جەلتوقسان
باتۋشى ەدى جانعا ايازداي ءبىر جوعى،
شىندىق سۇراپ كوتەرىلدى ۇل قولى.
سەرىپپە ەدى جىلدار بويى جيىرىلعان،
قاتتى سەرىپتى، ايانبادى بۇل جولى.
ول قاتاڭ رەجيمنىڭ الدىندا مۇنداي بولۋى مۇمكىن ەمەس دەگەن نارسەنى مۇمكىن ەتتى. ول رەجيمدى سونىسىمەن شوشىندىردى. ونىڭ اتى - جەلتوقسان.
ول ۇرەيلەندىرىپ جىبەردى. كوممۋنيستىك ۇلت ساياساتى جەلەۋىمەن ءوز ساياساتىن جۇرگىزىپ جاتقانداردى. بويلارىندا ءالى وياۋ رۋحتىڭ قانى بار ەكەن دەپ.
ول ىزالاندىردى. شوۆينيستىك پيعىلدا ويلايتىن جانداردىڭ ىزاسىن تۋدىردى. تەڭدىك سۇراعىسى كەلەدى دەپ.
ول ءۇمىت وتىنان باستالعان ەدى. جۇيە بىزبەن ساناسادى دەپ. ءبىزدى تىڭدايدى دەپ.
ول بىرىكتىرىپ تۇردى. ونىڭ اتى - الاڭ.
ول شامداندىردى. سول كەزدەگى امىرشىل-اكىمشىل جۇيەنى. كۇش قولدانۋعا ءماجبۇرمىز دەپ.
ول كوڭىلدەرگە جارىقشاق ءتۇسىردى. سول قوعامعا وزدەرى دە سەنەتىن جاس ۇرپاقتىڭ سەنىمىن تاپتادى. نە ءۇشىن بۇلاي ەتەدى دەپ. ءبىز دە وسى قوعامنىڭ تەڭ قۇقىقتى مۇشەسى ەمەسپىز بە دەپ.
ول شيرىقتىردى. بيىكتە تۇرعان جانداردىڭ وزدەرىمەن ساناسپاعاندىعى ءۇشىن. سوزدەرىن تىڭداماعاندىعى ءۇشىن.
ول اشىندىردى. تۇششى ەتىنە اششى تاياق كەلىپ تيگەندە.
سونان سوڭ قارسىلىعىن تۋعىزدى. رەجيمنىڭ شىنايى بەت-بەينەسىن كورگەندە. ەندى ايانىپ قالار ەشتەڭە جوق دەپ.
ونىڭ اتى - جەلتوقسان.
جەلتوقسان كوز جەتكىزدىردى. ۇلت جولىنداعى قانداي دا ءبىر كۇرەستىڭ قيىن دا كۇردەلى جولدان وتەتىندىگىنە.
ماڭىزىن قالدىردى. بۇل سول كەزدە قيىن بولسا دا، ولار "ءبىز دە ءبىر ەلمىز" دەپ ءبىر الاڭدا، ءبىر داۋىسپەن ۇلتتىق مۇددەسىن سۇراپ تۇرا العان ەدى. جەلتوقسان وسىنىسىمەن قاسيەتتى.
ولار مىندەتىن وتەدى. ءوز داۋىرىندە، ءوز كەزەڭىندە.
ولاردى شەگىندىردى. ءبىراق جەڭىلگەن جوق. ويتكەنى ولار ادىلدىك سۇراعان ەدى.
ول تاريحي ماڭىزدى سيپاتقا يە بولدى. الدىڭعى داۋىردەگى كۇرەستەرمەن ۇندەسىپ جاتقاندىعى ءۇشىن.
ول بولاشاققا جول سالدى. ودان كەيىن كەلگەن ازاتتىقتىڭ سۇرلەۋ-سوقپاعىنىڭ ءبىر تارامى جەلتوقساننىڭ دا ەنشىسىندە جاتىر. ۇلت جولىنداعى بارلىق قاسيەتتى كۇرەستەردىڭ تىرەلەر سوقپاعى - ازاتتىق.
ول سانانى جاڭعىرىقتىردى. قوعامدى باسقاشا ويلاۋعا ءماجبۇر ەتتى. ولار وسىلاي ەتۋگە يتەرمەلەگەن ءوز قوعامىنىڭ العاشقى قارلىعاشتارى ەدى. ولار - تەك ۇلتتىق مۇددە عانا ەمەس، دەموكراتيالىق ۇدەرىستەردىڭ دە سوقپاعىن سالۋشىلار.
ول ۇلتتىق ساناعا سەرپىلىس اكەلدى. ءار تاراپتا ءومىر سۇرەتىن جاندار ولاردىڭ قاسىرەتىنە كوزى جەتكەندە بىردەي جىلادى. ولاردىڭ سول كەزدەگى الاڭعا تامعان كوز جاسىنىڭ قايعىسىن بىردەي سەزىندى. ءبىر كەزدە الاڭدا تەك البىرت جاستار عانا تۇرسا، ەندى ءوز ساناسىندا ولارمەن بىرگە تۇتاس ۇلت تۇردى. جەلتوقسان ۇلت ساناسىن تۇتاستاندىرىپ جىبەردى. ول وسىعان قىزمەت ەتتى.
جەلتوقسان كەيىنگى ۇرپاققا تاعىلىم بولىپ كەلدى.
قۇرباندارعا تاعزىم.
جەلتوقسان وقيعاسىنا - 30 جىل.
بولسا دا كوپ ومىردە جول اينالما،
تۇرا الدى ولار سوندا اشىق مايداندا.
تاعدىرىمەن، تاريحىمەن ءبىر ۇلتتىڭ،
بولمايدى ەكەن عۇمىر بويى ويناۋعا.
جەلتوقسان وسىنى دالەلدەدى. ال ارادا 5 جىل وتكەندە تاعى دا جەلتوقسان ايىندا قازاق ۇلتىنىڭ تاۋەلسىز مەملەكەتتىلىگىنىڭ تاريحى باستالدى.
You Might Also Like
-
وسىدان 25 جىل بۇرىن ەگەمەندىگىمىزدى جاريالاپ، تاۋەلسىزدىككە قول جەتكىزدىك. بۇل عاسىرلار بويى قازاق حالقىنىڭ اڭساعان ارمانى ەدى. ۇلى قازاق ەلى وسى كۇنگە جەتكەنشە ءۇش ءجۇز جىلعا جۋىق بوداندىقتىڭ بۇعاۋى...
-
ءبىلىم جانە عىلىم مينيسترلىگى ۇلتتىق ءبىرىڭعاي تەستىلەۋدى ەكىگە ءبولدى. ەندى، مەكتەپتى ءبىتىرۋ ەمتيxانى وقۋشىنىڭ ورتا ءبىلىمدى ءتامامداعانىن دالەلدەسە، ۇلتتىق ءبىرىڭعاي تەستىلەۋدىڭ قورىتىندىسىمەن مەكتەپ ت...
