InfoHub Logo

بۇگىن پارلامەنت ءماجىلىسىنىڭ جالپى وتىرىسىندا دەپۋتات دانيا ەسپايەۆا دارىندى جاستاردىڭ شەتەلگە كەتۋىنە قولدانىستاعى گرانتتاردى ءبولۋ جۇيەسى سەبەپ بولىپ وتىرعانىن ءمالىم ەتتى، دەپ قازاقپارات حابارلايدى.

 «وكىنىشكە قاراي، ۇبت مەن گرانتتاردى تاعايىنداۋدىڭ داۋلى سيپاتى، سونداي-اق وسىمەن بايلانىستى ەموسيالىق كۇيزەلىستەر جىلدار بويى جالعاسىپ كەلەدى جانە ول سوزىلمالى ماسەلەگە اينالدى. سونىمەن قاتار بۇل جاعداي كوپتەگەن جاستاردى  قاجەتسىز ماشاقاتتان اينالىپ ءوتۋ ماقساتىندا باسقا دا جولداردى ىزدەستىرۋگە يتەرمەلەپ وتىر. وعان قوسا، وسىنداي مۇمكىندىكتەردى، ياعني مەملەكەتتىك گرانتتاردى رەسەيدىڭ، چەحيانىڭ، قىتايدىڭ جانە باسقا دا ەلدەردىڭ جوعارى وقۋ ورىندارى ۇسىنىپ وتىرعانىن ۇمىتپاۋعا ءتيىسپىز»، - دەپ توقتالدى ول.

وسى ورايدا دەپۋتات كەيبىر مالىمەتتەرگە توقتالا كەلە، تەك بيىلدىڭ وزىندە ۇبت-دان باس تارتىپ، شەتەلدىك گرانتتار بويىنشا ءبىلىم الۋعا قازاقستاننىڭ 40 مىڭ تۇلەگى باعىت العانىن، بۇل ءوز كەزەگىندە تۇلەكتەردىڭ 30 پايىزعا جۋىعى ەكەنىن اتاپ ءوتتى. بۇل تۇرعىدا د. ەسپايەۆا قولدانىستاعى گرانتتاردى ءبولۋ جۇيەسى ەلدەن تالاپتى جاستاردىڭ شەتەلگە قونىس اۋدارۋىن ىنتالاندىرىپ وتىرعانىن ءسوز ەتتى.

ونىڭ پايىمىنشا، رەسەيلىك، ەۋروپالىق جانە قىتايلىق ۋنيۆەرسيتەتتەر ۇبت-نىڭ قاجەتىنسىز-اق تالاپتى جاستاردى ىرىكتەپ جاتىر، سونداي-اق ولاردىڭ اراسىنداعى كوپتەگەن جاس ماماندار ەندى قازاقستانعا ورالماۋى مۇمكىن.

«بىرىنشىدەن، 110 باللدان جوعارى العان، الايدا تاڭداعان ماماندىعىمەن گرانت يەلەنبەگەن تالاپكەرلەرگە كەلەسى كەزەكتە ۇبت بويىنشا پاندەر ايىرماشىلىعىن تاپسىرۋ تالابىمەن بولىنبەنگەن گرانتتارى بار باسقا ماماندىقتار بويىنشا گرانت ۇسىنعان دۇرىس. ەكىنشىدەن، ۇبت-دان بولەك، قابىلداۋ ەمتيحانى جۇيەسى ارقىلى جوعارى وقۋ ورنىنا ءتۇسۋدىڭ بالامالى نۇسقالارىن تالاپكەرلەر تاڭداۋىنا ەنگىزۋ مۇمكىندىگىن قاراستىرعان ءجون. ۇشىنشىدەن، دارىندى ءارى تالاپتى جاستاردىڭ شەتەلگە قونىس اۋدارۋىن توقتاتۋ مەن عالىمدار مەن جاس مامانداردىڭ ەلگە ورالۋىن ىنتالاندىراتىن باعدارلامانى ازىرلەۋ كەرەك»،  - دەدى دەپۋتات. 

---