جاس قادامعا جان اشىر ءسوز
جاس تالانتقا تاجىريبەلى، كوكسە ماماننىڭ سىن ايتۋى وتە قاجەت. ارينە، ونداي سىن ەڭ الدىمەن پەداگوگيكالىق، ۇستازدىق سىن بولماعى شارت. ال ۇستازدىق سىننىڭ اسا جاۋاپتىلىعى ءوز الدىنا، ول سونىمەن بىرگە ەرەكشە ۇقىپتى، اقاۋسىز ءادىل بولۋدى تالاپ ەتەدى. جاس تالانتتىڭ وسال جاعىن، ءار كەمشىلىگىن تالداپ ءتۇسىندىرىپ، سونىمەن بىرگە جاڭا تالاپ ادەبيەت، يسكۋسستۆو دۇنيەسىنە نە اكەلدى، ونىڭ جاقسىسى قايسى، تالانتىنىڭ بەيىم تۇرعان وسكەلەڭ جاعى قايسى دەگەن سۇراقتارعا تالداپ جاۋاپ بەرىپ ونى جاڭا بيىككە مەڭزەۋ كەرەك. ءار جاس اۆتوردىڭ ءالدى، ءالسىز جاعىنىڭ سىرىن اشىپ، ەكەۋىن بىردەي ساراپقا سالماي، ءبىر بەتكەي كەتكەن سىڭارجاق سىن ۇستازدىق مىندەتىن اتقارا المايدى.
وسى تۇرعىدان جاس دراماتۋرگ قالتاي مۇحامەدجانوۆتىڭ «بولتىرىك بورىك استىندا» پەساسى جانە سول پەسا بويىنشا جاسالعان قازاقتىڭ اكادەميالىق دراما تەاترىنىڭ سپەكتاكلى جايىندا ءبىراز ءسوز ايتپاسقا بولمايدى. بۇل پەسانى جاس دراماتۋرگ جازعان، ونى قويۋشى تەاتردىڭ جاس رەجيسسەرى ءا. مامبەتوۆ، مۋزىكاسىن جازعان جاس كومپوزيتور ع. جۇبانوۆا، دەكوراسياسىن جاساعان تەاترعا سوڭعى جىلدارى كەلگەن جاس سۋرەتشى م. ەرجانوۆ. سپەكتاكلدە نەگىزىنەن جاس ارتيستەر وينايدى.
ءسوز جوق، پەسادا ەلەۋلى كەمشىلىكتەر بار. سولاي بولا تۇرا وسى پەسا كورۋشىلەردى نە سەبەپتى ءسۇيسىندىردى؟ ساحناعا جانە ساحنا بولعاندا ۇلكەن ساحناعا، العاش شىققان جاس دراماتۋرگ — كومەديوگراف قانداي جاڭا لەبىز، سونى دۇنيە اكەلدى؟ قانداي ەرەكشەلىگىمەن كوز قۋانتتى؟
ارينە، الدىمەن تاقىرىبىن ايتۋعا بولادى. ساحنامىز بەن كورۋشىلەر سۋساپ وتىرعان بۇگىنگى كۇننىڭ تاقىرىبى بىردەن نازار اۋدارۋى حاق. جاس دراماتۋرگ ساحناعا سوۆەت جاستارىنىڭ جارقىن ءومىرىن شىعاردى. ءبىراق تاقىرىپ وزىنەن-وزى شىعارمانىڭ ساپاسىن بەلگىلەي المايدى. سوندا شىعارمانىڭ كورۋشىلەردى قىزىقتىرعان ءساتتى تابىسىنىڭ سەبەبى نەدە؟ ونىڭ ەڭ ءبىرىنشى سەبەبى وسى كۇنگە دەيىن ات توبەلىندەي قالام يەلەرىمەن تۇيىقتالعان قازاق دراماتۋرگياسىنا جاڭا داۋىس، جاس لەبىز قوسىلدى. مەيلى، ول ءالى كەمەلىنە كەلىپ، شەبەرلىك ءتاسىلىن مەڭگەرە الماي جاتقان شىعار، ءبىراق قارا ءدۇرسىن سوقپاققا تۇسپەي، كورگەن ءومىرىن ءوز ەلەگىنەن وتكىزىپ، ءوزىنىڭ كوركەمدىك تۇرعىسىنان سۋرەتتەپ، ءوز ماشىعىن، ءوز پوچەركىن اڭعارتا كەلدى. ەڭ الدىمەن جۇرتشىلىقتى سۇيسىنتە قۋانتاتىن نارسە جاس تالاپ — كوڭىلدى جارقىن تالانت يەسى ەكەن. ول ءبىزدىڭ بۇگىنگى جايدارى ومىرىمىزگە جاراستىقتى. جاس اۆتوردىڭ كەيىپكەرلەرى ناعىز قۋاقى، تاپقىر، وتكىر تىلمەن سويلەيدى. جانە ولاردىڭ سوزدەرى ادەيى ەكشەپ الىنعان افوريزم، تۇرمىستا قولدانىلا بەرمەيتىن ويدان شىعارىلعان ناقىل سوزدەر ەمەس، كۇندەلىكتى ومىردە ايتىلىپ جۇرگەن ۇتىرلى، ۇشقىر سوزدەر. ايتا كەتەتىن نارسە — ءبىزدىڭ كەيبىر پەسالاردا اشەكەيلى، ناقىشتى سوزدەر كوپ قولدانىلىپ شىعارمانىڭ رەاليستىك ارقاۋىنىڭ اجارىن بۇزىپ تۇرادى. جاس جازۋشى ونداي شالاعايلىقتان ساقتانعان. كەيدە ءسوزۋارلىققا سالىنىپ، اۆتوردىڭ ورىنسىز ءتىل بەزەپ كەتەتىن جەرلەرى بار. ول جاستىقتىڭ، تاجىريبەسىزدىكتىڭ سالدارى ش. ايمانوۆ ايتقانداي: «پەسا ءتىلىنىڭ جاقسى جاعى: ول كوپكە تۇسىنىكتى، ءبىرسىدىرعى جاتىق» بولۋىندا ەمەس، ەگەر ءتىل ونداي بولسا سۇرقاي، سۇرەڭسىز بولار ەدى، كومەدياعا لايىقتى ويناقى، شەنەگەن ادامىن شەگەلەپ تاستاعانداي وتكىر، تاپقىر، اقىلدى بولۋىندا. ءبىز «اقىلدى ءتىل» دەگەن تەڭەۋدى ادەيى الدىق. پەسا ءتىلى اقىلدى ويلى ءتىل.
جاس جازۋشى تالانتىنىڭ كۇشتى جاعى ادام حاراكتەرلەرىن، جەكە وبرازدار جاساي ءبىلۋى، ال وسال جاعى سول حاراكتەرلەردى قاعىستىرىپ، وقيعانى ءبىر ارقاۋعا ءورىپ كومپوزيسيا قۇرۋعا كەلگەندە ولاقتىعى. پەسادا جەكە دارالانعان، بىر-بىرىنە ۇقسامايتىن سونى تىڭ حاراكتەرلەر، وبرازدار بار. مىسال ءۇشىن پەساداعى جاعىمسىز دەپ اتالاتىن ءۇش كەيىپكەردى الايىقشى. پسيحولوگياسىنا كاپيتاليزم مەن فەوداليزمنىڭ قالدىعى مول سىڭگەن، سىرتى سۇيكىمدى، جاس تا بولسا ايلالى، اككى، مانساپقور ساپار، يا بولماسا تۇرمىستىڭ جەڭىل جاعىنا بوي ۇرىپ، ومىردەن ماعىناسىز ۇساق قىزىق ىزدەپ، قۇرالاقان قالعان ارىستان — بۇل ەكەۋى بىر-بىرىنە ۇقسامايدى. ارىستاننىڭ ارمانى بولىمسىز، ايتەۋىر ءبىر جەرگە «تىرناعىن ىلىكتىرۋ» بولسا، ساپار ارىگە، بيىككە ۇمتىلادى. ارينە، ساپار ارىستاننان الدەقايدا ءىرى دە، زياندى دا.
ال مارفۋعا شە؟ جالعان تاربيەدەن، تاتىمسىز ورتادان جۇققان مارفۋعا بويىندا كوپ مىندەر بار. ونىڭ ءبارىن اۆتور كومەديا زاڭىنا سايكەس كۇلكىلى ەتىپ بەرەدى. وسى كەيىپكەر كەيبىر جاعدايلاردا دراماتۋرگيامىزدا ا. كورنەيچۋكتىڭ اعا ششۋكاسىنان باستاپ كوبىرەك سۋرەتتەلگەن داعدىلى مەششانكا ايەلدەردى ەسكە سالادى. العاشقىدا جاس دراماتۋرگ سول جاۋىر بولعان داعدىلى دايىن وبرازدى قايتالاپ كەتپەس پە ەكەن دەپ قورقىپ تا قالاسىڭ. ءبىراق ول كۇدىك بەكەر بولىپ شىعادى.
اۆتور بۇل وبرازدى تىڭ، جاڭاشا شەشەدى. شىنداپ ۇڭىلە قاراساڭىز، مارفۋعا تاربيەنىڭ قۇربانى، ءبىراق كوپتەگەن جامان ادەت ءالى دە بويىنا ءسىڭىپ بولماعان. ال، جانى جاقسى، بالاداي اق كوڭىل، ار جاعىندا قالتقىسى جوق. ونىڭ سوۆەت جاستارىنىڭ جاقسى ورتاسىنا تۇسكەنىنە، سۇڭعات، ءانۋار، ءجاميلالار اراسىندا جاقسى ونەگە كورىپ، جارقىن جولعا شىعارىنا كورۋشى سەنەدى.
جاعىمدى كەيىپكەرلەردىڭ ىشىنەن ءانۋار مەن قارت قويشى بەكەن وبرازدارىن ەرەكشە اتاپ كەتكەن ءجون. ءبىر ەسكەرەتىن نارسە ءبىزدىڭ دراماتۋرگيادا بۇگىنگى زامانعى جاعىمدى كەيىپكەر وبرازى كوبىنە قالتقىسىز، قيمىلى از، قۇرعاق اقىلعا قۇرىلادى. ال، ءانۋار ونداي جالاڭ قابات، ءقارا-دۇرسىن ەمەس. باسىندا قايعىسى بار، ءوز سەزىمىن بىلدىرۋگە ولاق، مىنەزىنىڭ دە ولپى-سولپى جاقتارى جوق ەمەس. ءبىراق ونىڭ جانى جاقسى، جاقسىلىققا قۇمار، جاماندىققا ءوش. ومىردەگى زۇلىمدىقپەن الىسا بىلەتىن، قايراتتى جاس. ءانyap ساپارعا اقىل ايتىپ، ۋاعىز وقىپ جاتپايدى. ول ساپاردىڭ جاعىمسىز مىنەزدەرىن اششى مىسقىلمەن اشكەرەلەيدى. جاس اۆتور جاعىمدى كەيىپكەردىڭ اۋزىنا سىرى كەتكەن قۇرعاق اقىل سالماي، ونىڭ قولىنا ساتيرانىڭ وتكىر قۇرالىن ۇستاتقان. مۇنداي ءساتتى جاڭالىقتى ەسكەرمەۋگە بولمايدى. اۆتوردى دا، ءارتيسى نوعايبايەۆتى دا ءانۋار وبرازى ءۇشىن سوگۋ قيانات. جوق، كەرىسىنشە، ولارعا: جاقسى وبرازدى، جاستارىمىز اڭساعان جارقىن بەينەنى ءساتتى باستادىڭدار، ەندى وسى باعىتپەن، ءبىزدىڭ زامانىمىزدىڭ جاعىمدى كەيىپكەردىڭ وبرازىن جالاڭ ستاندارتتان شىعارىپ، جانداندىرا، تولىقتىرا، اجارلاندىرا ءتۇسىپ، رۋحاني دۇنيەسىن تەرەڭدەتە، بايىتا ءتۇسىپ، ونىڭ شىن ومىردەگى ورنىنا ساي ءىرى تۇلعاسىن جاساڭدار دەگەن تىلەك ارتۋ كەرەك.
ال جاس اۆتوردىڭ وسال جاعى — جاقسى، تىڭ وبرازدار جاساي وتىرىپ، كەيدە ەپيزودتىق وبرازداردى بىر-ەكى شتريحپەن اشا وتىرىپ، كوبىنە سول وبرازدارعا دراماتۋرگيالىق تولىق جۇك تاۋىپ بەرە الماي قالادى. پەساداعى بار ادامداردىڭ تاعدىرى مەن ىس-ارەكەتى شيەلەنىسىپ، بار ارقاۋعا — نەگىزگى تارتىس توڭىرەگىنە ورىلمەگەندىكتەن كوپ جەردە شىعارمانىڭ ءجىبى بوساپ كەتەدى دە كەيبىر كەيىپكەرلەر وقيعادان تىس، شەتكەرى قالادى. مىسالى، وسەكشى كەمپىر مەن ارىستان پەساداعى وقيعاعا ارالاسپاي، سىرت جۇرەدى. ولاردى ءتىپتى شىعارمادان زيانسىز-اق الىپ تاستاۋعا بولادى. ال، كولحوزداعى كارتينا ساحنالىق جاعىنان اپ-ادەمى ىستەلگەنمەن پەساداعى وقيعاعا ءتىپتى قاتىناسسىز، تەك «ساپار وڭباعان ادام» دەگەن پىكىردى ايقىنداي ءتۇسۋ ءۇشىن عانا الىنعان بولەك ەپيزود.
شىعارما جاساۋ نەگىزىنەن ەكى كەزەڭگە بولىنەتىن سياقتى. ءبىرىنشى، ادام وبرازدارىن، حاراكتەرلەرىن جاساۋ، ەكىنشى، سولاردى نەگىزگى يدەياعا سايكەس قارىم-قاتىناسقا كەلتىرىپ، ارەكەتكە كوشىرۋ. جايباراقات ايتقاندا الدىمەن قۇرىلىس ماتەريالدارىن ىستەۋ، سودان كەيىن ءۇي سالۋ سياقتى. ال، جاس دراماتۋرگ جاقسى كىرپىش قۇيۋعا ءبىراز ماشىقتانىپ قالعانمەن، سونى قالاستىرۋعا ءالى ولاقتاۋ. ونىڭ شەبەرلىك جولىندا كوپ ىزدەنەتىن باعىتى — شىعارمانىڭ ارحيتەكتونيكاسىن جاساۋ، كومپوزيسيا قۇرۋ شەبەرلىگى. پەسادا ەڭ الدىمەن نەگىزگى كونفليكت — تارتىس ارقاۋى مىقتاپ تارتىلۋ كەرەك تە جاناما تارتىستار نەگىزگى كونفليكتىگە باعىنىپ، سونى تولىقتىرىپ، دامىتا تۇسۋگە قىزمەت ەتۋى كەرەك.
ال وسى پەسانىڭ ساحنالىق ءومىرى — سپەكتاكلدەن جالعىز ش. جانداربەكوۆا ويناعان مارفۋعادان باسقا ءىلىپ الار ەش نارسە تاپپاعان ش. ايمانوۆ پىكىرىنە داۋ ايتپاسقا ءاددىمىز جوق. ەڭ الدىمەن اكتەرلەر ويىنى جونىندە. جەكە رولدەرگە توقتالماستان بۇرىن ءبىر ايتا كەتەتىن نارسە — وسى سپەكتاكلدە ماشىقتى جاقسى انسامبل بار. ءار اكتەر ءوز مىندەتىمەن بىرگە، ويىن سپەكتاكلدىڭ نەگىزگى تالابىنا باعىندىرا بىلگەن. مەن بۇل ارادا كورۋشىلەر كونفەرەنسياسىندا ءادىل دە جاقسى باعالانعان ش. جانداربەكوۆا، م. سۇرتىبايەۆ، ز. دوسانوۆا، ى. نوعايبايەۆتار جاساعان باستى كەيىپكەرلەردىڭ وبرازدارىنا توقتالىپ جاتپاق ەمەسپىن. تەك تەاتر سىنىنداعى ءبىر جاعدايدى ەسكەرتە كەتكىم كەلەدى. ادەتتە سىنشىلار باستى رول ويناعان ارتيستەر مەن بەلگىلى ءىرى اكتەرلەردىڭ ويىنىنا عانا توقتالادى. ءارتۇرلى سەبەپتەرمەن ۇلكەن رولدەرگە قولى جەتپەي قىسقا، ەپيزودتىق رول ويناپ جۇرگەن اكتەرلەر تىلگە ىلىنبەيدى. وسى ءبىر ادىلەتسىزدىكتى ءارى اكتەر، ءارى رەجيسسەر ش. ايمانوۆتىڭ ەسكەرمەگەنى قىنجىلتادى.
سپەكتاكلدە ەكى-ۇش قانا كورىنەتىن قويشى بەكەن وبرازىن الىڭىزشى. اتاق، داڭقتان قاعىس، تەاتردىڭ قاراپايىم ەسكى ءارتيسى ر. سالمەنوۆ وسى شاعىن وبرازعا قانشالىقتى تەرەڭ ماعىنا بەرگەن. سالمەنوۆ ويناعان بەكەندە حالىقتىق كوپ قاسيەتتەر بار. قاراپايىم ەڭبەك ادامى سابىرلى دا ويلى. حالىقتاي كەڭ پەيىلدى، تۇرعان بويى مەيىرىم. وسىنداي كەڭ پەيىلدى مەيىربان ادامنىڭ ساپاردىڭ وپاسىزدىعىنا قاتتى تولقىپ، ىزالانىپ، وعان لاعنەت ايتاتىن جەرى قانداي كۇشتى شىققان.
بورانكۇل وبرازىنىڭ پەساداعى وقيعاعا قاتىناسى از ەكەنى راس. ءبىراق، وسى ءرولدى ويناعان، وسى كەزگە دەيىن كوزگە تۇسپەي جۇرگەن جاس ارتيسكە قانابايەۆا ەرەكشە ءبىر تالانت ۇشقىنىن اڭعارتقانىن نەگە ەسكەرمەيمىز؟ ول ويناعان بورانكۇلدى تەاتر تىلىندە حاراكتەرلى وبراز دەيدى. مۇمكىن جاس اكتريسا تالانتىنىڭ ءبىر قىرى سول شىعار. قالاي بولعاندا دا اكتريسا نانىمدى، جاندى وبراز جاسادى. سونداي ءبىر سالدىرلاقتاۋ، قيمىلى ءىرى، ءتىلى وتكىر، اقكوڭىل، اڭعال قازاق ايەلىن ءار اۋىلدان كورگەن سياقتىمىز. ەسكى تانىسىڭداي كوزگە وتتاي باسىلادى. جاس اكتريسا جاساعان وبرازىن ناعىز شىن ومىردەن العان. قاي اكتەرگە بولماسىن ناعىز قۇنارلى وبرازدى حالىق اراسىنان تاباسىڭ، باقىلاپ، زەرتتەپ كوڭىلگە تۇيە ءبىل، ومىرگە تەرەڭىرەك ءۇڭىل دەگەن تىلەك ارتۋ كەرەك.
جەكە كەيىپكەرلەردىڭ كوڭىل كۇيىن، وقيعا ماعىناسىن اشاتىن سىرلى مۋزىكا جانە تۇگەل سپەكتاكلدىڭ اۋەنىن اڭعارتاتىن جايدارى، كوڭىلدى مۋزىكا جازعان ع. جۇبانوۆا جانە كەيىپكەرلەردىڭ ارەكەتتەرى مەن وقيعالاردىڭ ماعىناسىن اشا تۇسەتىن توڭىرەك بەينەسىن — دەكوراسيا جاساعان جاس سۋرەتشى م. ەرجانوۆ ەڭبەكتەرىندەگى قۇلاق قۇرىشىن قاندىرار، كوز قۋانتار جاڭالىقتى تالداۋعا شاعىن ماقالانىڭ كولەمى كوتەرمەيدى. ءبىراق رەجيسسەر جۇمىسى جونىندەگى ءسوز ەتىپ وتىرعان ماقالاداعى ادىلەتسىز پىكىرگە توقتالماسقا بولمايدى. تالاپتى جاس رەجيسسەر ءا. مامبەتوۆتى ىلعي قۇلاۋمەن كەلە جاتقان «قادامى قۇتسىز» جان ەتىپ كورسەتۋ ادىلەت ەمەس. مامبەتوۆ تاجىريبەسى از بولعانمەن كوپ ىزدەنەتىن جاس. ول بىرنەشە سپەكتاكل قويدى. ونىڭ جامبىل وبلىستىق تەاترىندا قويعان گولدونيدىڭ «ەكى مىرزاعا ءبىر قىزمەتشىسى»، گۋريەۆ وبلىستىق تەاترىندا قويعان شتەيننىڭ «جەكە باستىڭ ءىسى»، قازاقتىڭ اكادەميالىق دراما تەاترىندا قويعان «جالعىز اعاش ورمان ەمەسى» ءساتتى شىققان، جاس تالانتتىڭ ءوز ماشىعىن تانىتقان ەڭبەكتەر.
جاس رەجيسسەردىڭ وسى سوڭعى سپەكتاكلىن ءساتسىز دەگەن پىكىرگە قوسىلا المايمىز. ش. ايمانوۆ سىن ايتقاندا پەسانىڭ جانرىن، كەيىپكەرلەردىڭ قانداي ورتادان ەكەنىن ۇمىتىپ كەتەتىن سياقتى. ول ساحناداعى كوڭىلدى، كۇلكى كورىنىستەردى ۇناتپايدى. رەجيسسەر ستۋدەنتتەر تۇرمىسىن ۇساق-تۇيەكتى قازباي-اق جەكە دەتالدەر ارقىلى نانىمدى، ايقىن كورسەتە وتىرىپ، جاستار ومىرىنەن ءازىل، قالجىڭعا، كوڭىلدى كۇلكىگە تولى جاستىق شاققا لايىق جايدارى سپەكتاكل جاساعان. راس، فينالىنا داۋ ايتۋ كەرەك، ال ودان باسقا سپەكتاكل تۇگەل كومەديالىق پلاندا شەشىلگەن. كوپ كورىنىستەردى تالداپ جاتۋعا ۋاقىت بولماعاندىقتان سىنشى ۇناتپاعان ءانۋاردىڭ كاستريۋل الا جۇگىرەتىن كورىنىسىن الايىقشى. ءانۋار سۇيگەن قىزىنان ايرىلىپ قايعى-قاسىرەت ۇستىندە وتىر. ونىڭ كۇيزەلىسىن مۇڭلى مۋزىكا ايقىنداي تۇسەدى. وسى كەزدە ءبىر ستۋدەنت كەلىپ ءانۋاردى مازالاپ كاستريۋل سۇرايدى. ول ونى تۇسىنبەيدى. ستۋدەنت كەتىپ ەكىنشى رەت ەسىك قاعىلعاندا، اشۋلى ءانۋار تاعى كاستريۋل سۇراۋعا كەلگەن ەكەن دەپ ويلاپ: «ءما كاستريۋل» دەپ كىرىپ كەلە جاتقان ادامعا كاستريۋلدى ۇستاتا سالادى. سويتسە ول باسقا كىسى. رەجيسسەر ءانۋاردى قايعى-قاسىرەتكە باتىرىپ، سول جەردەن نۇكتە قويمايدى. ويتسە كومەديانىڭ شىرقى بۇزىلار ەدى. ول درامالىق قايعىلى ساحنانى پسيحولوگيالىق جاعىنان نانىمدى وزگەرتىپ، كومەديالىق كوڭىلدى ارناعا تۇسىرەدى. ءسويتىپ جانرعا الالىق كىرگىزبەي، ءبىر ماقساتقا، كوڭىلدى كومەديا ماقساتىنا باعىندىرادى.
العاشقى جانە سوڭعى اكتىنىڭ باسىندا ادەمى جاسالعان كورىنىس — ساپاردىڭ گۇلدەن گۇلگە سەكىرگەن كوبەلەك سيپاتىندا كورىنۋ، سپەكتاكلدىڭ باس-اياعىنىڭ ماياكوۆسكييدىڭ جاسالعان جاستاردى اشكەرەلەيتىن جالىندى جىرىمەن كومكەرۋى — شىعارمانىڭ يدەياسىن ايقىنداي تۇسەتىن ساتىمەن تابىلعان جاڭالىقتار.
ءا. مامبەتوۆ ىزدەنىپ، ءوسىپ كەلە جاتقان تالانتتى رەجيسسەر. ءبىراق ونىڭ بويىنداعى باستى كەمشىلىك ءسوز ماعىناسىنا تەرەڭ ۇڭىلە الماي ءجۇر. سوندىقتان دا اكتەر سوزدەرى كورۋشىگە جۇدەپ جەتەدى. جاس رەجيسسەر اكتەرلەرگە ءار ءسوزدىڭ سىرىن، استارىن اشىپ بەرە المايدى. كومەديالىق كۇلكى كورىنىستەردى قۇبىلتىپ، جاقسى وينايتىن رەجيسسەر كەيبىر جان تەبىرەنتەر درامالىق ساحنالاردىڭ شەشىمىن تابا الماي ءجۇر.
شاعىن ماقالادا سپەكتاكل سياقتى جيىنتىق شىعارمانى تۇگەل تالداۋ قيىن. ءبىراق ءبارىمىز بىردەي باس يەتىن، سىننىڭ بەرىك قاعيداسى بولسا ەكەن دەيمىز، ول: از ايتالىق، كوپ ايتالىق، تەك ءادىل، جاقسى مەن جامانىن ءدال ايتالىق. بىزدە تاسقا باسىلماسا دا كوپ ادامنىڭ كوڭىلىنە ۇيالاعان ءبىر ۇعىم بار. ول مىسالداپ ايتقاندا مىناداي: سىننىڭ حيرۋرگى اپپەنديسيتى بار شىعارمانىڭ بۇيرەگىن كەسىپ تاستاسا، «يە، نيەتى دۇرىس قوي، ايتەۋىر سول شىعارمانىڭ ىشىندە ءبىر كىناراتى بار ەدى» دەي سالامىز. ولاي بولماسقا ءتيىس. اسىرەسە جاستار ەڭبەگىنە ۇقىپتى بولۋ كەرەك. جاس جەمىس اعاشىنىڭ ارتىق بۇتاعىمەن قوسا نارلەنىپ، باس جارىپ كەلە جاتقان بۇرتىگىن قيىپ تاستاۋ قانداي قيانات. ايمانوۆ سىنىنىڭ ىشىندەگى كەيبىر ورىندى پىكىرلەردى جوققا شىعارعىمىز كەلمەيدى. تەك جاستاردىڭ نەگىزىنەن ءساتتى ەڭبەگىن جەكە كەمشىلىگىنە بولا جوققا شىعارماڭىز، جامانىمەن بىرگە جاقسىسىن دا كورە ءبىلىڭىز، ءسويتىپ اعالىق، اقاۋسىز ءادىل سىن ايتىڭىز دەمەكپىز. ونداي ۇستازدىق سىن وسكەلەڭ جاستاردىڭ ءورىسىن كەڭىتەدى.
1967
You Might Also Like
-
سەركە قوجامقۇلوۆ جايىنداعى ءسوزدى قازاق حالقىنىڭ جاڭا تاريحىنا كوز جۇگىرتۋدەن باستاعىم كەلەدى. ويتكەنى قازىرگى ەڭ ۇلكەن ساحنا شەبەرى ەلىمىزدىڭ اعاسى قوجامقۇلوۆ — تاريحىمىزدىڭ كۋاگەرى عانا ەمەس...
