InfoHub Logo

انا اۋىر ناۋقاسقا شالدىققان ەدى. توسەك تارتىپ جاتىپ قالعان. وسى كەزدە ونىڭ جالعىز ۇلى ۇيلەندى. انا ءوز ومىرىندە بۇل تويدى اسىعا كۇتكەن ەدى. وندا ۇنەمى ءوزىن تويدىڭ ورتاسىندا مارە-سارە بوپ جۇگىرىپ جۇرگەن قالپىندا ەلەستەتەتىن. ءبىراق اناعا قازىرگى ساتتە اۋىر ناۋقاسى بۇعان مۇمكىندىك بەرمەدى. ونىڭ ورنىنا تويدا سىڭلىلەرى جۇگىرىپ ءجۇردى عوي. سوندا دا انا توسەگىندە جاتىپ الىپ، ۇلىنىڭ ۇيلەنىپ جاتقاندىعىنا قۋانىپ جاتتى.

توي دا ءوتتى. ادامدار تاراپ كەتتى. تەك انانىڭ جانىندا كەشە عانا ۇيلەنگەن جاس جۇبايلار قالدى. جاستار ۇنەمى اس ىشەتىن مەزگىل بولعاندا، انانى دا وزدەرىمەن بىرگە اس ىشۋگە شاقىراتىن ەدى. ءبىراق انا وعان جارامايدى عوي. دەگەنمەن ۇنەمى: "مەنى وزدەرىڭنىڭ اس ىشكەلى جاتقان بولمەلەرىڭە اپارىپ جاتقىزىڭدارشى، - دەيتىن انا. - مەن سەندەردىڭ قاتار وتىرىپ اس ءىشىپ وتىرعاندارىڭدى كورىپ جاتقىم كەلەدى".

جۇبايلار انانى وزدەرى اس ىشكەلى جاتقان بولمەگە اكەلىپ جاتقىزادى. اناعا ءوزىنىڭ سۇيىكتى ۇلى مەن ۇلىنىڭ جارى - ءوزىنىڭ كەلىنىنىڭ قاتار وتىرىپ اس ءىشىپ وتىرعانىن كورۋ ۇنايتىن بولۋى كەرەك. انا ءوزى اس ىشپەسە دە، ۇلىنىڭ اس ءىشىپ وتىرعانىن كورىپ جاتقاندىعىنا قۋانادى. ونى ەندى انا ۋايىمدامايدى. ونىڭ ەندى قارنى اشىپ قالمايدى. ونىڭ تاماعىن بەرەتىن ادامى بار.

انانىڭ ۇلى سپورتشى جىگىت ەدى. مۇمكىن ول ءار جارىسىنان ورالعان سايىن، انا ونى ءوز قولىمەن تاماقتاندىرعان شىعار. سوندا ۇلى اناسىنا ەركەلەپ وتىرىپ، ءوزىنىڭ جارىستا قالاي جەڭگەندىگىن، قارسىلاسىنا قانداي ءادىس قولدانعاندىعىن ماقتانىپ وتىرىپ ايتىپ بەرگەن بولار. اناعا وسى ءبىر ءوزىنىڭ سوقتالداي ۇلى ءالى بوبەك سياقتى كورىنەتىندىگى قىزىق. انا ونى ماقتانىش ەتەتىن ەدى. ونىڭ ەندى كيىمى كىرشەڭ تارتىپ جۇرمەيدى. مۇمكىن انا ونى ءوز قولىمەن تالاي رەت جۋىپ تا بەرگەن بولار. انا ەندىگى ساتتە ۇلىن ءوزىنىڭ سۇيىكتى كەلىنىنە تاپسىرىپ جاتقان سەكىلدى ەدى. عۇمىرىنىڭ سوڭعى كۇندەرىندە وسى ءبىر كورىنىستەن شۇكىرشىلىك ەتىپ، قۋات الىپ جاتتى.

انا كوپ ۇزاماي كوز جۇمدى. انالار - ومىرگە ۇرپاق قالدىرىپ بارىپ وتەتىن جاندار. ال ولاردىڭ ۇرپاقتارى جالعاسا بەرەدى.

---