بعم مەكتەپتەن كەيىنگى جاڭا ەمتيxاندار تۋرالى كەڭىنەن ايتىپ بەردى
كەلەسى جىلدان باستاپ مەكتەپ تۇلەكتەرى ورتا ءبىلىمدى ءتامامداعانىن بولەك ەمتيxانمەن دالەلدەسە، ۇلتتىق ءبىرىڭعاي تەستىلەۋ ارقىلى مەملەكەتتىك گرانتقا قول جەتكىزىپ، جوعارى وقۋ ورىندارىنا تۇسە الادى. بۇگىن استانادا وتكەن باسپا ءسوز ءماسليxاتىندا ق ر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم دەپارتامەنتىنىڭ ديرەكتورى جاڭىل جونتايەۆا مەكتەپتەن كەيىنگى ەمتيxاندار تۋرالى ايتىپ بەردى.
دەپارتامەنت ديرەكتورىنىڭ ايتۋىنشا، بۇرىن ۇلتتىق ءبىرىڭعاي تەستىلەۋگە قاتىسقىسى كەلمەيتىن بالالار عانا مەكتەپ ەمتيxانىن تاپسىرسا، كەلەسى جىلدان باستاپ بارلىق مەكتەپ وقۋشىلارى قورىتىندى ەمتيxاندى تاپسىراتىن بولادى. سودان كەيىن ۇلتتىق ءبىرىڭعاي تەستىلەۋگە قاتىسىپ، جوعارى وقۋ ورنىنا ءتۇسىپ كورمەك.
"مەكتەپتە وتەتىن ەمتيxاننىڭ ءبىر ەرەكشەلىگى، 10-11 سىنىپ وقۋشىلارىنىڭ جاراتىلىستانۋ-ماتەماتيكا مەن گۋمانيتارلىق باعىتتا ءبىلىم العاندارى ەسكەرىلىپ، ولار قاي باعىتتا وقىسا، سول باعىتتا ەمتيxان تاپسىراتىن بولادى. سۇراقتار دا سوعان ساي بولادى. ال ەمتيxاندارعا كەلەر بولساق، ءبىزدىڭ بالالارىمىز انا ءتىلى مەن ادەبيەتتەن ەسسە جازادى. وعان ءۇش ساعات بەرىلەدى. ەسسە ادەبي تاقىرىپتاردا بەرىلەدى، ول شاعىن كولەمدەگى پروزالىق شىعارمالار نەمەسە وقۋشىنىڭ ءوزىنىڭ جەكە ويىن بىلدىرەتىن ەركىن تاقىرىپتا جازىلادى"، - دەيدى ج.جونتايەۆا.
ەكىنشى ەمتيxان قازاقستان تاريxىنان تاپسىرىلادى. ول اۋىزشا وتەدى. اتالعان ەمتيxان بويىنشا بارلىق بيلەتتەردىڭ سانى 25-تەن اسپايدى. ءاربىر بيلەتتە 3 سۇراقتان بولادى.
"ەكى سۇراق قازاقستان تاريxىنىڭ تەورياسىن قامتيتىن بولسا، ءۇشىنشى سۇراق شىعارماشىلىق سۇراق بولادى. ول كەزدە كارتامەن جۇمىس ىستەۋ كەرەك. ءۇشىنشى ەمتيxان الگەبرا جانە اناليز باستامالارىنا ارنالعان. بۇل ەمتيxان جازباشا بولادى. وعان بەس استرونوميالىق ساعات بەرىلىپ وتىر. سەبەبى ول بەس تاپسىرمادان تۇرادى. تاپسىرمالارى ماتەماتيكالىق فاكتىلەردى، تۇسىنىكتەردى، تاسىلدەردى، ەسەپ شىعارۋ جانە لوگيكالىق تاپسىرمالاردى شەشۋگە ارنالادى دەپ كۇتىلۋدە. سونىمەن بىرگە، ورىس جانە باسقا دا تىلدەردە وقيتىن مەكتەپتەردە قازاق تىلىنەن تەست بولادى دەگەن جوسپار بار. وعان 80 مينۋت بەرىلەدى. 40 سۇراققا 40 ۇپاي بەرىلەدى"، - دەپ اتاپ كورسەتتى دەپارتامەنت ديرەكتورى. ال سوڭعى ەمتيxاننىڭ ءپانىن مەكتەپ وقۋشىسى ءوزى تاڭدايدى.
You Might Also Like
-
تەلەديدار كورۋ: تۇراقتى تۇردە دەنە جاتتىعۋلارى جاسالعاننىڭ وزىندە ساعاتتاپ تەلەديدار الدىندا وتىرۋ جۇرەك اۋرۋى جانە سال اۋرۋىنا شالدىعۋ ىقتيمالدىعىن ارتتىرادى.
-
باستاۋىش سىنىپ وقۋشىلارىنىڭ كوڭىلى سونداي نازىك تە، تازا عوي، شىركىن! ولار ءومىردى شىنايى قابىلدايدى. سول وقۋشىلارىممەن بولعان بىرەر ساتتەردى ءسوز ەتپەكپىن.
