"جاس قازاق" گازەتىنىڭ مازمۇندىق، تاقىرىپتىق ەرەكشەلىگى
"جاس قازاق" - 2005 جىلدىڭ 7 قاڭتارىنان باستاپ جارىق كورىپ كەلە جاتقان قوعامدىق-ساياسي، اقپاراتتىق-تانىمدىق، ساراپتامالىق گازەت. قازىرگى تاڭدا سرايىل سمايىلدىڭ رەداكتورلىعىمەن شىعىپ وتىرعان "جاس قازاق" قوعامدا وزىندىك ورنىن تاۋىپ، وقىرمان تاراپىنان سۇرانىسقا يە باسىلىمداردىڭ بىرىنە اينالدى. گازەتتىڭ "قوعام"، "كوكەيتەستى"، " ءبىزدىڭ سۇحبات"، "جاڭالىقتار"، "ولكە"، "رۋحانيات"، "سپورت"، "وقشاۋ وي" اتتى تۇراقتى ءارى تانىمال ايدارلارى ساپالى دا ءماندى ماتەريالدار ۇسىنۋدان جالىققان ەمەس.
مىسالى "قوعام" ايدارىندا بەرىلگەن "جەر كوپ، جايىلىم جوق" اتتى ماقالادا قازىعۇرت اۋدانى، شاربۇلاق اۋىلىنىڭ ءتۇيىنى تارقاتىلماي جاتقان وزەكتى ماسەلەسى ءسوز بولادى. اۆتور ايدوس قۇسايىن ۇلى اۋىل تۇرعىندارىمەن تىلدەسىپ، جاعدايدى ءجىتى تۇسىنگەن سوڭ، جەردى "جەكەمەنشىك ەتكىشتەردىڭ" ارانى اشىلىپ، ءتىپتى، حالىققا تۇرعىن ءۇي، قورا-جاي سالار جەر قالماعاندىعىن اشىنا ايتادى. "كۇنكورىسىن قولىنداعى ازىن-اۋلاق مالدان ايىرىپ وتىرعان اۋىل تۇرعىندارى جايىلىم تاپپاي قينالىپ وتىر" - دەي كەلە اۆتور قىزىلوردا وبلىسىنىڭ جاڭاقورعان اۋدانىنا قاراستى تۇگىسكەن اۋىلىندا دا ءدال وسىنداي جاعداي قالىپتاسقاندىعىن باياندايدى. وسى سارىنداس تاعى ءبىر ماقالادا اۆتور تالاپ تىلەگەن "جەر جەتەدى، ءبىراق ديقان مەن مالشىعا جەر جوق" - دەپ وتكىر تاقىرىپتا ۇشقىر ويلارىن توگەدى. ال "كەمەلدى نۇسقا وسى" اتتى ماتەريالدا گازەت ۇجىمى شەڭبەرىندە وتكىزىلگەن دوڭگەلەك ۇستەلدىڭ بارىسى سيپاتتالىپ، لاتىن ءالىپبيىنىڭ نۇسقالارى جايلى وي قوزعالادى. بۇگىنگى تاڭدا قوعامدا قىزۋ تالقىعا ءتۇسىپ جاتقان جاڭا ءالىپبي ماسەلەسىن جاراس كەمەلجان كەڭىنەن تالدايدى.
اسا كوكەيتەستى ماسەلەلەر "كوكەيتەستى" ايدارىندا بەرىلەدى. ياعني، مۇندا جۋرناليستتىك زەرتتەۋلەر ۇسىنىلىپ، وقىرمانعا وي سالار سالماقتى دۇنيەلەر ءسوز بولادى. ماسەلەن، 2018 جىلدىڭ 17 ناۋرىزىندا جاريالانعان جاراس كەمەلجاننىڭ "قالامى - قىلىش، قاعازى - قالقان" ماقالاسى، 2017 جىلدىڭ 21 اقپانىنداعى ۇلداي سارييەۆانىڭ "شەيح حاليل دەگەن كىم؟"، 2016 جىلدىڭ 19 اقپانىنداعى مارات ماداليموۆتىڭ "بۋمەرانگ" ماقالالارى ەرەكشە تولىمدى، ويلى.
"ءبىزدىڭ سۇحبات" رۋبريكاسىنىڭ مازمۇنى اتاۋىنان اق ايان. "جاستار جۇمىس جوق دەپ وتىرىك ايتپاسىن" دەگەن جالىندى تاقىرىپپەن بەرىلگەن سۇحباتتا كوپ عيبراتتى دۇنيە ايتىلادى. بىرەۋلەر «ەكى قولعا ءبىر كۇرەك» جوق دەسە، 73 جاستاعى كەيىپكەر اجەي كاسىپ اشىپ، جۇمىس ىستەيتىن جاستاردى تابا الماي ءجۇر. بەكزادا نۇرحان قىزى – زەينەتكەر، ەكىنشى توپتاعى مۇگەدەك. «بيزنەستىڭ جول كارتاسى – 2025» باعدارلاماسى بويىنشا بيزنەس جوسپارىن قورعاپ، ۇكىمەت گرانتىمەن تىگىن سەحىن اشتى. الايدا، جۇمىسقا الىپ، بىلگەنىن ۇيرەتەيىن دەسە جىگەرلى جاستاردى تاپپاي ءجۇر. ياعني، بۇل ماتەريال جاستاردى ىزدەنىمپاز بولۋعا، ءارى ۇنەمى جاڭا مۇمكىندىكتەردى پايدالانا بىلۋگە ۇيرەتەدى. اقىن جاركەن بودەشپەن بولعان اسەرلى سۇحبات "كوزىمدى جۇمسام جايىردەمىن، اشسام جالعىزبىن" دەگەن تارتىمدى تاقىرىپپەن ۇسىنىلادى. دارىگەر اكىم تۇرسىنمەن بولعان تانىمدى دا تاعىلىمدى سۇحباتتىڭ ايتار ويى بولەك. بۇكىل الەمدى تىعىرىققا تىرەپ، سابىر مەن ءتوزىمدى سارقىپ، ءولىم مەن ءومىردىڭ ءمانىن تەرەڭ ۇعىندىرعان جۇقپالى ىندەت ءورشىپ تۇر. ەل باسىنا كۇن تۋعاندا، كەيبىر پىسىقتار مەن الاياقتار اقشا جاساۋدىڭ الۋان ءتۇرلى امالىن ويلاپ تاۋىپ، قالتاسىن قامپايتىپ قالۋ ءۇشىن نەشە ءتۇرلىنى جاساپ جاتقاندىعىن كوز كورسە، قۇلاق ەسىتىپ-اق وتىر. سەناتور مۇرات باقتيارۇلىنان الىنعان سۇحباتتا قوعامنىڭ وزەگىنە تۇسكەن جەگىقۇرت – جەمقورلىق، قولدان جاسالعان دارى-دارمەك تاپشىلىعى، دارىگەرلەردىڭ بىلىكتىلىگى جايى ارقاۋ بولادى.
"ولكە" ايدارى جاھان جۇرتشىلىعىنىڭ تىنىس-تىرشىلىگىنەن حابار بەرسە، "رۋحانياتتا" رۋحىڭا قۋات بەرىپ، كوڭىلدى سەرپىلتەتىن تىڭ دۇنيەلەر بەرىلەدى. ماسەلەن، گازەتتىڭ ءار سانىندا "ءشامشى مەن ەسەنعالي"، "ايىلدان شىققان ءمۇسىنشى"، "قادىر اعانىڭ كوز جاسى"، "عۇن ەدىلدىڭ ءالى اشىلماعان اقيقاتى"، "بەيسەنتانۋ"، "اباي - اقىلدىڭ پاناسى"، "قازاقتىڭ ءرىسارى"، "التىن وردا تاعىلىمى" سىندى الۋان ءتۇرلى تاقىرىپقا ارنالعان قىزىقتى ماتەريالدار جاريالانىپ تۇرادى.
كوپشىلىك كۇتە ءجۇرىپ، قالدىرماي وقيتىن "سپورت" ايدارى سپورت الەمىنىڭ تىڭ جاڭالىقتارىنان تىس قالماي، تۇراقتى تۇردە وقىرمان كوڭىلىنەن شىعىپ كەلەدى. ال "وقشاۋ وي" ەلدى ەلەڭ ەتكىزىپ، قوعامدا قىزۋ تالقىعا سالىنىپ جاتقان ماسەلەلەردى كوتەرەدى.
"جاس قازاقتىڭ" بەتىنە شىعىپ جۇرگەن ماتەريالداردى قاراپ وتىرىپ، باسىلىمنىڭ باعىتى قالىپتاسقان، باعدارى ايقىن ەكەندىگىن تۇسىنەمىز. قوعام سۇرانىسىن قاناعاتتاندىرا الاتىن قابىلەتى مەن ماتەريال ساپاسىن سۋالتپايتىن قاسيەتى گازەتتى وزگە باسىلىمدارلان وق بويى وزىق ۇستاپ تۇر دەسەك، قاتە بولماس، ءسىرا! تاقىرىپتىڭ كوبىگىن قالقىپ ەمەس، تامىرىنان ءدوپ باسىپ، تەرەڭىنەن جازاتىن گازەت سول ءۇشىن دە سۇيىكتى حالىق اراسىندا. ءباسپاسوزدىڭ ماقساتى اقپارات بەرۋ، وقىرمانعا ماردىمدى، ويلى دۇنيە ۇسىنۋ دەسەك، "جاس قازاق" جاس تا بولسا باس بۇل ورايدا. گازەت كۇننەن-كۇنگە قارقىنىن ارتتىرۋدا، پوتەنسيالىن جوعالتپاي، تۇراقتى دامۋ جولىنا ءتۇسىپ العان. سايتى بولسىن، سارى قاعازدى تيراجى بولسىن وقىرمان ءۇشىن قىمباتتى باسىلىم قايسارلىعىمەن قورىتپا وي، قۇندى دۇنيەلەر ۇسىنا بەرسە يگى.
ءال-فارابي اتىنداعى قازاق ۇلتتىق ۋنيۆەرسيتەتى
جۋرناليستيكا فاكۋلتەتى، باسپا ءسوز جانە ەلەكتروندى ب ا ق كافەدراسىنىڭ 1 كۋرس ستۋدەنتى مەيىربەك بايان مۇراتبەك قىزى
You Might Also Like
-
قازاق ادەبيەتى سان عاسىرلاردان بەرى ءوزىنىڭ قۇندىلىعىن جويماي، جاس ۇرپاققا ۇلكەن ۇلگى، ونەگە - كورسەتىپ كەلەدى. ونىڭ باستاۋى قازاق اۋىز ادەبيەتىنەن بەرى سارقىلماس قازىنا بولىپ جالعاسىن تاۋىپ كەلەدى....
-
ەكسپرەسس-ك” گازەتى. بۇل -- قازاقستان جاستاروداعىنىڭ ورگانى. بۇرىنعى “ لەنينسكايا سمەنانىڭ” زاڭدى جالعاسى بولىپ كەلەدى. ونىڭ ءبىرىنشى بەتى ءنومىردىڭ قىسقاشا ءمازمۇنى-نان، اپت...
