيگە يىقتا جۇرەتىن ەڭ ۇلكەن شەن بەرىلىپتى. حان جولداستارىمەنەن قايتىپ كەلە جاتىپ ۋفاداعى نۇرالى حاننىڭ باسىنا زيارات ەتىپ بولعان سوڭ، حان ايتىپتى: «ا، بابام! سەنىڭ وسى جەردە جاتقانىڭ قارا قازاقتان بولدى-اۋ، قازاقتىڭ ىشىندە سىرىمنان بولدى-اۋ!» — دەپتى. سول ءسوزدى ايتقاندا، شەركەش بي: «ءىشىم مۇزداپ كەتتى-اۋ!» — دەپتى. ار جاقتا نۇرالى حاندى سىرىم شاۋىپ، سونان قاشىپ بارىپ ۋفانى تاپقان ەكەن.

وقۋعا كەڭەس بەرەمىز:

جىلقىنىڭ تورىسى كوپ پە، توبەلى كوپ پە؟ (ءى نۇسقا)

سىرىمنىڭ نۇرالى حاندى شابۋى (ءىى نۇسقا)

بايماعامبەت سۇلتان مەن سىرىم باتىر

---