جەلتوقسان
جەلتوقسان! ۇسكىرىك جەل جۇلقىنا، ۇدەي سوعادى. اسپاننىڭ ءجۇزى قابارتىپ، ءزىلماۋىر قارا بۇلتتار تۇنەرە تونەدى. سول قارا بۇلتتاردىڭ كوبەسىن سوگىپ، كۇن نۇرىنا جول اشقىسى كەلگەندەي جارق-جۇرق ەتكەن ناجاعاي وتتارى تۇتاسا استاسقان دۇنيەنى بەينە تىلگىلەپ بارا جاتقانداي. جارقىلداعان جاسىن ەشتەڭەدەن سەسكەنەر دە، سەلت ەتەر دە ەمەس. بەينە قارالىق الەمىنە قارسى باعىتتالعان، اتىلعان وق ءتارىزدى...
...اتتەڭ، ول كوز الدىمىزدان عايىپ بولىپ تا ۇلگەردى. ىبىلجي جاۋعان جاڭبىر تولاستار ەمەس. جاقسىنىڭ كوزى تىرىسىندە قادىر-قاسيەتىن لايىعىنشا باعالاي المايتىن، نەنىڭ نە ەكەندىگىن ءالى كۇنگە جەتە باعامداي المايتىن حالىقپىز-اۋ. ەندى تۇنەرگەن تابيعات كەيپىنە ەنىپ، ءبارىمىز دە ونىڭ وتتى جۇرەگى مەن قاجىماس قۋات-كۇشىنە مويىنسۇنىپ تۇرمىز.
قىراندار ۇزاق جاسامايدى ەكەن. الدە، كوز تيەدى مە ولارعا؟ الدە، مەرزىمىنەن بۇرىن كۇنشىلدەردىڭ تۇزاعىنا ىلىنە مە ەكەن؟ ياپىراي، مىنا جەلتوقسان ايىندا تۇيسىكتىنىڭ كوڭىلىنە نەشەبىر وكىنىش-مۇڭ ۇيالايدى ەكەن. قاراسۋىق جەل اقىرا، ءھام، «اھ» ۇرا ازىناپ، تۇلابويىڭدى تۇرشىكتىرىپ بارا جاتقانداي. ءبىر ءتۇرلى تولقىماي تۇرا المايسىڭ. رۋحىڭ كوتەرىلىپ، وز-وزىڭنەن قاناتتانا تۇسەسىڭ. ويتكەنى، ونىڭ كوزى جوق بولسا دا، ماڭگىلىك جانىڭنان تابىلىپ، قولتىعىڭنان دەمەپ جۇرگەندەي. ونى كورمەي-اق ەسكە الۋدىڭ ءوزى جەتىپ جاتىر. اسىلى، ولمەيتىن، رۋحى جاساي بەرەتىن دە جاڭدار بار-اۋ. قالىڭ بۇقارانى سوڭىنا ەرتىپ، تۋرا جولعا باستاعان ونىڭ قۇدىرەت تىلسىمىنا قالاي باس يمەسكە؟!
جەلتوقسان كەلسە جۇرەگىم قارس ايرىلاتىنى، باس شايقاپ قاتتى قايعىراتىنىم بار. وتكەن جىلعى تابىت كوتەرىپ كەلە جاتقان ءساتىمىز ەسكە تۇسەدى. ونىڭ قاپ-قارا، قايسار شاشتارى الاقانىما قاراي جەلمەن سۋسىپ بارادى. ءبىز تابىت ەمەس، بۇكىل جۇرت بولىپ حان كوتەرىپ بارا جاتقاندايمىز. ال ول بولسا، ءبىر ساتكە عانا مىزعىپ كەتكەنگە ۇقسايدى...
جەلدى كۇندى اۋەلدەن-اق ۇناتۋشى ەدىم. جەلىگىپ، ايدارىمنان جەل ەسىپ ءجۇرۋشى ەدى. ونىڭ ءارۋاقتى تۇلعاسىنان ءون بويىما ءنار جياتىنمىن.
ەندى ول جوق! تەك قانا ەلەس بەرىپ قالادى. ءبىراق، كوزگە كورىنبەي، اۋليە-پىرىمدەي الىستا ءجۇرىپ-اق قورىپ، قورعاپ ءجۇر.
ءارۋاققا سەنبەسەڭ، كۇندەردىڭ كۇنىندە وپات بولارىڭ حاق. ول حالقىنا، حالقى وعان سەنىپ ەدى. ەر سەنىمدى اقتادى، ەلى دە قۇرمەتىن جاساپ جاتىر.
سوندا دا بولسا، جەلتوقسان ايىندا ازا بويىم قازا بولادى دا تۇرادى. «بولماساق تا ۇقساپ باعىپ»، تاۋەلسىزدىك تۋىن تىك ۇستاۋ جولىندا جالىندى كۇرەسكە بەل بۋعىم كەلەدى دە تۇرادى. ەسىل ەرلەردىڭ رۋحى ولمەيدى دەگەن وسى ەكەن!
2.12.1992 جىل.
You Might Also Like
