InfoHub Logo

قازاقتىڭ قارا دومبىراسى، حالىق اندەرى مەن كۇيلەرى ۋاقىت وتكەن سايىن جاپون حالقىن باۋراي باستادى، - دەپ حابارلادى "24.kz".

تەلەارنانىڭ مالىمەتىنشە، تاكاحاشي ناوكي ەسىمدى جاپون ونەرپازى دومبىرا، قىلقوبىز جانە سىبىزعىنى ءمىنسىز مەڭگەرىپ العان. تاكاحاشي ناوكي - فۋكۋي پرەفەكتۋراسىنىڭ تۇرعىنى. اعىلشىن تىلىنەن ساباق بەرەدى. الايدا جاس ماماننىڭ بار ىنتا-ىقىلاسى تىلگە ەمەس، قازاقتىڭ ۇلتتىق اسپاپتارىنا اۋعان سياقتى. ۇلى دالا ەلىنىڭ اندەرى مەن كۇيلەرىن ناسيحاتتاۋ جاپون جىگىتىنىڭ بيىك ماقساتىنا دا اينالعان.

"قازاقستان - وتە كوركەم، تاڭعاجايىپ ەل. مەن وندا ءجيى بارا الماسام دا، سول جاقتا ۇيرەنگەن سۇيىكتى ءىسىمدى ءومىر بويى جالعاستىراتىن بولامىن"، - دەيدى دومبىراشى تاكاحاشي ناوكي.

تاكاحاشيدىڭ قازاق اۋەندەرىنە دەگەن سۇيىسپەنشىلىگى 13 جىل بۇرىن كۇتپەگەن جەردەن ويانعان. كەزدەيسوق قولىنا تۇسكەن ديسكتەن دومبىرانىڭ ءۇنىن ەستىگەن ول مۇنىڭ نەندەي اسپاپ ەكەنىن بىلۋگە قۇمارتادى. كوپ ۇزاماي ىنتىزار بولعان دومبىراسى قولىنا تۇسەدى. سول ساتتەن باستاپ ونەرلى جىگىت كۇي تارتۋدى وزدىگىنەن ۇيرەنە باستاعان. كيەلى اسپاپتىڭ قۇدىرەتى كەيىن ونى قازاقستانعا دا جەتەلەپ الىپ كەلدى. بىلىكتى ۇستازدارمەن تانىسىپ، ءوزى ونەرپازدارمەن ارالاسقاننان كەيىن، تاكاحاشي "قازاقتىڭ مادەنيەتىنە تىپتەن قۇمارتتىم"، - دەيدى. ونىڭ تاڭداعان جارى دا قازاق قىزى.

"كۇيەۋىم ەكەۋىمىز دۋەت قۇردىق، وتباسىلىق جانە مۋزىكالىق دۋەت. جاپوندىقتار قازاق اندەرى مەن مادەنيەتىنە قاتتى قىزىعادى، ال حالىق اندەرىن تىڭداعاندا تىپتەن قۋانادى. سودان كەيىن ولار قازاقستان تۋرالى بىلگىلەرى كەپ، ونىڭ قاي جەردە، حالقى قانداي ەكەنىن سۇراي باستايدى. ءبىز ءبارىن ايتىپ بەرۋگە تىرىسامىز"، - دەيدى تاكاحاشي ناوكيدىڭ جۇبايى، مۋزىكانت ينارا سەرىكبايەۆا.

---